CYBER CRIME LEH MIZO SOCIETY

                        A hmasain Cyber tih tawngkam hi Cybernetics tih atanga lakchhuah a ni a,
Information & Communication Technologies (ICT) thil tihtheihna khawvel sawina a ni.
ICT hian a huam zau hle a, electronics media zawng zawng entirnan Radio, Television,
Audio/Video Cassettes, Internet leh Mobile Phone bakah Computer, Software, electronics
leh telecommunication hmanrua hrang hrang a huam tel vek a ni. ICT hman khawlohna
avanga dan bawhchhiatna sual reng reng hi “Cyber Crime” an tih chu a ni a, he sualna hi
khawvel ram hrang hrangin a buaipui meka, Mizoram chhungah pawh he sualna hi kan
buaipui mek a ni. Khawvel a changkan poh leh sualna pawh a changkang ve zel a, tun
hma a misualten silai nen a bank an rawk thin kha tunah chuan computer hmanga bank
rawk a lo ni ta a, lehkha thawn hmanga invauna (extortion) leh mi hruaibo (kidnapping)
te pawh E-Mail leh Mobile Phone hmanga tih a lo ni ta zawk a, nawhchizawrhna leh call
girls te pawh Internet leh Mobile phone kaltlanga tih a lo ni leh ta zel a, terrorist-te tan
sual rawngbawlna hmanrua pawimawh leh tha tak anih bakah khawvel ram hrang hranga
terrorist-te inzawmkhawmna hmanrua pawimawh tak a lo ni ta. A bik takin Internet hian
ramri kham chin a neih loh avangin thilsual titu te man chhuah an harin sual
rawngbawlna hmanraw tha tak a ni. Mizoram chhungah ngei pawh hian sual
rawngbawlnan a hmang an awm mek a, chung zingah chuan dan bawhchhia an ni tih
inhrereng chunga tilui an awmlaiin thenkhat chuan dan an bawhchhia ani tih pawh inhre
lova ti mek an awm bawk. Cyber crime avang hian kan society-ah harsatna kan tawk mek
a, mimal leh chhungkaw nun a khawih a, khawtlang leh kohhran hruaitute mang a ti ang
tawh tak zet a ni. Khawtlang nun leh mimal nun siam tha tur hian thu tha inhrilh ringawt
a tawk lova, dan kan neih that leh kan hman that chauhin kan khawtlang nun hi siam that
theih a ni. A hranpa-in kan ramah dan siam a ngai lova a awmsa Indian Penal Code
(IPC), 1860, IT Act., 2000 leh Copyright Act, 1957 te hi a tha tawk em em a ni. Heng dan
hmang hian cyber crime titute hi na taka hrem theih an ni a, thenkhatah chuan pawisa Rs.
Nuai hnih (2 lacs) chawi theih a nih bakah lungin kum 2 lai tan theihna te a ni.
Mizoramah hian thil tisualte hi kan ngaidam leh mai thin a, hei hian sual a ti ngampa a,
chumi avang tak chuan tunah hian kan society in harsatna kan tawh phah mek niin a lang
a ni. Kan kristianna atangin kan ngaidam thei tehmeuh mai, amaherawhchu dan pawhin a
tih tur a ti ve tur a ni, dan hian mirethei leh hausa leh thiltithei a thliar hrang ve ngai lova,
keimahni dan hmangtute zawk hian mihringah kan thliar hranga, dik takin ro min reltir
thei lova, chu chu kan society-in a tuar mek a ni tih hi kan pawm ngam a ngai a ni.
                       Cyber crime thlen chhan tam ber hi phuba laknan emaw, hlimhlawp nan
emaw, sum leh pai hlawhchhuah nan emaw an ti thin. Mizoram-ah erawh chuan
hlimhlawp nan leh kan mi huat zawngte tih mualpho nan cyber crime hi kan ti deuh ber.
Kan buaipui ber erawh chu pornography (Saruak thlalak) leh copyright chungchang hi a
ni. Kan hnam la naupan vang nge, thil chinchang kan hriat loh vang zawk, cyber crime te
hi eng vakah mah kan ngai lova, dan te hi kan palzut mai mai a, kohhran leh khawtlangah
pawh kan pawm zam lutuka, hei vang hian kan ram leh hnam hi la mualpho mai thei dinhmunah a ding mek a ni. Cyber crime chi hrang hrang tam tak a awm a, chung zinga
mizoten kan hmachhawn mekte chu:

1. PORNOGRAPHY (SARUAK THLALAK)
                    Mizoten ICT kan hman khawlohna langsar deuh mai chu computer leh mobile
phone hmanga mizo nula/tlangval sex video leh saruak thlalak thehdarh hi a ni.
Nula/tlangval te khan pindan chhungah, tuma hmuh lovin, saruakin thla la dun ta sela,
chu an thlalak avang chuan dan an bawhchhia tihna a ni lo. Mipui hmuh theiha an pho
chhuah chauhvin dan an bawhchhia tihna a ni. A chhan chu saruak thlalak hian mipui
rilru a chhe lamah a hruai kawi theih avang leh midangte nunphung a tihbuai theih
avangin, dan atang chuan sual a ni. Anmahni duhthuin Internet/Mobile/Computer/Print
Media-ah emaw an pho chhuak anih pawhin an chungah hremna lek kawh theih a ni a,
chubakah, midangin an thlalak kha ruk sakin lo phochhuah sak sela, a pho chhuaktu zawk
kha hrem tur a chu a ni.

                    Heng saruak thlalakte hi thenkhat chu anmahni in lakte leh an bialpa lak sakte a
ni a, nawhreh leh mai tura an lakte a ni. Digital camera leh mobile phone hmanga thlalak
te hi nawtreh vek mah ila, computer hmangin lakchhuah leh vek theih anih avangin an rin
lohna lam atangin a lo darh chhuak ta thin a ni. A tlangpuiin mobile phone/digital camera
an siamtirna hmun atangtein a darh chhuak fo thin. Hetianga mi thlalak nawhreh tawh,
lakchhuah saka, Mobile, Computer leh Internet hmanga thehdarh saktute hi Cyber Crime
titute chu an ni. A hremna dan chu IT Act, 2000 (Section 67) hnuaiah a ni a, A vawi khat
thiamloh chantirna-ah kum 5 lungin tan bakah pawisa Rs. 1,00,000.00 thleng chawi tir
theih a ni a, vawi hnih thiamloh chantir anih chuan kum 10 thleng lungin tan bakah
pawisa Rs. 2,00,000.00 thleng chawi tir theih a ni.

 2. COPYRIGHT LEH PIRACY
                   Mi tupawhin a neitu phalna la lova lehkhabu, video film, audio cassette leh
computer software te lo siam pun a tihdarh emaw sumdawn nana lo hman emaw hi
“Piracy” an tih chu a ni. Khawvela computer leh music industry-in a buaipui ber pakhat
chu piracy hi a ni hial awm e, kan ramah pawh nasa takin he thil hi a hluar a, chuvangin
music album siamtute tana hlawk lo rawih khawpin priracy hian bu a khuar mek a, a kum
telin music album siam pawh kan tlem ta tial tial a ang hle. Technology thang duang
lutuk hian copy leh thehdarh te a ti awlsam tial tial a, music leh film industry siamtute an
hlawk lo tual tual thung. Tunah chuan mi tupawhin mobile phone changkang kan hum ta
fer fur mai a, kalpah pawhin thil kan inthawn kual zung zung ta mai a ni, hei hian a bikin
music piracy a ti pung nasa hle a ni. Kan ram chhung ngeiah pawh hian hetiang tihching
hi tam tak an awm. Entirnan, Kawng sira CD/DVD kan zawrh thin te, Video library a
movies tam zawk te, Computer hralh a pianga pirated software an thun tel ziah te,
Computer Institute tam zawka pirated software an hman thin te, Sorkar Office-a pirated
software an hman zawng zawng te, Chanchinbu chhuah nan a pirated software an hman
thin te, Kohhran Computer chhunga pirated software an dah zawng zawng te, Mimal
Computer chhunga pirated software zawng zawng te, etc., sawi tur a van tam em, sawi sen a ni lo, heng zawng zawng hi dan bawhchhiatna sual vek a ni. Heng sualna hi
khawvelin a buaipui nasa em em a, India ram chhungah pawh mi tam tak Jail-ah khung
an ni tawh a, tun thlengin tihreh theih a la ni lo. Mizoram chhungah ngei pawh piracy
hian min chenchilh mek a, sualah kan ngai lo nge sual kan ngai zam zawk hriat thiam a
har hle a ni. Hetiang hian kan ngaihtuah ngai em – kan zaithiamten cassette siamin an
hun leh tha leh sum leh pai tam tak sengin an buaipuia, chu chu keinin kan lo pirate sak
leh mai thin a, chu chuan an sum hailuh tur tam tak kan ti chat tihna a ni. Piracy avang
hian kan music/film industry pawh a hlawk loh phah a, chuvangin mizote hi music/film
lamah kan thlen tur chin kan thlen loh phah a ni tih te hi kan hriat a pawimawh khawp
mai. Heng dan bawhchhetu te hi dan anga hrem theih an ni. A hremna dan chu Copyright
Act 1957 (Section 51/63B) hnuaiah a ni a, ni 7 (days) atanga kum 3 (years) thleng lungin
a tan theih a nih bakah pawisa (Rs.) 50,000 atanga 2,00,000 thleng chawi theih a ni.
Mahse, sumdawn nana hmang lova personal copy a tan hmangtu chu lungin tang lovin
pawisa erawhchu Rs 50,000 thleng chawi tir theih a ni.


3. INTERNET/ E-MAIL/ MOBILE PHONE HMAN KHAWLOHNA
                   Computer, Internet, e-Mail leh Mobile phone hmanga intihmualpho leh
intihhmingchhiatna hi “Cyber Defamation” an ti a, Mizoramah hian kan ching sawt hle.
A bik takin chanchinbu leh Cable TV local channel kaltlangin insawiselna lam hawi thei
tih a ni ta fo mai te hian mizo society chhungah innghirnghona a thlen mai theih bakah
khawtlang leh thenawm inhmuhthiamlohna a thlen thei a ni. Chanchinbu leh Cable TV
local channel a fakselna, ka vei zawng leh mipui aw programme-ah te hian mi tuin emaw
SMS, E-Mail, leh Internet kaltlangin thu a rawn thawn a, chu chu edit hmasa lova a nihna
ang rawt a kan lo chhuahsak zel ringawt mai te, a tawpah a tichhuaktuten mawh ka phur
lovang tihte kan tarlang leh ringawt thin a, hei hi kan hriatchian loh vang nge, kan insawi
fihlim tum lutuk vang zawk, amaherawhchu dan hmaah hei hian min hum zo angem tih hi
kan ngaihtuah tel lo niin a lang. A thawntu te hian e-Mail account lem siamin chumi
hmang chuan an thawn a, mobile phone nise pre-paid tih nunsa anmahni hming pawh a
register ni lo hmangin SMS an thawn bawk a, chu chu Chanchinbu ah leh Cable TV ah
mipui vantlang chhiar theih turin kan chhawp chhuah sak ta thin a ni a. Hengah hian
tunge mawhphurtu ni ang. Chanchinbu leh Cable TV neituten an hriat ngei ngei tur chu,
hming lem hmanga mi chanchin an chanchinbu ah emaw Cable TV kaltlangin emaw an
tihchhuah dawnin hming lem hmangtu hnen atangin thu delhkilhna leh signature an la
hmasa ngei ngei tur a ni, chuti a nih loh chuan “Cyber Defamation Case” hi chanchinbu
leh Cable TV neitu te chungah hian lak theih a ni. Heng dan bawhchhetu misualte hi
hrem theih an ni a, A hremna dan chu IPC (Section 499) hnuaiah a ni a, A hremna chu
cheng nuaihnih (Rs 2. lakhs) chawi theih anih bakah lungin tan theih a ni.
Heng bakah hian mi kan huat zawng leh ngei zawngte vau nan leh tihthlabar nan
kan hmang thin bawk. Computer, Internet, e-Mail leh Mobile phone hmanga mi vau leh
tih thlabar hi “Cyber Stalking” an ti. Mi tu emaw, a hnathawhna hmuna a awmlai emaw,
ama chenna ina a awmlai emaw, khawi hmun pawh nise a tihlauthawng zawng leh
tithlabar zawnga phone leh thuziak hmanga vaute hi dan bawhchhiatna sual a ni.

4. MOBILE PHONE LEH SIM CARD
             SIM Card hi a nihna takah chuan “Smart Card” a ni a, a chhungah hian processor
(thluak bur) leh memory (hriatna) te reuhte a awm a, subsciber chungchang hriat tur
pawimawh zawng zawng a chhungah hian a awm vek a ni. SIM card tel lo chuan mobile
handset ringawt hian awmzia a nei lova, mobile phone hmang thei tur chuan SIM card
neih tel ngei ngei tur a ni. Mobile phone connection thar reng reng hi heng, photo,
identity proof, addresses proof leh hriatpuitu (prepaid bikah) tello chuan pekchhuah theih
a ni lova, tin, mobile phone connection te hi midang hnenah inhlanchhawn mai mai phal
a ni lo bawk, an inhlanchhawnga sual rawngbawlnan an hmang anih chuan a tuartu tur
chu a tira connection neitu kha a ni ang. Tunlai hian SIM card tih nunsa zuar tam tak an
awm thin a, heng tih nunsa zuar tur hian tu hming emaw thlalak emaw an hmang thin. Ka
thu hriatna thenkhatah chuan Election photo ID card hmangte leh thingtlangmi thlate la
kualin Agent thenkhat chuan connection thar atan an lo booked lawk thin a hriat a ni a,
hetianga kan tih thin avang hian engtik niah emaw chuan mi, tuemaw pawisawi
miahlovin hremna nasa tak a la tuar thei dawn a ni. Entirnan, Agent pakhat-in SIM card
tih nunsa zuar ta sela, chu a SIM card tih nunsa chu mipakhat Tv. Zorama hminga
registered ni sela. Tichuan, misual pakhat-in chu SIM card tihnunsa chu leiin mi tu tu
emaw vau nan hmangin fakselna(Zonet)/Kaveizawng(LPS)-ah te mi sawiselna leh sorkar
demna tichhuak fo bawk sela. Police-in misualpa hi man tumin chhui ta se, a tawpa an
man tur chu Tv. Zorama hi a ni ang. Tv Zorama hian thiltih sual nei miah lo mahse case
rip tak a awrh thei reng mai a lo ni. Heng hi Agent thenkhatin mi tu tu emaw hming hawh
leh thlalak hmanga SIM card an lo registered lawk thin vang a ni a, hetianga, SIM card
tihnunsa zawrh leh hman pawh hi khap tlat a ni. Hetiang SIM card tihnunsa kan zawrh
thin avang hian mi tuin emaw kan hmingin sual rawng an lo bawl reng thei a ni tih hi i
hre thar leh theuh ang u. Kan chungah case rip tak a thlen hma hian Agent-te pawhin
diklo taka mi hminga mobile connection lo siam te, SIM card tihnunsa lo zawrhte hi i ti
tawp ngamin i zuar lo ngam ang u.
                  Tin, SIM Card chung changah tunlaiin thiamna a sang tawh a, kan SIM card te hi
clone (a dang an pui, a mah ang tak) theih a ni a, a naranin i mobile phone kha SIM card
telin mi hnenah emaw unauthorized service centre-ah emaw siamtir turin pe suh ang che.
i SIM card kha clone anih chuan midangin I number hmangin sual rawng an bawl thei a,
call leh SMS pawh an duh duhin an siam thei a ni tih hre reng ang che.

5. E-MAIL LEH SMS HMANGA INBUMNA
                     E-Mail leh SMS hmanga inbumna hi tunlai khawvelah a hluar hle, chung zingah
chuan “Nigerian Scams” hi a lar berte zinga mi a ni. Chung an thu thawn tlangpui chu
“Pawisa tamtak i dawng a, i bank account min hrilh la, kan rawn deposit dawn nia…..
Africa ramah mi hausa tak a boral a, thurochhiah a neihloh avangin a pawisa hi i
account-ah rawn dah a ni anga, 50% i ei dawn nia….. Lottery i man a, a processing fee
$4000 hi he account number-ah rawn deposit rawh….” tih vel an thawn thin a, mitam takin a tak tak emaw tiin an sawi ang angin an ti thin a, a tawpah bumna thang a ni tih an
hriat hnuin a lo tlai tawh thin. Mizoram chhungah hetiang inbumna avanga tuar
chhungkaw tam tak an awm tawh a, chung zingah chuan in leh lo chan phah hialte pawh
sawi tur an awm bawk. Heng lakah hian mizote kan him theihna turin i fimkhur tlang ang
u.
                   Tin, e-Mail account password vawn him that tawk loh avangin kan password te hi
midangin min lo hriatruksak thei a, chutiang a midangin min lo hriatruksak anih chuan
kan e-Mail account hmangin sual rawng an bawl thei thin a ni. Hetiang lam kaihhnawih
pakhat sawi tur awm chu, Kumin May ni 20, 2009 khan Reverend pakhat chuan SP
Aizawl hnenah FIR a submit a. He FIR-a a lan dan chuan mi tu tih hriat loh ten a e-mail
password (hotmail) chu lo thlak sakin, a e-mail account hmangin Reverend thian te
hnenah London a zin thu te, a wallet a tih bo vek thu te leh hotel bill pawh pek tur a neih
loh thute a thawn a, pawisa US Dollar 2500 chu Western Union kal tlanga puk tir turin
an lo dil tih hriat chhuah a ni. Hetiang hian misual tuten emaw kan hmingin sual
rawngbawl nan an hmang thei a ni tih kan hriat a, kan fimkhur a tul tawh hle.
                 Tunlaiin e-Mail leh SMS hmangin thu pawimawh tak tak kan in thawn thin a,
hemi chung changah hian fimkhurna tur tam tak kan nei, entirnan - mi pakhat chuan
phaia awm a fanu hnenah pawisa a thawn dawn a, a fanu chuan a bank account number e-
Mail in a rawn thawn a. Mahse, he e-mail hi misual pakhat (Hacker) in a lo hmufuh a,
tichuan a bank account number ziah kha lo ti danglamin, ama bank account-in a lo
thlaksak a, tichuan, a nu chuan a fanu bank account-ah pawisa a dahlut (deposite) emaw a
tih kha misualpa (Hacker) bank account-ah a lo lut daih si a, hriatchhuah a nih meuh
chuan a lo tlai zo tawh a ni. Heng inbumna hi tunlai khawvelah a hluar hle a ni tih hria la,
fimkhur hle ang che.

6. INTERNET BANKING LEH ATM
                     IT hmansualna langsar ber pakhat chu credit card leh debit card inruksakte leh
bank account atanga pawisa inlakchhuah sakte hi a ni. Internet leh Mobile Banking lar
chhoh hnuah hian cyber crime hi a nasa zual ta emaw tihtheih a ni a, tunlaiin, Mizoram
chhungah pawh Computer, Internet leh ATM khawl hmangin awlsam takin pawisa Bank
atangin kan lachhuak thei tawh a ni. Hetia thlamuang tak leh awlsam taka Bank kan dawr
zung zung theih tawh lai hian misualten remchang zawngin Credit card, Debit card leh
Bank account-te hi electronics media hmangin min rawk thei a, kan hriat loh hlanin
pawisa pawh kan bank account atangin min lo lakchhuah sak thei a ni. Internet kaltlanga
sumdawnna ti thintute leh thil lei thintute hi kan fimkhur a ngai lehzual a ni. Tin,
ramdanga kan zinin ATM machine kan hman turte hi hriatchian a pawimawh em em
bawk a ni. Hmun thenkhatah chuan ATM Card Skimmer te leh Hidden Camera-te an lo
fit thin a, chung hmang chuan ATM card number leh PIN number-te an lo hreru thin a ni.
Hetianga IT hmansualna hi tam tak sawi tur a awm tawh a ni.
                  Phai rama zirlaite tan zirlai zir zawh hnu a, Mizoram lama lo haw chhoh dawnin
Passbook leh ATM card te midang hnenah hlan chhawn emaw hralh emaw tih loh tur a
ni. Hetiang tih avanga harsatna tawk mek mi thenkhat Mizoram-ah kan awm, hei hi a pawi hle a ni. Phai ramah khuan mi thenkhatin zirlai haw turte hnenah Bank Account lei
tur an zawng a, an hmuh chuan bank account kaihhnawih zawng zawng, Pass Book,
ATM Card (Pin No nen) an la thin a. Heng ho hian Internet kaltlangin mi Bank Account
atangin pawisa an ru chhuaka, chu an pawisa ruk chhuah chu an Bank Account lei thar
(zirlaite atang a an lei) ah khan an dahlut (transfer) thin a, tichuan ATM card hmangin
chu pawisa chu an va lachhuak leh thin. Hetiang ang thil ah hian Mizo zirlai tam tak an
awk tawh a, phaiah te lehkha zira an kalin an account te an hralh ta mai thin a, hei vang
hian harsatna an tawk mek a ni. Tunah pawh Mizo tam tak hetiang avang hian an buai
mek a ni.
Internet Banking chungchangah hian fimkhurna tur leh hriat tur pawimawh tak
tak Mizote hian kan nei a, chung zinga thenkhatte chu: (1) e-Mail hmangin tu emawin i
bank account check turin a rawn hrilh che a, click mai theih turin “link” a rawn pe bawk
che a, chu “link” chu i click veleh hmun dangah a hruai daih thei che a ni. Kha site kha
nangma banking site nen inang chiahin an siam a, username leh password i chhutluh
chiah khan i bank account kha an lo hack theih phah ta a ni. Chuvangin e-mail atanga i
dawn “link” reng reng visit loh tur, a bikin bank account i neihna website phei chu
nangmah ngeiin i chhulut anga, engtiklai pawhin “address bar” entry kha a dik ngei ngei
tur a ni. (2) Kan ram chhunga Bank-te hi computerized a lo ni ta fur mai a, hengah hian
kan fimkhur a ngai hle bawk. Entirnan tu emawin bank server chhungah computer
program pakhat dah lutin, chu program chuan bank account neitu zawng zawng hnen
atangin thlatin Rs. 1/- zel an account atangin automatic-in lo paih (deduct) sakin ama
account-ah lo in deposit tir thin sela, a bank account neitu tan a hriat tham mai si loh
avangin hmuhchhuah a har em em thin. Hei hi mi bank account atanga pawisa inruksak
dan kawngkhat a ni a, hengah te pawh hian kan fimkhur a ngai tan tawh hle a ni.
 
7. CABLE TV NETWORK LEH LOCAL CHANNEL
               Mizoramah kum 1990s chho vel atang khan Cable TV Network kan nei tana,
tunah phei chuan local channel neiin mizo programme leh film tha tak tak chhuah thin a
ni. Amaherawhchu heng kan film pek chhuah turah hian kan fimkhur a ngai hle. Kan
fimkhur tawk loh avangin thangthar, naupang, zirlaiten nun dan thalo an zir chhuahphah
thei a ni tih hi kan hriat a va tha em!!. Mizoram chhunga Cable TV Operator-ten hei hi i
hre theuh ang u - Cable Television Networks Acts, 1995 dan bakah hian Cinematography
Act, 1952 dan a awm a. Heng dan hian a phut chu eng film pawh mipui hmuha chhuah a
nih hmain Central Board of Film Certification (CBFC) an pal tlang ngei ngei tur a ni a, a
chhuah dan turah pawh hetiang hian category hrang hranga thliar a ni:




                  Kan local channel-ah hian heng category thliar hrang miah lo hian film chi hrang
hrang duh hun hunah cable TV operator te hian an chhuah mai thin niin a lang. Heng hi
dan bawhchhiatna sual a ni a, hrem theih an ni tih kan hriat a pawimawh hle.
                  Local channel-a fakselna, ka vei zawng leh mipui aw programme a an vei
zawng thu rawn thawntu tam berte hian mi dangte siam that duhna aiin sawisel duhna
rilru an rawn pholang thin niin a lang. Mahni hming leh address pawh tarlang ngam si
lovin mi dangte sawiselna leh duh loh zawng thil tarlan chiam nan an rawn hmang thin a,
Mizo mipuite min indotir mai ang tih hlauhawm thei tak a ni. Heng programme hi kan
khawtlang tan inpumkhatlohna leh inhmelmak theihna tur thil vawrh chhuahna hmanrua
anih theih avangin a tha lova, mihring nun siam thatna aiin in huatna thlen tir theitu a nih
avangin Local Channel pechhuaktute pawh an fimkhur deuh a tha hle awm e.
 
8. CYBER CAFÉ LEH INTERNET
                 Tute pawhina Internet man chawia an hman theihna hmun “Cyber Café” hi
khawvel hmun hrang hrangah a awm deuh vek awm e, Mizoram chhungah pawh hmun
tam takah hmuh tur a awm. Heng Cyber café atangte hian kan thalai tam zawk chuan
Internet leh e-Mail hmandan an zirin an thiam a. Hetianga mipui vantlang hman theih
tura siam a nih vang hian khawvela cyber crime lo chhuahna tam ber pawh hi cyber café
atangin a ni duh hle. A chhan chu cyber café neitute hian a hmangtute hi an chhinchhiah
that tawk loh avangin thilsual titu dik tak manchhuah a harsa em em a, chuvangin cyber
café neitute hian an tawrh phah fo thin. Entirnan misual pakhatin cyber café atangin e-
Mail hmangin tu emaw hnenah vauna/tihthlabarna thu emaw thawn chhuak sela a thawn
chhuahna computer kha awlsam takin zawn chhuah theih a ni. Amaherawhchu cyber café
neitu khan misualpa Identity leh record fel fai taka a vawn that loh chuan police ten
cyber café kha an rawn chhuichhuah hunah thil tisualtu kha hriat anih theih dawn loh
avangin cyber café neitu zawk kha a mawhphurtu ber tur chu a ni. Chuvangin Cyber
Café neitu zawng zawngin a hmangtute particular kim chang takin log book ah an ziak lut
ang a, an photo ID card pawh xerox copy an kawlsak ngei ngei tur a ni. Tin, Mizoram
chhunga hotel thenkhatah an mikhualten Internet an hman theihna turin wireless LAN
hmangin connection a free-in an pe thin a, Computer Insitute thenkhat-ah pawh Internet
facilities pek an ni bawk a, hetianga mi hrang hrangin Internet an hman theihna hmunah
reng reng hian fimkhur a ngai tak zet a ni. Kan fimkhur loh avangin kan thil tihsual ni
lovah hremna kan hmachhawn thei a ni tih hi kan hriat a pawimawh hle.


Source: Mizoram