Zo Blogosphere

             Vawiin chu ka hman ngei mai, Ambedkar Jayanti  a nih avangin kan Institution chu kan chawl leh pek a, a nuam ve mai mai thin hetiang chawlh awm hi. Kum 1891, April ni 14 khan Bhim Rao Ambedkar chuan a khawvel a lo hmang ve tan a, a hringnuna harsatna a tawh hrang hrangte chu kan sawi vek seng lo ang. Amah hi kan hriat theuh angin Chairman of The Constitution Drafting Committee a ni a. Tin, Law Minister a ni hmasa ber bawk a ni. Zirna lamah University of Mumbai atang te, Columbia University atang te, University of London atang te leh London School of Economics atang tein M.A., Ph.D., D.Sc., LL.D., D.LITT. leh BARRISTER-AT-LAW –te  a pawchhuak a. Bharat Ratna hialte pawh lo dawng tawh a ni. Nupui pahnih a neih hnu ah December ni 6, 1956 khan kum 65 mi niin mual min liamsan ta a. India chuan a chan ropui hle a ni.
             Thupui  lamah kan lut leh tawh ang a, chutianga chawlh kan neih takah chuan tiin ka Antivirus chu update tir turin kan venga Cyber Café-ah chuan ka kal a, rei pawh ka nghak lo, ka nin deuh avang chuan System chu la vein ka thu ve ta ran a. Facebook leh Twitter ninawm tak chu thlawh bosan chuan kan Mizo kutchhuak ngei mai blog (bawk??) hrang hrang chu ka en kual vel a. Thuziak thiam tak tak maiin duhtawka an ziak han chhiar chu a nuam duh ngei mai. Mi chi hrang hrang, kei ka ni inti chin (ka rin thu mai mai) chuan an duh dan leh an ngainat dan chuan an thu chu an han thluaithlum vel hmuh chuan mahni blog(bawk) chu a insih theih ngei mai. A thenin thlangsappui tawng ngei mai hmanga thu an han ziakte chu chhiar a man hla em em a, keini ve the lul chuan engtik khawtikah mah kan ziak ve thei awm si lo tiin ka inngaihtuah rauh rauh a.  Kan thiam ve hun chuan Spanish emaw, Français emaw a ziak an intihhmuh leh tawh ang a, ti tein ka nui tut tut a.
Thiam ve ila chuan ka ziak ve ngei ang a, khawvel zau zawka mite chuan an lo hriain an lo chhiar ang a. Nakin lawkah mi lar ka la ni mai tur…mahse kan thiam ve ngang si lo, tum buai ve lo mai ang tiin hmun dang chu ka tlawh kual leh ta zung zung a, thuzial ropui tak tak ka hmuh laite chuan ka rilru te tein tu emaw a hrechhuak a., rilru a thar leh thin si. Nia, kan hlim lai kha chuan  ‘Nakinah bawkte ka la siam ve ang a, ka kutziak zawng zawngte hi ka la dah ve ang a, a nuam ngawt ang….(so and so)…’mahse khang hun kha chu a liam tawh a, theihnghilh tawh rawh tiin ka infuih sauh sauh a. Bawk pakhatah chuan Collide ka hmu a, ka phu zawk mai, a ziak thiam ngang mai, a naupan laia morot nena an in-collide-nain bul a tan a, mahse a thupui collide chu ka tan a tawk reng si.  Blog Directory lam ka thlir leh a, mi hi an ti tha thin ngawt mai, mahse a aia tha chu kan mamawh hle tih pawh a chiang e. Bawk (blog) chu ka tlawh kual zel a, ka thil hmuh pakhat chu ka ril rem zawng tak mai hi  lo ni a. Chumi bawkah chuan Shout box hi an lo nei a, mahni tawng ngei mai a ziak ngam chu huaisenna a lawm an ti hi ka hmu a. Pawm a nuamin pai a hahthlak lo ngei mai, ka shout ve nghal ta pawp pawp a, ka thil chak thinte leh ka lo insit ruknate chu a lo kiang ta.
                Ka Antivirus kan update zawh hnu chuan ka hawng ve ta a, chhun lama ka thil hriat chuan ka rilruah a luah ta reng a, mi tam tak chuan mahni hnam tawng hnualsuatin hnamdang tawngtein an han ziak a (an vai chuan an ni vek lo), kei chuan ka hnam tawng ngei mai chu ka lo vahvaihpui in ka lo mualphopui chu a ni si. Mahse ka zak lova, chung mahni hnam tawng hnualtuattu ka ngaihsan bik lohzia te, an aia ka nep bik lohzia te leh a tu a pawhin kan theihna zawn theuh a kan kutchhuak chu a ropui ber a nih thute ka ngaihtuah chhuak ta zel a. Ka lo tum rilruk, ‘sappui tawng a ziak’ chu thulhin kan hnam tawng vawn nun zel nan ka theihna zawng zawng nen kan hnam  tawng, ‘Duhlian’ ngei mai hian chhunzawm zel mai teh ang ka ti ta a.