Apr 8, 2011

A phek bo chu

                    Kar khat meuh ka cham chuan ka haw a lo hun ve ta reng mai a. Rilruah thil tam tak awm mahse lungte pawh a leng ve lek lek a ni. ‘I haw hmain ka Note Book-ah thil ziak ve la, i thang chhung zawnga ka lo chhiar a, nang ka ngaih zual chang apianga ka chhiar tur’ ti a min sawmna chu hreh tak chung chuan ka chhang ta a. Thil awmdan dik tak ka ziak vek ang a, a nih nih ka ni mai ang tiin a lehkhabu chu ka laksak ta a.


A nuamin a danglam hle  mai, hetiang hun hlimawm hi ka hman leh kher pawh ka ring lo. I kianga ka awm chuan ka hlim asin. Theih nise kumtluang a tu dang ngai lova lendun ka va chak tak em!!! Nia, tumah dang ngai lova len chu ka chak a ni, chu chu thil awmdan a ni si lo. I nui hmel mawi tak phen a i thinlung ngui kha ka hmu thei a sin. Mahse ka dem lo che, amah ka ni tlat si lo, amah i Lungdumtua chu. I kianga rei lo te ka awm chhung pawh hian thil tam tak ka hmu a, ka rilru chu a na ve thin a sin. Mahse ka hmangaih em che avangin pai dam hram hram ka tum thin a, mahse thil awmdanin a zir si lo. Nimin a i thiante ina kan kal a ka lehkhabu hawn ka pek che a, a phek hmasa ber i en a, I thil zuk bih kha ka hria asin. December a nih kha i en ni
, nang chu September i ni a, kei lah April, chuan maw, Bass Hunter hre lo rual ka ni lo tih ka hrilh duh bawk che a, heng bakah hian thil tam tak ka la hria asin. Mahse  keimahah hrehawmna min thlen zel avangin ka tarlang lo mai ang e, nangman i hriat vek kha. Tuna kan hlimna aia hlimna nasa zawk hi kan la nei thei ve ve tih a chiang a, nang pawhin  i hriat ka ring. Chumi zawnga  ka ke ka pen a nih pawhin min hrethiam hram hram dawn nia aw, ka duh bik reng vanga kalah min ngai a nih pawhin ka dem bik lo ang che, hmangaihna hi chu hriatthiam a har em a tin ni. Ka laka i rilru put hmang chu ka hre thei a, mahse mi zawng zawng duhthusam, ‘ber’ nih chu ka thlahlel lo bik si lo. I kianga ka awm chhungin vuina ka nei lova, hlimna nasa tak min pek avangin ka lawm tak zet a ni. A sei ta hle mai, he thuziak hi i hmuh hun chuan mak i ti mai thei a, mahse min hrethiam hram hram dawn nia, hriatthiamna i ngah thin kha. I tan leh ka tan pawh a tha zawk ngei ang, i lungdumtu chu va bel ta la, damten fanau maltluan va chawi nang che, harsatna leh lungngaihna i tawh changten min han hrilh hreh lo la, hmana i thian kha thuan pawh i thian ka la ni reng tih kha i hre reng dawn nia. I lungngaih lai leh i hrehawm lai ber pawh a i kianga awm reng tur i thian ka ni reng ang. He thuziak hi en huna i hrilhhai viau pawhin ka dem lo che, min ngaidam hram dawn nia.
 
-El

Ka en a, ka en nawn leh a, hrehawm duh ngei  mai, tih ngei chu thain ka hre si. A tawpah chuan ka ngam tak ngang loh avang chuan ka pawt thla a, ziak tur ka hre lo reng reng ka va ti a, i duh duh ziak rawh ho lutuk, i ziak ve hrim hrim kha ka duh a lawm a tih hnu chuan thu fahrah te te chuan phek chanve chu ka ziak sak a. Ka thilziak chu ka en leh a, ka dah tha a, ‘Min ngaidam dawn nia’ ka ti sup a, ka mu ve ta a.