BEIDAWNG LOVA BEIH

Pawl kua kan zirlai kha ni ta in ka hria, kan Mizo Tawng zirlaibu ah khan hlawhtlinna kawng hrang hrang pawimawh tak takte kan zir a, chung zingah chuan Tumruhna te, Taimakna te leh thil dang dang kha a awm nual a, mahse khang zinga ka sawi duh tak ber chu ‘Beidawng lova beih’  tih kha ani. Hlawhtlinna kawngah hian Taimakna te leh Tumruhna te aiin a pawimawh zawk ka ti ani hauh lova, mahse mitin hi mihring kan nih chhung hian kan nunah leh thil tihah vawi tam tak kan hlawhchham fo thin a, he khawvela mi hlawhtling kan tihte zinga tam zawk te pawh hi hlawhchhamna in a tlakbuak zet hnua beidawng lova an beih vanga lo hlawhtling leh ta te an nih tlat vang zawk ani.

Hlawhchhamna hi zirtirtu atana hman tur ani a, min enkawltu tur ani lo. Min tikhawtlai deuh anih pawhin kan tawpna tur ani chuang lo. Hun engemaw chhung chu kawng kualah kan kal phah mai thei, nimahsela kan thlenna tur chu a pawh leh tho tur ani.

Kan Headmaster thu min hrilh ka hriat reng chu, “Kan nun hi lawngkartu, tuipui zau taka lawngleng nena zinchhuak ang a ni a, thlen tumna hmun neiin kan chhuak a, chu hmun chu kan tum ram (Destination) chu ani a, chumi thlen chu kan ‘aim in life’ chu a ni. Chawlsan mai lovin kan pan tur a ni. Amaherawhchu kawng lakah rokhawlhna te, harsatna leh buaina te chu thlipui leh tuifawn ang maiin kan tawk thei a, chutih hunah chuan hma kan sawn thei lova, lawngleng chu hmalam kan panpui thei lo anih pawhin hnungtawlh lovin kan awmna ngaiah thlipui kian hun chu kan nghak anga, a kian veleh kan kal leh mai tur ani. Kan chawlh chung chuan kan thiante leh midang te chuan min lo kalsan ani thei, tin a then phei chuan kan tum ram chu an lo thleng  tawh pawh ani thei, nimahsela beidawng mai lovin kan lawngleng chu kan kar leh sauh sauh anga, a tawp chu kan thleng  ve ngei tur ani. Kan thlen tum hunah kan thleng lo anih pawhin midang ang tho in kan tum ram chu kan thleng ve tho a, kan thleng  tlai deuh tihna mai a ni” tiin. He thu hian kan sawi mek beidawng lova beih a pawimawhzia a tarlang a, kei ngei pawh nasa takin min fuih a, he thu hian ani Pathian khawngaihna changa tun dinhmun min hruai thleng ni. Tuna mihlawhtling kan hmuhte hi hun kal tawha lo hlawhchham thin, mahse beidawng duh lo te an ni fo. Engkim a tawp vek emaw tih tur khawpa a beidawnthlak hnu pawha beidawng duh tlat lo te chu hlawhtlinna hian a zui nge nge thin.

Chuvangin chhiartu duhtak, i zirlai ah leh i hnathawh ah te, i thil tih apiang ah i hlawhtling nghal lo a ni maithei a, beisei ang i phak lo pawh ani maithei, midangte an hlawhtlin a an tihthat viau laiin nang chu i result ah i beidawng rum rum pawh ani maithei, mahse tuna beisei ang i phak lohna tak kha nangmah fuihtu nise, beidawng a lungngai mai lovin i hma a tihtur i hmachhawn leh turah te chuan tha taka ti thei turin tan la thar zawk la, Beidawng lova beiin hlawhtlinna chu han phur chhuak ta che.. Tin a vawikhatnaah i hlawhtling nghal anih pawhin a aia harsa zawk tih leh tum ang che.

“Engpawh ni sela, kan thlen chin atang khan hma i sawn zel ang u.”

-Philippi 3:16