Kawmthlang lui

                  Tlang sang tak leh thawveng tak hmunah chuan ka khawvel chu ka hmang tan a, chumi hmuna thingkung lian tak tak thlazar hnuaiah chuan a thei ber ni awm takin ka lo sei lian a, ka hma lam harsatna lo thleng tur reng ka dawn ngai lo. Kan thlahtute lo tih thin dante chu hre reng chuan hma lam panin ka kal ve bek bek a, thiante thlazar hnuaiah chuan nghei bik lo chuan ka awm ve thin a, khang ka thiante kha engtikah tak tawng leh ang i maw?
                  Thing delh loh lung delh loh na fam chu hma lam pan chuan ka kal ve zel a, ka tum Rammawi chu ka thlen ngei theih nan chuan a beih a beih a lo tul ve tan ta, lung khawk rawk hmunte leh tui khawh thlate, thal khawro lai ber pawh a nun khaw chhuah tum chu ka tih makmawh a ni tih chu ka hai bik lo. Lengkir sang tak tak ka hma chhawn lai te chuan ka hringnun chu ka ning a, hrehawm tiin ka kun ve tlawk tlawk thin. Mahse, he khawvela ka hna pui ber chu ka tih hlawhtlin loh chuan tumahin min tihsak dawn lo tih ka chiang em em a, chu avang chauh chuan tiam chin lam pan chuan ka kal tauh tauh thin a ni.

Hun chuan ka nun chu a hril tel tlat tih chu ka hria a, kum tam a vei hma chuan chauhna nasa tak ka tawng ve ta, ka hringnunah chuan thilnung mak tak ka tawng a, chung ho chuan an thil chhia tinreng chu keimahah min bel a, ka mamawh loh tam tak chu ka inbel a lo tul ta, chung hun ka thlen chuan ka beiseina hi a chau em em a, theih nise chuan tlang sang lama kir leh chu ka chak vawng vawng thin a, mahse chu chu ka hringnuna thil theih loh a ni tih ka hriat chian em avang chuan ka tuar hram hram thin a. Kan thlahtute lo tih thin dan, kan hmaa mi huai kal tate tih thin dan a nih avang tal pawh chuan tlawm mai ka duh lo a, tlawmah ka lak tlat avang chuan ka bei tauh tauh reng a ni. Ka hma lama Rammawi chu ka mitthla a, chu fan ngai loh ram chu ka thlakhlehna a zual a, chu chuan chakna min pe a, ka nun khaw ro tak chu sihtui ianga hik chuan a chawm a. Chuti ni lo se ka hringnun hian mi tam tak angin chhui tur a nei lo ngei ang. Mite tana tangkai tak nih leh mi tana hlimna nih chu ka chak ber a nih avang chuan thil pawimawh a min hman leh min koh chuan lawm takin ka kal a, harsatna min siamsakte hre map lova ka hna ka thawhsak lah a tam ngang mai.
                  Ka lo kal zel a, hlimna thlentu ka ni ve ta, keimah avang chuan mipa naupang chu an rak chel chul a, sikul chawlhni a naupang rawn kal nak nak ri ka hriat te hian lawman min thlen bik lo asin. Ka khawvel chu a lo zau zel a, mi hrang laka harsatna ka tawhte chu kiang mahse ka thiante ngei chu ka hmelma an lo ni ta. He tih hun hi mahni infiahna leh tan lak ngaih hun lai tak a ni tih kan thlahtute min hrilh chu ka vawng reng a, hmun dang atanga min rawn fintute nen chuan indona thianghlim kan puan a lo tul ta. Mahni nihna vawng tlat tum kan nih theuh avang chuan thil a harsa ngei mai. Tui nu bet but kan tawh chang a awm a, chung hun pawh a ding chang thei tur chuan chakna a ngai tih chu hai rual a ni lo. Vawi tam tak tih nghin ka ni a, ka tlu a, mahse tluk hlen ka tum ngai lo. Chu ka hmelma beilet tur chuan ka chakna zawng zawng sawm khawmin ka ding leh thin a, tlu fovin a chak lo zawkah vawi tam tak tang thin mahila, ka tlawm loh chuan hnehna changtu a ni bik lo tih ka hriat avang chuan ka ding hram hram thin. Heng harsatna ka tawh lai pawh hian min thlahtute pawh chuan he ka hrehawm tawh ang, hei aia nasa mah chu an tawk ve ang tih ka ting tlat a, chu chu ka inhnemna tha ber a la ni ta reng anih hi.
                     Leilet hmun nuam tak ka tawh lai te chuan hlimna namenin ka hlim lo a, naupang tui cheng ri hriat te kha nuam ka la ti reng thin. Ramngaw hnawng chirh cherh ka kal lai te, zan thim leh chhun nisa te, lui kawr thuk tak tak te leh leng kir sang tak tak te, ruahpui vanawn sur lai pawh a bikbona hmun ka neih loh avang chuan ka hma lam chu huai tak chuan ka pan a.Hlau leh khur chunga ka pen hram hram thinna chuan engtik niah emaw chuan rah tha tak min la pek ka beisei tlat a ni. Ka that lai leh vanglai hunte chu lo liam ta mahse, ka hma lama Rammawi tak chu ka hmu ta ruai ruai a, chu hmun thleng tur chuan hun tlemte chauh ka mamawh tawh tih ka hria a, ka theih tawk ka chhuah leh chuan ka tum ram chu ka thleng dawn tih ka chiang a, chu lam pan chuan ka kal mek zel a ni e.