Aug 31, 2011

Ka zir loh ka thiam!!

Nu leh pa-te hian an fa hi lehkha zir tha a, mithiam tak la ni turin min duh theuh va. Chuvangin, neih thinglung khawng tak meuh meuhin 'finna ril zawk kan puak chhuahbeisei tak chungin leh rual kan pawl ve theih nan', tiin min zirna run min belh tir a. Mahse, kei atan erawh Cho loh tha Hmingliani a lo ni e.

A B C kan han zir chhova, thiam sa reng reng kan lo nei si lo. Chunnu lu a hai awm e. Kan lo leikang leh deuhva, 1 2 3 lam kan zir ve ta. Khang hun laite khan lo zir tha i la chuan, tuna Trigonometry ka thiam lo lutuk hi chu a zia deuh mahna. A tlai tawh si.


Rual khat zinga tuithawl ak nawi pawl nih reng pawh kha ning hle mahila, mahni awmdanin zir miau hek lo le. Differentiation te, Integration te kan han zir a, har kan tih tawh tehlul nen Differential Integretion a la awm zui. Huiham!! Chutah, Sector an ti, Pie an ti, x y z...a...ka hre seng ve lo a ni e. Sap ngaisang inti duh miah si lovin saptawng kan ngaisang em em a, vaitawng lah a tulna avang chauhin kan zir a, kan la thiam lo em em zui si.

A bik takin zirlaite hian heng harsatna hi kan tawng hnem bikin ka hre thin. Chandra Gupta hming ringawt pawh hi ziak a har teh lul nen, 'chumi kumah chuan chumi khami chu an eng lova, chutiang khatiang chuan an awm a', tih leh zel zawng. A har em a ni!! Nia, he khawvelah hi chuan engmah hi a thiam kim vek theih lova, dam taka pawm thiam zir a tul zawk a nih hi.

Nia, kei hian ka pawm thiam a. Ka zir loh tam tak ka thiamte hi a hlu ve asin.

Eng lai khan nge Pen hmawr seh hi ka zir ka hre lo reng reng. Mahse, kei aia thiam an awm a nih chuan an tam vak bik kher lovang. Ka Pen ngat phei hi chu keima seh sawih ve ngat asin!! Exam hall-a awm laite hian a shape hi kan design melh melh a, darkar thum a liam meuh chuan designer ropui tak kut chhuak ai pawha nep chuang bik lo tur chu kan lo duang chhuak reng tawh mai thin a nih hi.

Chu mai a la ni lo. Mombati tlanga liam miah si lova, a tui dah tlin puaute leh a tlang hmeh sawihte pawh ka la thiam mawle. Hei ngat phei hi chu Congress sawrkar laia ka thiam a ni mai thei a ni. Lehkha zir paha han hmeh neuh neuh nawm bikziate kha aw!!