Feb 17, 2011

Ka rawn fang leh e

Ka Bike tawng tawh tak mai chu kan tlawh nung ve hlet hlet a, pan lam tur vai tak chungin ka hma lam pan chuan ka tlan zel a, ka ngaihtuahnaah chuan thil tam tak a lo lut a, hum liam ta te ang chu nise tun angah chuan thiante nen hlim takin kan tualchai ngei awm si a.Hlim taka kan inum kawi zawr zawr laite chu mitthla an a rawn lang thar a, lung tileng mai an chang tawh si. Hlim taka kan lo awmna 'HUN' chuan chung hunte chu a liampui tawh a, tap ruai ruaiin au mahila kohkir theih an chang tawh si lo.
Chawhnu her lamah chuan kan tualchaina thin ka theng a, thlifim lo thaw heuh heuhte chuan danglamna reng an la nei si lo. A phaitual hnim hring cham diai mai te, a sir a Thlado kung leh Thlado kung lera Chawnpui parte chuan a ngai tein min lo la lawm a. Tudang ngai lova kan tualchai min lo thlir a min lo hlimpui thintu van dumpawl pawh chuan ngai tein min la lawm si.
Aw! Khawnge in awm ka lenrual lunguh zawngte u? Engtikah tak tawnni her leh tak ang i maw? Kan inhmuhkhawm hnuhnun bera kan aiawha lung kan fawm khawmte pawhchu a ngai tein an lo la awm a, lung ti leng mai an chang zo ta. Thlifim rawn tleh heuh heuhte chuan kan nunhluite chu mi rawn fah mawlh mawlh a, Chawnpui par kan fawm thin lo tla darh nuaite chuan lung an tileng a, mahni a chhar tur chuan chakna reng ka nei si lo.

Thlang lam atang chuan kan khua chu  ka thlir vang vang a, a tlang leh mual a dang lo mahse a dang tawh si. A ni, a dik alawm, a dang vek tawh. Lung tileng mai a`n zawng a pamhai lua e.Mahni in theuh kan kawh lai mitthlaan a lo lang a, chu chuan patling meuh pawh zuah lovin a mit ata mittui a ko chhuak si. A ni. Nunhlui ngaih zawng tawrh thiam a har a, patling leh nutling a thliar si lo.
Chutia ka thlir veng veng lai chuan naupang hlim nui ri ka hria a, ka va en chuan Thlado hnuaia Chawnpui par an chhar ka va hmu a. Lungkham dang reng nei lova an infiam ka hmuhte chuan lunghlui a kai thova, an hlim hmel chuan lunglenna tuamah min hnuklut leh si. Naupang nui rite chu a lo reh a, ka suangtuahna ram mai a lo ni si.
Rang takin thingbul chu ka va pan a, kan intiam ang ngeiin thiante chuan an tlawh ni an lo ziak far mai a. Vawi hnih vawi thum ziak an awm tawh laia keiin vawi khatna kan ziak ve tur pawh chu aka inthlahrung ta dah a. A ziak hnuhnung bertu ziak ka chuan rilru a fan a, mak tihnain ka khat zo ta. Kum sarih kalta a ziaktu chuan 'H<3E' tih hi a lo ziak a, nunhlui min ngaih tir mahse thil inthup ka hailan chuan ka rilru a khawih a. Ka duh ngawih ngawih, inthianthatnain a tawrh hlauh vanga ka sawi ngam loh, kum sarih kal ta a pasal nei ta ziak a ni si. Ka chemte chu ka lek kang a, 'E<3H' tih ka ker chu ka hnutchhiah a, tlai ni tla tur thir vawng vawng chung chuan ka lirthei chuan ka intlawh hawng leh ta a.


Thlado lerah Chawnpui a par an ti
Tuahpui le Vaute an lo vul leh ang a
Kan hlimlai nite chuan kir zai an rel tawh dawn si lo
Intawn leh hun nghak chung zelin mangtha
Aw...Thian ngaihawm.......