Sep 28, 2011

I din thar leh ang u

Chanchin Tha-in kan ram a rawn luh hnu-a kan changkan tak dan te, zirna lama hma kan sawn chakzia leh India ram pum-a ziak leh chhiar thiam lama pahnihna hial kan lo ni te hi Pathian malsawmna a ni tih hai rual a ni lo. Thiamna sang zawk beiseiin kan thalai tam takte`n mahni in chhung lum pawh thlahlel zo lovin, hnam dang karah, thin phu dep depin an awm a. An thawhrimna leh an tumruhna rah thlum tak chu seng ngei tura tan nasa tak an la hmuh hi chuan a thlamuanthlak em em thin a, a lawmawm bawk a ni.

Bazarah han chhuak ila, thalai rual inpel suau suau han hmuhte, an thuam mawi tak tak han hmuhte keini ang chuan "Kan ram chu kan lo va changkang tawh tak em!", kan ti mai ang. Mahse, kan incheinate chu mawiin a mante chu to hle mah se kan mawina chuan en chet a dawl lova, hnam dangte hnuihsawh kan hlawh leh mai thin. Hei hi zawng a pawi a ni e.


Inneihni-a mawi taka Biakin pan thinte chu Mitthi lumen zan chuan simeikhu ang maiin an lang tlem a. Chhungte leh thian hnaivai chhungte in tih lovah chuan an lang ta zen zen lo. Rimawi ri dup dup kara thlit kerh kerh chu an nuam tihzawng a lo ni ta. Khawhar hla saka lusunte hnem ai chuan khawi emaw laia thian za hova lo intihkhawm tel tel chu nuam an ti a. Lirthei hmanga khawi emaw lai vela chak tak taka tlan chu an nuam tih zawng a lo ni ta. Hei hi kan Zoram dinhmun a ni a, tu thiam loh nge? In dem kual ngawt lovin nu leh pa te leh thalai te hian kan inen a tul ta. Zoram kan tih hian Aizawl chauh a huap lova, Mizoram chhung khawi lai pawh a huam vek tih kan hre theuh awm e. He hi khawpui dang, Lunglei, Champhai, Serchhip, Kolasib, etc.., te dinhmun pawh a ni vek a. Tlawmngaihna a boral ta em ni!!? Nge, kan zirna lamah kan inzir bo zawk??

Khawnge kan Zonunmawi, phutlet nei lo, Tlawmngaihna leh Huaisenna-te`n an thuam a, Rinawmna, Dikna leh Felna te`n a sir atanga an phungbawm thin kha a awm tak??
Mitthi in riak han hmuhte hian lungawi a va har thin tak em! Khawhar in-a riak thinte hian thian thar an mamawh a. An inkhawm ngai loh avang leh an damdawi tihna puam el ul avanga in kawm duh lohva, in biak serh ho chuan Zonunmawi tundin leh nan an au lawm lawm che u asin. Thlan laih ni leh hnatlan nikhuate chuan eitur tui hnaia taka chawm len avanga hmai fai vuahte ai chuan veng thlang hmeithai fa chuan a thawh hlawk chawk a. Tih theih dang nei lo nia a inhriat vang pawha  ni mahna.

A let beisei vang ni miah lova miin thahnem ngai taka hna a thawk lai hmuh hi a va nuam tak em aw!! Chuvangin i thiante tan hmuhnawm vawi khat tal nih han tum teh.

Tukverh atanga thli thawin a chhem, ka bati alh phe hlep hlep chu ka thlir reng a. Tan ka lak lohva, ka enliam mai mai chuan hun rei lote-ah a thi mai dawn tih pawh ka hria. Mahse, tukverh darthlalang keh nuaih leh bang pawp awm teuh chung chuan ka ti thei si lo. Puitu ka ngai a, ka mamawh ngawih ngawih asin. Hawh u, kan huaisenna, kan taihmakna, kan rinawmna te leh kan tlawmngaihna te nen kan Zonunmawi, tlu chhe tep tawh hi i tung ding leh i la, kan ram hi i din thar leh ang u.