Pathianin kan thatna turin engkim a thawk thin

Based on a True Story

Delhi khaw lum uap churh chu chhuahsan tum ni awm tak chuan hmanhmawh takin Auto chu ka la a, ka thiannu in luahna lam chu ka pan ta a. Ka thiannu chuan nghakhlel tih hriat tak chuan min lo hmuak a, kan hmelah hian kan sawi tur chu hmuh theih ni se zawng; harsatna kan tawk mek a ni tih kan hre thei tur.
Chaw kan ei khama thut khawmuan pah chuan bathlarah chuan kan thu a, kan hun tawnte leh kan thil tih thinte kan sawi zel a. Lamna hmuna a kal chak leh chak loh ka zawha min chhan dan chuan min va thawng tak em!!

"Kum li vel liam ta kha a ni a, chu chu Delhi-a ka awm tirh a ni. Kan tawhna Hotel-a kan Manager (Nula) chuan kei leh ka thian pali vel chu lamna hmuna kalpuiah min sawm a, chinchang engmah hre lo kei leh ka thiante chuan engtin nge lamna chu a awm tih hriat nan tiin kan kal ve tur thu chuan kan chhang ta a.

"Ka thian pahnih nen chuan bang nghengin kan ding a, kan pi leh a thiannu lam chu kan en reng a. Lamna an khar dawn thlenga kan awm hnu chuan haw dan tur kan ngaihtuah ta a. Tlangval pakhat hmelchhe lem lo tak chuan min thlah a hreh loh thu a sawi lai chuan kan pi chuan midang min sawm ve tho chu a tha zawk e, hepa hi inthlah tir ang a ti a, a motor-ah chuan kan lut ta a.



"Motor chhungah chuan hla chu an la play ri dup dup a, kan pite pawh chu an la lam pah reng a, nakinah chuan kan motor chu a tang a, a chhuah mai theih loh avang chuan min thlahtu chuan 'Saw laiah sawn ka thiante an awm a, kan va pun mai dawn em ni?' ti a min zawh chuan kan pi chuan tawnhriat ngah tih takah a lo hrethiam nasa mai a. 'Hei kan rui si a, nangmahin va kal la motor-ah hian kan lo awm mai ang' tiin a chhang a. Kawng kawia a liam chiah chuan kan pi chuan thil awmdante min hrilh a, rang taka bikbona zawn emaw, tlanchhiat a hun a tih chuan chak takin kan hma lama eng awm chu kan pan ta ringawt a. Kei leh ka thiannu chu kan tap pur a, eng awmna lah chu a hla bawk si. Eng lo lanna kan thlen chuan in te reuh te hi a lo awm a, awm erawh an awm lo. Kan hlauthawng em em a, kan awmna lah khawilai nge tih kan hre der si lo. A hnuah chuan motor ri kan hria a. Kan piin biru tura min tih ang chuan kawngsir hnimah chuan kan biru ta vek a.

"Bike-ah chuan mipa pahnih hi an lo chhuk a, in kawtah chuan an ding a, zawn an nei tih hriat tak hian an hawi kual vel ruai a. Kan ngaih chu a tha lo tlang tih a hriat reng mai, ka thiannu nen chuan kan inkuah a, kan la tap char char reng a, kan pi chuan 'Engpawh thleng se keiman ka tuar mai ang, hetah hian lo awm rawh u' a ti a. Mipa pahnihte chu a va pawh ta chawt a.Thil awmdan vela hrilh hnu chuan tlangval pahnih chuan kha pa kha an pu a nih thu leh mi fel a nih loh thu an sawi a, a theih ang anga puih an inhuam thu an sawi hnu chuan kan pi chuan min chhuak tur chuan min kova, thlamuanna kan la neih phah chuang lo.

"Tlangval pahnih sawi dan chuan chu lai hmun chu an pu ram  vek a ni a, Fairidabad ami a ni. An pu thu lo chuan luh leh chhuah chu phal loh tlat a ni. Chu lai ram zau takah chuan in panga, inhlat tak takaha awm a, mi tlawhpawh phal loh tlat a ni. Beiseina sang tak nei chung chuan kan chhuah dan tur chu kan ngaihtuah ta. Zing dar khat vel a ni tawh a, rilru chu a hah duh ngei mai. Kan pi chuan thlaha min sawmtu chu a va be ta ringawt a, ani chu Fairidabad lam a lo ni ve hlauh a, kan zui pa kha a mi hriat chian a nih thu leh a rilru hah lutuk chu a lo mu thei lo hi a lo ni a. Min rawn lam theih tur thu a sawi hnu chuan hungna pelhdan chu ngaihtuah a tul ta. Tlangval pakhat zawk a tul chuan a tawrh pawh kan tuar ve mai ang tiin a ngaihdan a rawn thawh a. Gate keeper hnenah chuan an pu motor a chhiat thu leh a thianpa a rawn kal dawn a va ti ang a, kan thianpa motor chu a lutin a chhuak thei mai dawn a. A sawi ang chuan kan thianpa motor chuan kan chhuak a, chu pa inah chuan kan riak a, hnaa kal ngai kan nih avangin zingkarah chuan kan haw ta a."

"Khang kan tawk kha ka tana tha tura Pathian ruatah ka ngai a, kha mi atang khan kal chakna ka nei leh ngai lo."

A sawi zawng pawh chuan a tawrhna chuan a tirilah a la tham tih a hriat theih a, a tana Pathian ruat a ni tih a pawm chu ka lawmpui em em a. Chutiang ni lovin khangte kha tawk ta lo se, tunah eng angin nge a awm ang tih kan hre si lova.