Ka Bawlhhlawh Dahkhawm no 1

               Mi dang tan engmah ni mahsuh se,kei ka tan erawh chuan,kan chhungkaw tan,ka nu leh pa tan erawh chuan,chhungkaw lehkhabua Bung thar pawimawh tak a nih avangin,ka ziak lo thei lo... tu pawi ka sawi em lo vin ka ring e.Min lo nuih zat tawk an lo awm a nih pawhin,ka fiamthu thiam loh zia leh mi nuih ka tih zat thiam loh zia ngaihtuah chuan,fiamthu thawhna hlawhtling takah ngaiin ka tuang ka ti chhah lui mai dawn a ni.Hnung lamah min lo nuih ru tet tet a nih pawhin,hnung lamah mit ka nei a zeng pawh zuk ni suh!!


              Thingtlang khua a seilianin,thingtlang naupang khawsak dan leh awmdan ang zawng zawngte hi chu ka ti kim ve vekin ka hria.Hei thu erawh hi chu tun atan chuan sawi ka tum hran lo.Ka peih leh ni dangah ka la ziak mah na!Tichuan,pawl sarih ka pass hnu chuan,Aizawla High School tha ve deuh hleka kal tir min tum a vangin ka pa nen St paul's te,Synod te,leh a dang dangah te admission form kan la kual dun a.Vanneih a siamin St Pauls' High Schoolah Class VIII zawm thei tur listah ka hming an chuang ve kalh mai chuh...kan lawmdun pafa teh a sin!Mizorama high school tha ber te zingamiah ka lut ve thei dawn.. a chiang a ni!Waiting Lists mai mai a ni lo!Kha mi zan khan ka rilruah St Pauls a tang chuan matric tha tak takin an pass thei a, kei pawh ka matric result that ve tur zia te thlengin ka ngaihtuah thleng ta in ka hria!Chuan,a lut tur ho te chu school zirlai- bu,ziakloh bu,a lian chi leh a te chi te,a kawmtuamna tur brown paper,schhol hming chuang kalh mai te,kawrlum hring,sen leh enga tial,badge,leh necktie...necktie ngat phei chuan ka mit a la zual,a hring tle zek a,an tial thek mai te kha...mawi ka va ti tak em! Keima pual ngata necktie ka vawikhat neih na!


                School luh ni a lo thleng ta!Kulikawn a tangin Tlangnuam kawngah kan han chho hring khup khup maiah...tam ka va han ti tak em aw!Kan khua Krismas ruai theh tura Biak In a tanga Sipai Tlang kan pan chho tup tup mai tam kan in tih ve em em thin te kha chu a lo nep mai mai!Tichuan School varanda velah thingtlang naupang,ar khual tit a ti,thian kawmtur pawh nei lo kha ka han hawi hai ta he haw mai a!Chutah le,Chawkidar,Pu Liana khan zak kau kawk zawk khawpin dar an khawng ri a,Schhol chhak tlang,Assembly nana an lo hman thinah kan han tlan chho ta khup khup mai a! Ta tang chiah hian a ni,harsatna namen ka tawh tak ni!Thingtlang zirna leh khawpui zirna lo inan loh zia hi!A bikin Saptawngah!An sawi reng reng ka hre ve thei ta lo!!Kan Headmaster,Catholic Brother,kawrvar fual ha delh dulh,palian pui,hnar lian tak,meng rum ul mai khan a duh duh,tul a tih ang ang emawni kha an sawi ta zuah zuah mai a leh!A changin an nui a,a changin an phun sep sep a!Ka buai ta map map mai!Kan in line tirha in ti enge maw ve deuh a tlar hmasa lama ka lo ding kha ka va inchhir em ve le aw!Brother Headmaster khan a tarmit phen atang khan min melh kul mai si a,min en bik riau ten ka han hre bik leh nghal!Engemaw ti ti in kan assembly chu kan zo ta....huai  khat chu!
                  Kha mi kum khan naupang kan la tam kum ber a nih a vangin Class VIII ho kha Section 4-ah,A B C D in min then a,Keini kha D ah kan awm a.Kan Class Teacher pawh Sir Mawia a nih nghe nghe kha..(la hria em Hlirte?).Class room kan luh hnu hian harsatna tawh pakhat...ka theihnghilh theih reng reng loh ka tawng leh pek,a vanduaithlak!Ka necktie suih ka ti phelh palh tlat mai!Vawi khat mah ka la suih chhin ngai lo va,ka suih thiam reng reng lo tih ka hre chuak!Midang nghawng kan en a,kuhvakhawr mawi tak ang maihian a lo zum chip cheih hlawm mai si a!Sir Mawia khan min rawn kawk ta zauh mai leh nghal!Suih tur niawm tak khan kan vet eng e maw kual vel a,ka thiam der si lo..."Aw,kan khaw Schoolah kha chuan lo lut ta zawk ni ila chuan,he tiang zahna hi ka tawng lo tur...!!" ka ti ru vawng vawng mai a.Ka bula thu,ka thianpa thar Davida khan ka bengbulah "I suih thiam na nge?" a rawn ti a,"Aw","Khawi lo hawi rawh ka lo suih ang che" ka va lawm em!Sir Mawia chhuah lawk hlanin min zirtir a,kar lovah ka thiam ve ta! Thank You David,you dont know how much that you had done to me!! Ka St Pauls High School luh ni hmasa ber chu ho lam takin ka hmang ral ta lo...tuma chuhpui leh laksak theih miah loh,RO ka chhar,Ro-HLU ka chhar...!!Tun thleng hian ka la thiam a sin!

                 He Schoola ka luh tirh hian harsatna nasa tak,ka saptawng thiam loh vang hian ka tawk a..hrih vek che u duh mah ila,hun leh hmun hian min daih dawn si loh bakah midang tan ninawm mai a lo ni leh ang tih ka hlau va.Sawi vek lo mai ang.Mahse pakhat leh chiah,thla khat pawh tling lo he schoola ka kal chhunga ka promotion hmuh erawh hi chu,kei ngei pawh hian ka la hriat chian em a vangin ka hrilh leh duh che.Khatih laia he School Building kha a hre chin chuan kan hria ang a,Assam type hlui tawh tak,sei zut a nih thin kha.A partition wall pawh alluminium rangva hlui,pawp hrep hrup a nih thin kha.Keini VIII D ho ka a sir berah awmin kan dawtah IX C an awm a nih kha.Kha period kha zirtirtu kan nei lo nge ka hre ta lo,kan bengchheng phian mai a,Brother Abrahama,kan Headmaster ngei mai kha thawm nei mang lo khan Class IX roomah khan class a lo la chu lo niin.Kan hre der mai si lo va!Kan thianpa Lalduhawma,kha mi sual harh lutuka ngei kha,a phr zual a,mi hnungzangah a beng thum dum dum a,amah lah chuan a lawm zual em em mai a.Khatia ka awm mai mai lai ka hnungzanga an beng thum dum mai ka han beng thum ve dum mai kha,bang awng a tangin Kan headmaster ngei mai khan min lo bih thla chu lo niin...Lalduhawma ninhlei zar ka zo ta a nih kha...Brother a lo lut,min rawn mal melh ta kul mai chuh! Vanpui a chim hi a ni ngawt mai!A harh ber Duhawma lah fel ber awmin a awm hle hle tawh mai si a,ka mal tawrh lo thei ta lo a ni!Chuan Class IX C roomah min hruai phei a,Period khat chhung zet a bulah,duat takin,pa in a fapa a hnathawhna hmuna a hruai ang maiin min han thuttir ta reuh a nih kha....!Chutah hun a tawpa duat deuhva min kuah hnuah " Nichina a thianpa hnunga a tih dan" tih pah in a kutphah lianpui mai khan ka hnungzangah min han DUAT dum maiah....A na lo,Ka zak,Nia Ka zak lutuk!! "Awng bih suh" tih pawizia hi ka va tel chiang bik em em ve le!He mi ni hian period khat chhung promotion ka hmu ve a nih chu..a lawmnanhnung zangah Dhuum!!!Lalduhawma vang vek a ni.Hepa hi a sual a nia aw,a chak ropui si,a lo lian deuh bawk si,tumkhat pawh Thakthing bazar kawngpui chhovah hiam ruah sur berh lai takin chirhdiakah min bin!Ka berh vek! Ka haw tak tak a ni...Thianpa Malsawmkima (Musa) lah chuan " Wrestling i en ve ngai nang e" min ti zui et a,mi tihfai lah chu tum bik der lo,an inthenawm hnaia,an in tan ru a ni chiang mai. Bangladesh TV a Wresling chhuah thin lai kha a ni a!En te chu en ve bawk thin e,in rin loh lai a in bin thut te chuan tunge in veng hman ang.."Mission veng ho hi in sual reng reng" te ka ti ta vel mai mai a nih kha.A lo dik a ni chek a niang chu, Makpa a tan min duh ta lem lo pawh an awm ve maithei a sin!

by- Pu Rinliana