NAE SALANG JENNY YELI

Tuahpui leh vau te an lo vul leh ang a

Kan hlim lai nite zawng koh kir theih an chang tawh dawn si lo

                Hun a liam a, chu chuan nunhlui a liampui si. Ka zawng ruai a, tawnni her  thei si lo.

Kum 8 kalta kha a ni a, a ni, kha nipui hun duhawm tak kha a ni, ka hmangaih Yeli ka tawn hmasak ber ni chu.  Zirna avangin vai ram khawlum takah chuan chhungte ngai tak chung chuan chhunni  ka hmang liam ve thin a. Zirna lamah theih tawp chhuahin kan lo awm thin. Hetiang em em a ka thinlung luahtu ka tawng ang tih reng ka ngaihtuah pha lo.

Ni 23, March, 2003 a ni a, kan Biakin pan chuan ka kal a. Mipui lo chhawntu (Usher) tur ka nih avang chuan ka thleng hma hle. Kan biakin hi sap ho kaihhruaina hnuaiah  Foreigner-te nena inkhawm thin kan ni a. Chumi ni pawh chuan mikhual tam tak awm chuan ka mit an la hran pa lo. Tan hun tep tawha  hmeichhe lo lut chuan ka mit a la tat lat mai. Aw!!  Theih nise khang hunte khan lo inhre lo i la a tha zawk tur. Khuanu ruat kan ni si lo. Inkhawm chhung zawng chuan ka melh ru fova, a bahsam sei leh a mit meng  mawi takte chuan keimahah thu nasa takin an sawi si.

                      Inkhawm banah Sunday sikul kan nei thin a, ka hma zawnah chuan a thu a, chutah chuan ka beisei loh thil ka tawng ta. Amah, ka hmaa thu ngei chuan no nalh tak  hian min lo melh a, ka mit a hmuh veleh chuan rang takin a la sawn ta thuai a. Aw.. Ka tan khang hun reng a lawmawm kha a awm leh ngai em le? A leh pek beisei ran chung chuan an motor-a a lut chu ka thlah liam a, keipawh chuan phur tak chuan kan College lam chu ka pan ve ta a.

                     Hun a liam a,thla a liam meuh chuan tumah dang reng kan ngai ta lo. A kianga awm ka thlahlel em em a, a tel lova kar khat hman pawh chu harsa ka ti thin. Pathianni a inhmuh ringawt chu duh tawk lovin bazar hmunah te kan inhmu fo a, vawi khat leng tura min sawmna ka chhan tum kha, kha mi ni khan hlimna, hlimna tam tak kan tawng a nih kha. Khang hun lai kha chuan hlimna chu kan ta a ni a, lungngaihna lam thu reng kan Dictionary-ah a awm si lo. Ka la hriat reng  chu, zanlai ah mi rawn Call a,

“El, dangsin-eul salanghabnida”

engmah dang a sawi zawm lo, a awki atang chuan a hlimawm lam a ni tih ka hre thei mai a. Thla engin a lung a tih len thu leh ka kianga awm a chak thu a rawn sawi paha a tawng khur hlawk hlawkte chu ka bengthlaah a la cham reng thin. Chumi zan chuan rei tawk tak kan inbia a, kawlkila thla a liam hnu chuan mang lama intawng leh ngei turin duhsakna kan inhlan ta a.

Kan harsatna inhrethiam chung zel chuan kum chu a lo vei  ve ta reng  mai. Chawlh hmanga ka let leh hnu chuan thil duhawm lo tak a awm tih chu ka hai ta lo. Mizoram-a ka awm chhung khan  ka chhungte ka zah avangin  ka be ngai lova, ka Number pawh ka pe hek lo. Mahse chung zawng zawng chu a hrethiam a, mahse kan tan thenna kawl a eng  ta si.  Ka lehkha zir lai chuan mi rawn be leh a, ka thu hriat chu ka va duh lo tak em. Chawlh hmangin Seoul  a pan dawn a, thla hnih vel a cham dawn a ni. Ka hnual ruih a, sawi  tur reng ka hre lo. Amah pawhin a chak loh thu leh a chhungte thu a hnial ngam loh thu a sawi laite chuan a inhnit faih faih a, theih nise kumkhuaa ka kianga awm a chak thute, a hlimna ber a nih thu a sawite chuan kan chan tur a thlak thei si lo.

                   Pathianni  lo thleng tur chu  kan hman dun hnuhnung ber a nih kan rin avang chuan inkhawm ban veleh chuan kawtthler kan fang dun a, GM Park-ah chuan tlai ni tlak dawn thleng chuan inkutsuih rialin kan thu dun a, ka van ngai tak em khang hunte kha. Mahse koh kir theih an chang tawh si lo.

“How long will you stay there?”

“About 2 months, but I`m not sure what my parents arrange things”

“I`m gonna miss you”

“El, I already miss you since now”

“Li, dangsin-eul salanghabnida”

                     A nui sen sen a…

“El, naega dangsi-eul neomu salanghae”

                     Delhi  airport atangin ka pawn be leh ang che, chu bak chu ka chhungte hian an remti vak lova a ti a. Nia, thil awmzia chu ka hria a lawm. Anni ang mi neinung  makpa atan chuan kei  michhe daikil kara mi hi ka tling lo em a ni. Thil awmzia ka hrilh hnu chuan ka awmah a rawn bei hnawk a, biang no tekah chuan mittuia a luang thla zai  zai a. A mittui lo luang hruk sak pah chuan a  hmui nem tak mai chu duh thawh takin ka fawp a, inthlahlel tak chung chuan hawn zai kan rel ve ta a.

Inbe lova ni hnih hman chu a hrehawm duh ngei mai, a ni thumna zanah chuan ka Yeli chuan mi rawn be leh ta. A tawng a thawp set a, a awki ngaihthlak a nuam lem lo khawp  mai. A thaw halh halh reng a, a tawng chu a khawk deuh avang chuan hmun zimteah a awm a ni tih ka hre mai a.

“El, I`d rather have you than Nations, countries and even history. Will you please run with me?”

                     A thusawi dan atang chuan a rilru a hah hle tih ka hre mai a. Chhan ngaihna mai ka hre lo. A rawn chhunzawm leh a. A sawi dan chuan, Delhi an thlen hnu lawk chuan  a nu leh  pate chuan India rama a let leh dawn loh tur thu an hrilh hi a lo ni a. Ka kianga a awm theihna a nih dawn phawt chuan engkim a inhuam thu min hrilh a. Ka ngaihtuahna a buai khawp  mai. Kei lah zirlai mai ka la ni si. Mahse tihngaihna a awm si lo. Taxi a hmuh hmasak ber pan tur leh a Cell chu pe turin ka hrilh ta a. Rei vak lo hnu chuan Driver chu a rawn tawng a, ka Hindi thiam zawng zawng hmang chuan Mizoram House, Chanakyapuri  panpui turin ka hrilh a, harsatna a tawk a nih vaih chuan mawh a phur tur thu ka hrulh bawk a. Amah Yeli hnenah chuan ‘Zaninah ka rawn kal nghal ang’ ka tih hnu chuan kan inbiakna chu kan titawp ta a.

Inthlahrung tak chuan kan Hostel Warden mu lai chu ka zuk kai tho a, ka nau Delhi a lehkha zir a dam loh thu leh kal ngei ngei a ngaih thu ka hrilh hnu chuan ISBT lam ka pan ta a. Rilru  a hmanhmawh bawk a ni ang. Darkar ruk tlan chhung pawh a rei ngei mai. Delhi ka thlen chuan Mizoram House ka pan ta thuai a. Kawngka chu a lo in hawng huai a, ka zuk luh chuan hlau leh thlabar hmel takin ka hmangaih Yeli chuan mi lo thlir a, aw..ka va khawngaih tak em. Thlahlel taka kan inkuah hnu chuan chumi hmuna awm chu a him loh thu leh ka thiante kan pan mai a that zawk ka rin thu ka hrilh a, ka thiante ka biak kual hnu chuan Lajpat Nagar lama ka thiante in pan chuan kan chhuak leh ta nghal a.

                        Yeni chu a phone ka switch off tir a, biak ngaihna an hriat tak lohah chuan an ngaih a tha lo ngang mai,. Kan College lam thleng thleng chuan an lo han bia chu ni in, ka thianten ka awmna min zawt tha taka ka chhang kha a pawi ta ber mai. Zing dar ruk velah chuan kawngka chu an rawn kik dawt dawt a, khatih hunlaia Yeni thlaphang hmel kha ka mitthlaan a la cham reng thin. Nghet takin min kuah a, khawiah mah ka kalsan lovang che a ti a. Ka thiannu`n kawngka a va hawn chuan Yeni nu leh pa bakah Police Officer pakhat hi an lo lut a, ka kiang ata chu min laksak a. Mittui nen min liamsan ta.

Tunah chuan a thi nge a dam tih pawh ka hre tawh si lo. Biak ngaihna ka hre si lo. Internet-a Jenny Yeli ka zawn reng rengin a chhannaah ka lungawi ngai lova, ka Yeli ka hmu thei si lo. A tana ka tih theih awm chhun chu hei ka rawn dah e.

Nae selang  Li,

Dangsin-eul salanghabnida

Nan hangsang dangsin-eul salanghabnida

Salang-eulo

El