Aug 4, 2011

Tawnmang - II

( Tawnmang - II kan tih ringawt chhan chu, Synod Higher Secondary School-a kan kal lai khan Tawnmang - I hmangin Udayee te, Ali te nen 'Needo' spaceship hmangin vanthengreng kan lo han fang tawh a. Tunah a pahnihna ka rawn dah a ni e. )

Nuai tam tak senga ka zir, ka zir chhuah tak lovah chuan mahni khaw lam pan turin ka puanthuah chu ka tel a, chak lovin thih hreh takin hreh mahila tihngaihna dang a awm si lo - tlanbo mai loh chu. Chu lah chu ka ngam der mai si lo, kei mi dawizep hian.

A hun chu a lo thleng ta. Sahuai ni do ni awm tak hian lei lam ka melh deuh reng a, rilruah inthiamna reng ka nei lo.A hmaa min lo hmuah dan nen chuan a dang ngei mai. Exam zawh chawlh ka haw thin lai kha chuan hlim tak khan min lo hmuak a ni thin a, tunah erawh nui hmel reng hmuh tur a awm ta lo. Ka pa hmelah beidawnna ka hmu a, ka nu hmelah erawh khwngaihna kara lungawilohna ka hmu thung. Ka u erawh chuan tawngkam na tak tak hmangin min chhaih a, chhan ngaihna reng ka hre lo. Ka khawvel chu thimin hrehawm hle mahse beiseina nei lo chu ka ni lo. Chu ka beiseina chu ka naute pahnih an ni.


Kan unau thum chuan kan thu a, ka nau chiah chu ka hmaaha thu a. Kan naupang ber nen kan thu dun a. Kan hmaa leilawnah chuan mipui chu an tei suau suau a, engmah tih chakna reng ka nei lo. Ka u min tihdan ka ngaih tuah leh aw rawl ring tak taka min biak lai chuan nuam chena phaia kan zirlaite min hriatchhuahtir a, inchhir a sawt tawh si lo. Kan naupang ber chu ka va en a, mi a khawngaih avanga a bianga mittui luang thla ngiai ngiai chu ka va hmu a. Rang taka a hruk hul pah chuan a rawn tawlh hnai a, sawi tur nei niawm tak hian a ka a ang a, mahse engmah a sawi thei lo. Keimah chuan ka va be hmasa ta a.

"I lo va lian tawh ve a, tunah chuan ka chen tawh lo che a nih hi."

"I rawn haw hnuhnung ber pawh khan kan intiat reng tawh kha. Kei chu ka nula tawh alawm." Nui sen sen chung hian a rawn ti a.

Ka chhan let mai loh avang chuan a rawn tawng chhuak leh a.
" In thiam lo duh mah ta che, phaiah vai karah in awm a, mahni in lum pawh luah lovin in awm a, in tan chuan thil hi a nih ang a kal rempui a har a lawm." Ka nau sawi mah nise tha ka va ti teh reng em!!

Ka mittui far chu ka thup hram hram a, ka tana tha lo til tam tak ka lo tih thinte ka ngaihtuah let a. Mahni chhungkaw dinhmun ngaihtuah lo lek a zirna aia hlimhlawp thil ka lo ngaihtuah thin chu a pawi ka ti em em a. Siam that theih a ni tawh si lo. Tlai ni tlak ruala kan in thleng tur chuan kan unau thum chuan kan inkai haw leh ta a.

Ka phone ri tet tet chuan min tiharh a, ka pa chu lo niin. Rang takin ka la a, ka mamawh thil an rawn thawn thu min hrilh zawh chuan thlamuang tak chuan class kal turin ka insiam ta a.