Muhil thawh a hun e

Nia, thalai muhilte thawh a hun tak zet ta. Zing ni chhuah ruala i thawh loh khan ka dem lo che a, in vawkpui chaw ngen ngek ruaih ruaih pawhin a tih harh zawh loh che avang pawh khan ka dem chuang lo che. I nu`n tukthuan ei tura a kaih thawh a tum che a, Suangpuilawn a la ti ta ta deuh deuh tih mai tura i puankawp i la sin that surh surh kha mak ka ti lo. Mut hi a nuam a, taksa tan pawh a tha ngei alawm. Mahse maw, i mut tam lutuk chuan i pang tite a lo kham ang a, natna tha lo zawk in a nangching mai ang che. Chumi a thlen hma chuan tho la, tho thuai rawh.

I ram tana i thawh pawh hi a hun tawh asin. Rorel lai party thil tih that loh sawisel rengtu chuan i sum ngainat luat avangin inthlan dawn meuh chuan i lo angel var hmuh leh mai zel a, an hnathawh tha lo tak takte leh hna tha an thawh lohte chu hmuhhmaih ni awm takin i lo thlang tling leh thin si. Tu thiam loh nge? Tunge indem thei chuang awm? Nang leh kei lo chu ram tana tho tur kan awm chuang lo asin.

Mi fate chuan i puankawp i pawh sawih sawk sawk lai khan hmatiang sawn zai relin, chemtum nen thlawhhma lam panin an liam suau suau tawh asin. Nang lah thlamuang takin i la mu thlurh thlurh mai si. Aw, ka thian,i dawn chiang lo a ni. In chhungkaw inghahna i la ni mai dawn tih i hre lo em ni? Nge, chakna reng i nei tawh lo?


I dawn ve ngai em? India rama lal ber nena kan intlukna awm chhun chu vote pakhat kan nei hi asin. Chu thil hlu tak chu nang chuan sum them hle tak hmangin i hralh a, chumi rual chuan i zahawmna pawh i hralh tel ve tih i hre lo a nih pawhin i hralh tel ngei alawm. 

Kan ram thenawmte hi han thlir teh. Hmatiang sawn zai rela an kal mup mup tawh hi. I ram, ka ram, kan ram Zoram tana kan thawh a hun ta.

"Ka nu ka pa, ka theih tawpin ka lo zir chiang ve a, kan party mi leh sa pawh nimahse ani hi chu ka vote thei lo ang"

I ti ngam lo a nih pawhin India khua leh tui i nihna a i dikna kha hre reng la, i duh tak i thlang thei a, i nu leh pate bula i sawi chhuah chuan an thinlung sakhat chu i tinem mai thei asin. Politics tui nuin a pawlh loh thalaite kan awm asin i ti ve thei ang em? Tho har hle mahila, a la tlai lo asin.

Aw, muhil tho la tho thuai teh
Zoram tan tho la
Chakna reng ka nei love i tih hma leh thihna kut vawtin a nan hma ngei che khan tho la, tho thuai rawh.
Muhil thawh a hun e.