Leh mai rawh

“…ky pon k gai ce lom..el..hun harsa  takh po kn inpui jel donny o..i kiaga hlm tka om k va cak to tak…;) mizz u..gud nit n tc…”

              Ka biangah chuan mittui a lo luang tiam tiam a, ka chhiar zo thei lo. Ka phone chu ka dah a, tlem la bang ka in hnu chuan mut zai ka rel leh ta a.

              Thla eng chuan ka pindan chu a chhun eng ruih mai a, mutthilh a har ngei mai. Mitthlaah nunhlui liam hnu te a lo lang uar uar a, koh kir theih an chang tawh si lo. Hun chuan kan nundante chu liampui mahse sik leh sa inthlakin a thlak danglam ve tawh loh tur hmangaihna chu ka hlan tawh si. A tel lo chuan ka tlei lo va. A ni, D, I tel lo chuan ka tlei lova, ka ngai ngawih ngawih che asin. Mahse chung zawng zawng hai der chuan min liamsan ta si. Kan hlimlai nite kha dawn kir ve la chuan maw..aw..dawn kir ve hian i mawi tawh  si lo.

             Ka pindan kawngkhar chu dimtein ka hawng a, in chung zawl lamah chuan ka insawn chho ta a. A thianga kan lawm thin van dumpawl ruih te leh chhawrthlapui te, siar eng mawi tak te chuan a ngai tein an mawi an lo la chhuah si. A mak khawp mai, lung leng reng reng chuan sulhnu an chhui ngei ngei an tih hi a lo dik a ni ang.  Rilruin nunhlui a chhui kir a, mitthlaan a lo lang zut zut mai si.

Tlai khat thim hnua Zarkawt kawna Taxi kan nghak,  kan hmuh mai thei si lo kan nin si lohziate, nui sen sen chunga kan infiam lai te, High School Sport laia chhun nisa hnuai a, ka inkhel tur pawh tlai lek lek khawp a Field thlang thingbuk hnuaia inthlahlel taka kan thut dun lai te, Damdawiin kawnga kan inzui lawp lawp lai te chu mitthlaah a lo lang a, tahna thlentu mai an chang zo ta si…

              Ka Ipod chu ka la chhuak a, ka benga ka hnawh tawt hnu chuan van lam thlir veng veng pahin hla ka ngaithla ta a…

“Suihlunglen changin ka dawn thin kan nunhlui

Chhawrthla eng mawi leh siar eng mawi zawng te khi

Ka suihlunglen tizualtu mai maw ni

Hmelma anka vanga kan sawi remsa biahthu D zawngte kha

Ral mai turan zawng ka phal lo kan hlimlai nite

Nang ang hmangaih reng ka tawng tawh lo

Leng dang tan zawng ka phal thei mawlh lo che

Nang ngai reng hian mahten ka vai ruai e

Lam ang lo let leh mai rawh

Chul thei hian ka ring lo I sakhmelmawi leh hlimthla zawngte

Kan sulhnu ka fang thin mahte awm khawhar changin

Lunglai a na khawi an tuan che maw

Leng dang tan zawng ka phal thei mawlh lo che

Nang ngai reng hian mahten ka vai ruai e

Lam ang lo let leh mai rawh….

Aw Bawihte……….”

Aw, he khawvelah hian ka va han mal tak em!! Leng dang zawng chu kawplai di nen hlimten an leng a, hlimna vawr tawp chu an hmaah chhawpin an awm si. Kei ve zawng, hetah, khawhar takin ka thu a ni si. Lungngaihna te leh tahna te hi ka ta an ni vek bik lo asin mawle…

              Chhawrthlapui kawla liam mai tur thlir chung chuan ka ngaithla nawn zel a.Thlang lam kawngpuiah chuan motor a tlan pheuh pheuh tih chu a hriat theih a, zan lungngaih thlak tak pawh chuan kian zai a rel tan ta. Ka in zawhna bur ka paih bo hnu chuan ka mut pindan lam chu ka pan leh ta a. Mitthlaa lo lang lung tileng nunhluite hre reng chung chuan ka lukham chuan ka lu ka khuh a. “Aw… Te,Leng dang tan chuan ka phal thei mawlh lo che a sin…. Lam ang lo let leh mai rawh” ti chung zel chuan chhin zai ka rel ve ta a.