In tawng leh ngei ang aw.

Ka reh bawk a, lung pawh a  leng hle mai.

Tun tum chu  Chennai lam atangin ka`n update ve ang e.  

Lunglen hi nuam chin a awm a, a len ngawih ngawih tawh chinah chuan a nuam ngai lo a  ni e.         

Shillong nula kha aw...!!

Krismas Nangnen

Thlasik tlai ni tla turin a chhun sen phut Musoorie tlang chu nuam ti tak chuan in chung zawl atang chuan ka thlir a. Chutiang boruak vawt ruihte chuan nunhlui min chhui tir a, hlimna famkima thuama ka awm laite chu min mitthla tir zung zung bawk a.

Ka phone chu a ri rel rel a, ka han lak kan chuan khawvela aw mawi ber mai leh ka duh ber chuan, "L, I va reh ve...vawiinah min la be miah lo a nia". "Nia, vawiin chu kan college lamah ka buai deuh a, practical kan buai deuh alawm mawle". " Chu pawh nise, rawn message tal tur a nia, i induh thei lutuk mai..a hrim hrimin engtik nge i rawn haw dawn a??". "D, ka rawn haw tep tawh alawm, thla khat pawh a ngai tawh lo. Eng nge ka rawn hawn ang che?". " Engmah a ngai lo, nangmah kha a tawk mai" nui ker ker chung hian a ti a.
"I duh ber sawi rawh, ka rawn hawn ang che". " Ihhh...Note Book tha deuh min rawn haw rawh". "Eng rawng nge i duh? A 'pawl' ti raw i rawng duh ber kha?". "A 'pawl' chu a ngai lo, a 'eng' a awm chuan rawn lei rawh...nangma rawng ngainat ber a nih kha". "Awle awle.....i duh ber chu ka rawn hawnsak ang che. Chaw in ei tawh em?? In khua chu a vawt ve tawh em??". "La ei lo e..nang i ei tawh em ni??? Vawh chu a vawt tawh khawp mai...India rama hmun vawt ber pawl a ni tih i hre tawh lovemni?? (A nui her her a)". "La ei bik nang...a la hma em alawm....."

Kum khat chauh la vei mahse, ka tan chuan a va han rei tehreng em! Khang kan thil sawi zawng zawng kha khawiah nge a awm tak ang le??? Tunah, a hun ngaiah, a hmun ngaiah ka  ding a. A tlang leh a mual lah dang si lo. Mahse, khang thilte kha chu nunhlui, koh kir theih loh an chang ta mai si a. Ka phone chu ka en vang vang a. Kan call hnuhnung ber la lova, message-a min reply-na pawh chu a lo la awm vang a. "Mi tu emo vagn k rlru a na m a...tmah k be thy hrh l a ni..mn hrethy hrm dn ny...". Ka chhiar nawn tluk tluk a. Thiam thu sawi tur pakhat mah ka nei lo tih ka hria, mahse, ngaihdam pawh dil i la., a rilru na chu a reh thei kher ang em?? Nge, engkim theihnghilhin a lo let leh ang?? Ka ngaihtuah chian poh leh ka chiang lo deuh deuh va, ka bing mup mup mai.

Dik tak chuan khami ka haw hnu a, Aizawl lama kan inhmuh dante, kan inhmuh laitea a lawmzia leh min thlekhlelhzia kha chu hai rual a ni lo. Damdawiin-a damlo kan kan tum a kan ka chhungte bula a zahzia kha a hmel atang pawn hai rual a ni lo. Khang hun zawng zawngte kha mual an liam a (?), kohkir theih an chang rawh si lo (?).

Tunah chuan, nghakhlel taka min lo hmuaktu ka nei tawh lova, kei pawhin Mizoram lam haw chakna reng ka nei ta lo. Lengpui atanga Aizawl khawpui inkar chu ka tan tahna ruam a lo chang a. Ka beiseina neih ve zawng zawngte chuan beidawnna ruamah min hruai lut zo ta.

D, theih nise, nang nena Krismas hman dun leh hi ka nuam asin.
Krismas nangnen....

Missionary Break-up

Ka room-a ka inkhelh lai chuan ka thianpa hi a lo lut a, a hmel han en mai pawh chuan sawi duh tam tak a nei tih a hriat theih a. Lungngaihna tam tak a nei tih hai rual a ni lo.

Ka thianpa hi Missionary a ni a, keini ang bawk a mihring a nih avangin harsatna tam tak a tawng ve tawh thin tih chu ka hria. Mahse, tun ang em em-a a hlim lo hmel hi ka la tawng ngai lo! A meng dul ruih leh a sam bua chuatte chu hmuh hmaihsak tum mahila, a chetdan chuan engkim a sawi vek si. Ka khum-a a thut hnu chuan a bialnu nena an chanchin chu min hrilh ta a.

Zanlai au aw

A lo tlai leh tawh hle mai (a hma ti ila a dik zawk mai thei), rilru a kal ding leh ta ngut ngut mai.

Thla chu a chanve chauhin a eng a nih khi, a bula arsi de chiaite khian a mawina an hliah lo. An vai khian an mawi vek zawk.

Thlang lama ui bauh lauh lauh chuan eng emaw hmuh a nei a, kei erawh chuan eng emaw hmuh loh ka nei a ni chek ang, ka ngui nghiai ni. Thiante chu la mu lo ngat se zawng, ka ri bur but ngei ang, mahse, tawnmangah enge an tawn pawh kan hriatpui si lova, tihbuai ngawt a tha si lo.

Piang lo zawk se....tia ka dawn changin 'khang hlimna tam tak kha tu hnen atangin nge ka hmuh chuan ang?' tih chu keimaha zawhna awm a ni si!!!

Nichin lawka Counter Strike Source ka khelh laite kha a la rei loh teh lul nen...a rei ta hle mai.
"Min kalsan tawh suh aw" ka bengah a la ri nawn tluk tluk mai. Nia, kei chuan ka kalsan lovang che.

Hmangaihtu aw

Hmanah chuan maw…
Nu leh pa thlazar hnuaiah kan nui bawk bawk a, hlimna leh lawmnate chu kan ta ni bik hliah hliah hian kan hre thin. Rualpuite nen kan infiam a, kan inhnial a, kan insual bawk thin. Kan duhzawng leh chak zawngte kan sawi a, ‘Ka len hun chuan chumi khami chu ka ni ang a, chuti ang chuan ka awm ang,’ tiin duhthu kan sam thin. Khang hunte kha nunhlui mai an chang zo ta.
Thil inthlak chu…
Ka la hre reng, “Ka len hun chuan Lawng sipaiah ka tang ang a,” tia ka sawi ve lai kha. Ni a liam a, kum a vei zak zak hnu chuan ka nih tum chu ni thei mai dinhmunah ka ding ta reng mai!!! Interview hmachhawn tura kohna ka lehkha te chu ka keng a, beiseina nen ram thim lam chu ka pan ve ta.

Tawnmang - II

( Tawnmang - II kan tih ringawt chhan chu, Synod Higher Secondary School-a kan kal lai khan Tawnmang - I hmangin Udayee te, Ali te nen 'Needo' spaceship hmangin vanthengreng kan lo han fang tawh a. Tunah a pahnihna ka rawn dah a ni e. )

Nuai tam tak senga ka zir, ka zir chhuah tak lovah chuan mahni khaw lam pan turin ka puanthuah chu ka tel a, chak lovin thih hreh takin hreh mahila tihngaihna dang a awm si lo - tlanbo mai loh chu. Chu lah chu ka ngam der mai si lo, kei mi dawizep hian.

A hun chu a lo thleng ta. Sahuai ni do ni awm tak hian lei lam ka melh deuh reng a, rilruah inthiamna reng ka nei lo.A hmaa min lo hmuah dan nen chuan a dang ngei mai. Exam zawh chawlh ka haw thin lai kha chuan hlim tak khan min lo hmuak a ni thin a, tunah erawh nui hmel reng hmuh tur a awm ta lo. Ka pa hmelah beidawnna ka hmu a, ka nu hmelah erawh khwngaihna kara lungawilohna ka hmu thung. Ka u erawh chuan tawngkam na tak tak hmangin min chhaih a, chhan ngaihna reng ka hre lo. Ka khawvel chu thimin hrehawm hle mahse beiseina nei lo chu ka ni lo. Chu ka beiseina chu ka naute pahnih an ni.

5ive Types of Love

            Hmangaihna hi eng nge? Chhang thei kan awm chuan kan chhan dan chu keimahni ngei pawhin a kan awih loh leh turte a nih ka ring. Hetiang khawp a thil ropui Hmangaihna hi enge a nih i lo en dawn teh ang. Eng nge hriat a har rual rual hian kan mifingte chuan chi hrang hrang pangaah an lo then a. A mal te tein i lo thlir teh ang.

           1. Agape (ἀγάπη agápē): Hei hi Pathian leh mihring inkara hmangaihna sawi nana hman thin a ni.
Chanchintha Johana ziak, bung 3 chang 16-ah chuan heti hian kan hmu a. "Pathianin khawvel a hmangaih em em a, chuti chuan a fapa mal neihchhun a pe a, Amah chu, tupawh a ring apiang an boral loh a, chatuana nunna an neih zawk nan. {For God so loved the world that he gave his one and only Son, that whoever believes in him shall not perish but have eternal life}". tiin.Hei hi hmangaihna a ni. Chatuan a hremna kan tawrh chu phal lo vin a fapa mal neih chhun chu min pe a. Chu chu hmangaihna a ni.

            2. Eros (ἔρως érōs): Hei hi Romantic Love an ti thin a, nula leh tlangval inkara hmangaihna a ni.

Alpha And Omega

            Ka kianga mu kan nu chu ka en a, thosi sehna a inhiah neuh neuh paha a rizai sin a siam that mawlh mawlh pawh chu ka hmuh hmaih lo. A hmel mawi takte chu thlir nin tik a awm thei dawn si lo. Rilruin nunhlui a chhui kir a, taksa erawh a chau zo tawh si. Hmangaihna hi chu a lo va han mak tak em!!!

            Kan nu nen chuan kan inneih hma pawhin thil tam tak kan inhrilh thin a, thil engmah zep kan nei ngai lo. A bula ka hlim theihzia a hriat tlukin ani pawh a hlim thin tih ka hria a. Amah atang hian hmangaih hmasa ber hlutzia leh an pawimawhzia ka hriatchhuah phah si. Chung zawng zawng chu a mit meng mawi takte chuan a thup zo si lo, tawngkain sawi chhuak lo mahse hai rual a ni si lo. A hmangaih hmasa ber nena an intawn dan zawng zawng pawh hriatpuitu leh an harsatna pawh sut kianpui theitu ka ni hi ka lawm a, he ka lawmna hian van khi tawng lo mahse a chen hial ta ve ang.

          Chu pa nena an inhmuh hmasak ber ni pawh chu ka la hria asin. Class XI an zirlai a ni a, an aia pawl khata sang a ni tih pawh ka hria. Exam lai a ni a, midang zawng zawng an zawh sup sup a, an chhuah suau suau tawh hnu pawh chuan an pahnih chuan an la ziak ta char char a, zirtirtuin theh lut tura a tih hnua an theh luh dante, haw kawng a an haw rual zel dante leh chumi hnua an inkar a thil mak tak lo awm te, ni khat lek pawh inhmu lova awm harsa an tih dan pawh ka hria asin.

            A tal surh surh chu ka va en leh a, ‘I va meng rei ve, harsatna i nei em ni?’ a tih a, ka neih loh thu ka hrilh hnu chuan a mu ve leh ta mai a. Mut pawh tum chuang lo chuan a hmangaih hmasa ber chanchin chu ka ngaihtuah leh ta zawk a.

A letter to Juliet

               He lehkhathawn hi Shillong ka kal hmasak ber July ni 26, 2010 a ka chhar a ni a, ruahsur cherh cherh laia ka riltam lutuk eitur zawngin Fire Brigade Office bula ka chhar a ni. Khasi tawng a inziak a nih avangin ka hrethiam lova, tuma hnena hrilh lovin thla ruk chhung Khasi tawng chu ka zir a, kum khat a liam hnu leh ka thiam duh chin thiam tawh nia ka inhriat hnuah ka rawn dahchhuak ta a ni. A chhunga Contact Address zawng zawng chu thup a that zawnk ka rin avangin ka tarlang ta lo a, a nihna ang ka let chhuak zo lo a nih pawhin lehkhathawn neitu hian min hriatthiam ngei ka beisei.

Thian Duhtak,

Tunge i nih ka hre lova, amaherawh chu he lehkhathawn hi i lo hmu a nih chuan ka harsatna chu i hrethiam mai ang a, min puih theih ngei ka beisei.

Ka hmangaih tak nen chuan hlim takin kan awm thin niin ka hria a, a hlimna thlentu nia ka inhriat avang hian ka lawm em em thin. Kan pahnih hian kan induh tawn em em thin a, mahse sulhnu kan ngah dun em avang chuan harsatna kan tawk leh zeuh zeuh thin. Hun rei tak chhung chu kan inzui tawh a, a bulah chuan ka hlim em em thin a, a tello a awm chu ka zuam lo a ni. Amah chu kan khua a awm a ni a, kei chu thingtlang hmuna awm ka ni. Chakkhai lama ka tlawh chang hian kan inhmu thin a, kan hlim dun thei hle thin. Mahse hmanni lawka ka zin leh chuan thil a lo danglam ta hle mai, a mak ka ti lutuk. A hmelah a lang reng si, a chetzia zawng zawngte chuan chu chu an tilang a, theih tawpa thup a tumnate pawh chu ka hmuh hmaih lo. A bialnu hmasa chuan thil tam tak a hriatchhuahtir thin a, chung zawng zawng chu ka hmuh hmaih thei bik si lo. Ka bulah chuan hlimna chanve in a hlim a, hlimna tak pe theitu erawh amah chu a ni si. Amah hi ka hmangaih a, a tan chuan ka rinawm reng thin. Ka sulhnute chuan min tibuai lo mahse ani chuan buaina a tawk a, amah chu a hmangaih vang a nih ka ring. Kei pawh amah hian min tihbuai ka ring a, chuvang chuan ngaihdan pawh ka siam thiam lo, engtia tih chi nge ka hre lova, amah ka kalsan dawn nge hetiang zawng zawng hre chung hian ka la vuan reng ang. Min pui hram teh, awmdan tur pawh ka hre tawh lo.Vawiin tlai hian kan khuaah ka haw dawn a, a rang lama min puih theih chuan ka lawm ngawt ang.

I chhanna ka lo nghak reng e

I thian,

XXX

xxxxxxxxx@gmail.com

           Tunah a thu awmzia ka hriat hnu pawhin a chhan dan tur ka la pe thiam lova, a chhar tur lovin ka chhar avangin pawi ka ti, a pawn a Letter To Juliet tih inziak ka hmuh avang chuan ka hre chak lutuk a, tunah a tlai nge hma sawi lovin ka chhan let ka tum a. Chhan dan tura min puih theih chuan ka lawm ngawt ang.

A phek bo chu

                    Kar khat meuh ka cham chuan ka haw a lo hun ve ta reng mai a. Rilruah thil tam tak awm mahse lungte pawh a leng ve lek lek a ni. ‘I haw hmain ka Note Book-ah thil ziak ve la, i thang chhung zawnga ka lo chhiar a, nang ka ngaih zual chang apianga ka chhiar tur’ ti a min sawmna chu hreh tak chung chuan ka chhang ta a. Thil awmdan dik tak ka ziak vek ang a, a nih nih ka ni mai ang tiin a lehkhabu chu ka laksak ta a.

A nuamin a danglam hle  mai, hetiang hun hlimawm hi ka hman leh kher pawh ka ring lo. I kianga ka awm chuan ka hlim asin. Theih nise kumtluang a tu dang ngai lova lendun ka va chak tak em!!! Nia, tumah dang ngai lova len chu ka chak a ni, chu chu thil awmdan a ni si lo. I nui hmel mawi tak phen a i thinlung ngui kha ka hmu thei a sin. Mahse ka dem lo che, amah ka ni tlat si lo, amah i Lungdumtua chu. I kianga rei lo te ka awm chhung pawh hian thil tam tak ka hmu a, ka rilru chu a na ve thin a sin. Mahse ka hmangaih em che avangin pai dam hram hram ka tum thin a, mahse thil awmdanin a zir si lo. Nimin a i thiante ina kan kal a ka lehkhabu hawn ka pek che a, a phek hmasa ber i en a, I thil zuk bih kha ka hria asin. December a nih kha i en ni

Never Alone

              ATM kawtah chuan kan thian thum chuan kan ding thap mai a, ruah a sur nasat em avang chuan che chhuah chu peih awm lo tak a ni. Rajpur kan kal dawn em ni tia ka zawh chuan enge tih tur awm min zawt a. Ka hrilh kim vek hnu chuan kan pakhat zawk chuan min hawsan a, kan thiandun chuan kan kal ta a. Hemi ni hi September 5, 2010 a ni a, ka la hre reng.Kan tih tur kan tih hnu chuan rui mang kheng chuan Mizo in luahte kan tlawh a, hetah hian ka thianpa chuan min peih loh san a, keimahin ka haw ta a.
              Ni thum liam hnu September ni 8 chuan kan kohhran buatsaih Youth Retreat chu kan kal ve a, ni thum awh tur a duan a nih avangin kan riak chhuak a. North East atanga Kristian zirlai tam tak chu kan kal a, a zan hmasa ber hian a ni he thil hi a lo thlen ni. Mizo chu mipa deuh vek kan ni a, kan Missionary pathum zinga pakhat chauh chu hmeichhia a ni a, a dang zawng mi panga, Missionary tiamin chu Mizo awm chhun chu kan ni mai. Ka thianpa nen chuan inchung awih, glaze tile a siam ah chuan kan thu a, he hla nalh tak mai hi ka hmangaih ka then tak chuan ngaithla turin min rawn ti a.

Di loh Di

February thla a in tan meuh chuan kan khua Champhai chu a vawt tawh hle a, kan veng Vengsang-a  naupangte chuan Krismas boruak an kham lohziate, sikul luh an chak lohziate chu hahipin an sawi laih laih a, Krismas an hman dan an sawikhawm lai chuan an nui leh hak hak zel  a. A then lah an hman dan zir loh avanga ke tuam bur chung chuan thiante titi karah chuan an lo nui ve vur vur a. Thu dang vawrh teh mahse mathei lovin sikul tan chungchangah an tawp leh nge nge thin. GMHSS-ah hian kum thum vel  chu ka thawk ve ta reng mai a, zirtirtu kan innelin kan inpawh em em a. Thawhpuite intithiamlo an awm ngai meuh lo. Kan sikul pawh chu February 10 a tan tur a ni a, kum dang ang bawkin zirlai chu kan thahnem leh hle ang tih chu a rin theih a. A nihna takah chuan kei ngei pawh chuan chawlh chu ka kham lo tak zet a ni.

Sikul tanni a lo thlen chuan sikul naupang hmel duhawm tak tak te chu phur hmel tak hian an lo kal sang sang a. Hmuh an nuamin mit an titlai hle mai. A ni khatna a nih avang chuan lehkha pawh zir mumal lovin sikul hmunhma hnawkte tifaitein leh pawl siam remtein hun kan hmang a. Hmingte kan lam hnu chuan kan bang ve ta a.

Chawlhkar khat a liam hnu chuan naupang tharte pawh chu an thian chhar tharte nen chuan an infiam ve nak nak tawh a. Class lak laia lo bengchheng tawkte pawh an awm leh ta. Sikul naupang tam zawk chuan nuam an tiin an hlim a. Mahse lut thar zingah chuan nuam tihmel pu lo leh thiante be vak lem lo hi a awm ve a, a hmel chu a tha reuh kher mai. A thiante ka zawh chuan mahni a awm hi nuam a ti zawk a an ti mai zel a. Amah chu ka zah deuh avang chuan ka be mai ngam lo.  Thuneitute lam atanga ka hriat dan chuan amah chu Bethel veng lam mi a lo ni a, pawl sawm thleng Aizawl lama a zir zawh hnu chuan chhungkaw harsatna avang chuan a lo haw a lo ni a. A hmel chuan khawngaihthla a la reuh ngei mai. Tlangnel taka a awm theih nan tiin ka class-ah chuan thilte ka zawt fo a, mak ang reng takin tah takin a chhang thei zel a, harsa tih hmel pawh a pu hran lo.

Thla hnih thum vel a liam hnu chuan kan innel ta khawp mai a, chhun chawlh laite chuan fiamthute thawhin kan nui dun thin a. Midang bulah pawh a tlangnel chho ve zel a, amaherawh chu midang kan kawm tam em em lo. Kei lah ka thawhpuite chu kum lama ka kawm phak lohte an ni hlawm a, ka nu ka pa tih rual bula awm ai chuan a bula awm chu ka thlang zawk si. Hunte  a lo kal zel a, kan innelna chuan zual lam a pan zel a, a tawpah phei chuan thil mak tak a thleng ta tlat mai. Class-ah te chuan ka melh tha ngam ta hlek lo mai a, amah chu ka zah ru deuh tlat thin. Zan lamah mahni awm ka nih avangin ka khua a har fo a, chutiang hunah pawh chuan ka rilru-ah a lo awm leh thin a. Mahse zirtirtuin mahni zirlaite han ngaihzawn chu thil mawi a ka hriat loh avangin thup ka tum hram hram a, midang bulah chuan thup thei viau thin mah ila, a kiangah chuan ka lo tilang leh thin.

Zan khat chu Sangtei chuan a rawn call a, a nambar ka neih loh avang chuan tu tih ka hre mai lo. A thusawi danah chuan a zam hle tih a hriat a, chutiang zan rei tawh lama a rawn bia chu mak ak tih em avang chuan ka zawt ta ringawt a. Sangtei min chhan dan chuan mi va thawng tak em!!

“Sir, zanin chu ka mu thei lo reng reng, ka rilru hi a hah nge pawh ka hre lo, sikula kan inkawm laite ka mitthlaah a lo lang a, kha tiang kha ni reng se ka chak ngawt mai. A mak lutuk, i bula awm hi ka chak reng mawle”

Leh mai rawh

“…ky pon k gai ce lom..el..hun harsa  takh po kn inpui jel donny o..i kiaga hlm tka om k va cak to tak…;) mizz u..gud nit n tc…”

              Ka biangah chuan mittui a lo luang tiam tiam a, ka chhiar zo thei lo. Ka phone chu ka dah a, tlem la bang ka in hnu chuan mut zai ka rel leh ta a.

              Thla eng chuan ka pindan chu a chhun eng ruih mai a, mutthilh a har ngei mai. Mitthlaah nunhlui liam hnu te a lo lang uar uar a, koh kir theih an chang tawh si lo. Hun chuan kan nundante chu liampui mahse sik leh sa inthlakin a thlak danglam ve tawh loh tur hmangaihna chu ka hlan tawh si. A tel lo chuan ka tlei lo va. A ni, D, I tel lo chuan ka tlei lova, ka ngai ngawih ngawih che asin. Mahse chung zawng zawng hai der chuan min liamsan ta si. Kan hlimlai nite kha dawn kir ve la chuan maw..aw..dawn kir ve hian i mawi tawh  si lo.

             Ka pindan kawngkhar chu dimtein ka hawng a, in chung zawl lamah chuan ka insawn chho ta a. A thianga kan lawm thin van dumpawl ruih te leh chhawrthlapui te, siar eng mawi tak te chuan a ngai tein an mawi an lo la chhuah si. A mak khawp mai, lung leng reng reng chuan sulhnu an chhui ngei ngei an tih hi a lo dik a ni ang.  Rilruin nunhlui a chhui kir a, mitthlaan a lo lang zut zut mai si.

Nu hmangaihna

Ka nu hmangaihna aw nem chu
Theihnghilhni reng ka nei dawn lo
Ka tan a tawngtainate chuan
Thlifim angin min rawn chhem thin

Hun te ni te lo ral mahse
Ka hriat rengna a chuai chuang lo
Ka nu ka nu duh tak mai chu
Ka tan a tawngtai thin tih ka hria

Bawihte min vah vaihsan mah la
Ka tawngtaina tal hre reng rawh

He hla hi a thu khi a dik famkim tawh lo mai thei a, Primary Department kan nih laia mi sak, Kohhran thiltihna a mi sak ka ngaihthlak ka hriat lai lai ka rawn thai lang mai a ni. Ka nu, hmangaih taka min chawi lian tu, tuna natna khuma mu mek tan, ka hmangaihna nen ka hlan e.
Ka nu, ka tana i tawngtaina ka hre reng ang.

Lalsangzuali-Ka nu hmangaihna