Eric Clapton`s Tears In Heaven

Harsatna hi pumpelh theih ni ta sela chuan, Eric Clapton-a ngei pawh hian a chu aia thlan chu a nei lo ngei ang.

March 20,1991 zing lam dar 11 a ni a. New York khawpuiah chuan Conor Clapton-a, Eric Clapton-a fapa kum4 mi lek chu a nu Lori Del Santo, Italian lem chanthiam te inah chuan a awm a. Tlai tin mai hian a pa lo haw hmuakin Conor-a chuan kawngka lam chu a pan thin a. Tlai dang ang chu ni se, hemi ni pawh hian lawm takin an inchul leh ngei ang. He tih lai vek hian an ina hna thawk chuan a tukverh darthlalang chu a lo hru fai ve mek bawk a.
Conor-a leh amah awmtu chu an inum kual vel a, tukverh tih fai lai awmnaah chuan tlan lutin tukverh darthlang hru faitu chu a tlan pel thuak a, tukverh tihfai hlim, boruak luh theih nana an hawn, 4ft a zau leh 6 ft a sang ah chuan darthlalang chu a la awm emaw tiin a tlan phei a,  a tlan liam ta a ni. An awmna in hi chhawng 53 emaw chhawng 49 ti a sawi a ni a, a khawi zawk zawk pawh hi nise mi pangngai tan chuan han dampui  chi zia a ni lo!

He  thil a  thlen lai hian  Eric Clapton-a  chu hotel pakhat, he chhiatna thlenna a hla lo takah a awm a. Conor-a nu in Conor-a thih thu a hrilh laite hian a khawvel chu a hrehawm ve ngawt ngei ang. Amah lawm tura  tlan ni a a ngaihruat phei chuan a tan tah loh chutih tur reng a awm lo.

Ka phone chu a lo ri a, Lori (Conor-a nu) a ni a, a aw atang chuan a hlau thawng tih a hriat reng mai, "Conor a thi" tiin a au teng  tung a. Ka thil hriat chuan min kai beina nghal khawp  mai. "A va rapthlaem!! A thi tih chu i chiang chiah maw??" tiin khawvela zawhna mawl ber ka zawt hial a ni. "Tukverh atangin a tla a, hei ka  kiang a hi a awm mek" tiin min chhang a, "Aw le, ka rawn kal nghal ang e" tiin ka dah ta a.

 A fapa thihna chuan Eric Clapton chu a  deng na em em a. Thla kaw (9) chhung meuh a chawlhsan hnu chuan rimawi lama rawn lut lehin, a hma aia nem zawk leh hla awmze nei a rawn hmang tam tan a. Stage a a rawn chuan kai hmasak ber tum chuan  "Tears In Heaven" tih hla, amah leh Will Jennings te phuah chu a rawn chhawp chhuak a, khawvel pumpuiin an hlutsak em em a, a aw nen inhmeh vang leh zai a thiam hrim hrim vang te pawh a ni mahna, kum 1993 ( a hla phuah atanga kum 2na) khan zai mite leh rimawi ngainatu te`na an ngaihsan Grammy Awards chu a dawng hial a, hetah hian Best Pop Vocal Performance (mipa lamah) a dawng a ni.

Would you know my name
If I saw you in heaven?
Would you feel the same
If I saw you in heaven?
I must be strong and carry on
Cause I know I don't belong here in heaven...

Would you hold my hand
If I saw you in heaven?
Would you help me stand
If I saw you in heaven?
Ill find my way through night and day
Cause I know I just can't stay here in heaven...
Time can bring you down, time can bend your knees
Time can break your heart, have you begging please...begging please

Beyond the door there's peace I`m sure
And I know there`ll be no more tears in heaven...

Would you know my name
If I saw you in heaven?
Would you feel the same
If I saw you in heaven?
I must be strong and carry on
Cause I know I don't belong here in heaven...

Eric Clapton-a hian he hla  a phuah dawn hian Jennings-a puihna a va dil a, hetih lai hian chang khat vel chu Eric-a hian a nei tawh a ni awm e. An pahnih tang kawp chuan khawvel-a hla hit berte zing a mi, Tears In Heaven chu an lo phuah chhuak  ta a ni.

Sources: http://www.songfacts.com http://snopes.com

Coz I know, Der`l be NO MORE tears in Heaven

Pani ke sath Pani

Ka chuanna rel vu vung vung a reh hnu chuan ka zirna hmun tur, kum 4 leh a chanve chhung ka awmna tur Dehradun ka thleng ta tih hai rual a ni lo. Tlai ni tlak hma hret a ni a, chhaklama tlang lo toh luah ka hmuhte chuan lung a tileng nghal ringawt mai. Vawi khat kalna mah nise, Delhi meuh pawh mahni-a thleng thei ngat ka nih avangin hlauh tur vak neiin ka inhre lo. Hmanhmawh takin Auto ka kova, ka zirna hmun tur kan College chu kan pan ta a. College kan thlen hnua Auto Driver-in ka thiante hnena a sawi, ka hriatthiam loh min lehsak hnu chuan, Driver chuan ka vawi khat kalna a ni tih reng a hre lo a ni awm e.

Gate Keeper chu Hindi-a biak a ngaih avangin tih theih ka nei tlem hle mai. Ka Document ka entir hnuah, Reception lam chu 'Saw lamah sawn..' ti niawm tak hian a kawk a, ka pan phei ve ta nghal a. English ka lo thiam nal lutuk lo nen, kan insawi nek nek hnu chuan kan College 'Zirlaite Tan In' chu min panpui ta a.
Gate luh dawnah chuan 'PANI KE SATH PANI' tih a lo inziak kulh mai a. Pani awmzia ka hriat ve hlauh avangin 'Tui leh Tui' an ti a nih hi ti ru reuh reuh chung chuan Warden Room chu kan pan a. Kan Warden chu pa te lam, pumraw phu lova dul kiar a ni a, Pathianin mihringte hi Ama anpuia min siam a nih chuan Pathian a anna chu a hlauh nasa viau tawh a ni ang. Min hruaitu nena eng eng emaw an sawi hnu chuan kum khat chhung ka awmna tur Room No. 203 chabi chu min pe a, ka indah lut ve ta sawk sawk a. Ni 3 vel hnuah, Silchar pa a rawn lut ve leh a. Innel tak chuan kan inbe chho tan a.
Class kan han kal tan a, Hindi thiam loh chu a hrehawm hle mahse thiam chakna leh tumna ka nei lo hrim hrim. Ka thianpa chuan Hindi a thiam avang chuan harsatna em chu ka tawng hran lo. Gate bula thil inziak ka zawh chuan 'Water with Water' tih a nih thu leh a awmzia a hriat bik loh thu chuan min chhang a.
A mak ngawt mai, kan College-ah chuan Hindi thiam lo awm chhun ka ni a, mahse Pathianin ka mal reng a phal bik lo a ni ang. Kan Thermo-dynamo Practical Demonstrator pakhat chu Mizoram-a awm tawh thin a ni hlauh mai. Mahse, 'Ka pu, chibai' tih leh 'Ka pi, chibai' tih bak chu a thiam tlem hle mai.
Ni leh thla a liam a, kum a vei meuh chuan Hindi pawh a bo lo tawk chuan ka thiam ve ta. Mahse, Gate bula thil inziak kha hrethiam tur khawp chuan ka la thiam lo a ni ang. A awmzia reng reng ka la hre chuang lo. Kan zirtirtu thenkhat ka zawh chuan ka thianpa min hrilh ang chuan min chhang ve mai a, a awmzia leh Warden-in a hman chhan reng an hre bik lo. (Kan Warden hian kum eng emaw zah chu a lo hmang tawh a ni awm e). 
Tlai khat Paractical class kan nei zo chu kan Practical Demonstrator chu ka zawt chhin a, nui vur vur chung chuan ti hian min hrilh ta a.
" Tuna in Warden a awm hma hi chuan kum tam tak chhung chu CH-I building-ah sawn buaina a awm reng thin a, hnam ang zawngte-a a kal fo avangin a boruak a tang thei hle thin. Warden-a tang apiang chuan kum khat bak an enkawl ngam lova, a laklawha bang ta pawh an awm nual mai. Kum 12 vel liam ta atang khan tuna in Warden saw a rawn thawk tan ta a. Thil awmdan engkim hrilh vek hnua tang a nih avangin zirlai tharte an rawn kal ni chuan 'PANI KE SATH PANI' tih hi a tar a, a hmu apiang an nui a, kan Principal meuh pawh hian a hauh kha. A kum khatnaah chuan eng a ang chuang lo, mahse, beidawn a tum lo.

Kum 4 a liam hnu chuan a lo dang tan ta. Buaina a lo chhuahin a reh leh mai zel a, a hma anga nu leh pate koh hial ngai khawpin thil a thleng ngai ta lo." A sawi zawng pawh chuan a nui deuh vur vur reng a, ka hmel atang chuan ka hrethiam lo tih a hria a ni ang chu, sawi zawm leh a tum lai tak chuan zawhna min zawt ta a. 'Ka rawn kal tirh chuan Silchar ami nen kan awm' ka tih chuan a bu nghut nghut a. A sawi zawm leh ta a.
"Naupang an awmin an rawn kalna azirin a thliar hrang hmak hmak zel a, a kum hnihnaah chuan kum khatna-a awmdun kha chu an awmdun tawh ngai lo", a sawi leh hma chuan ka nui chhuak ta a. Ka thianpa nen khan kum khatna chiah kan awmdun tih ka hrilh hnu chuan kan nui deuh hak hak a.
Mi nuihzat avangte khan lo chawlhsan ta se, tun ang hian kan awm awm si lova tia inngaihtuah reuh reuh chung chuan ka room lam chu ka pan ta a.

Missionary Break-up

Ka room-a ka inkhelh lai chuan ka thianpa hi a lo lut a, a hmel han en mai pawh chuan sawi duh tam tak a nei tih a hriat theih a. Lungngaihna tam tak a nei tih hai rual a ni lo.

Ka thianpa hi Missionary a ni a, keini ang bawk a mihring a nih avangin harsatna tam tak a tawng ve tawh thin tih chu ka hria. Mahse, tun ang em em-a a hlim lo hmel hi ka la tawng ngai lo! A meng dul ruih leh a sam bua chuatte chu hmuh hmaihsak tum mahila, a chetdan chuan engkim a sawi vek si. Ka khum-a a thut hnu chuan a bialnu nena an chanchin chu min hrilh ta a.

Pathianin kan thatna turin engkim a thawk thin

Based on a True Story

Delhi khaw lum uap churh chu chhuahsan tum ni awm tak chuan hmanhmawh takin Auto chu ka la a, ka thiannu in luahna lam chu ka pan ta a. Ka thiannu chuan nghakhlel tih hriat tak chuan min lo hmuak a, kan hmelah hian kan sawi tur chu hmuh theih ni se zawng; harsatna kan tawk mek a ni tih kan hre thei tur.
Chaw kan ei khama thut khawmuan pah chuan bathlarah chuan kan thu a, kan hun tawnte leh kan thil tih thinte kan sawi zel a. Lamna hmuna a kal chak leh chak loh ka zawha min chhan dan chuan min va thawng tak em!!

"Kum li vel liam ta kha a ni a, chu chu Delhi-a ka awm tirh a ni. Kan tawhna Hotel-a kan Manager (Nula) chuan kei leh ka thian pali vel chu lamna hmuna kalpuiah min sawm a, chinchang engmah hre lo kei leh ka thiante chuan engtin nge lamna chu a awm tih hriat nan tiin kan kal ve tur thu chuan kan chhang ta a.

"Ka thian pahnih nen chuan bang nghengin kan ding a, kan pi leh a thiannu lam chu kan en reng a. Lamna an khar dawn thlenga kan awm hnu chuan haw dan tur kan ngaihtuah ta a. Tlangval pakhat hmelchhe lem lo tak chuan min thlah a hreh loh thu a sawi lai chuan kan pi chuan midang min sawm ve tho chu a tha zawk e, hepa hi inthlah tir ang a ti a, a motor-ah chuan kan lut ta a.