Nghilhni awm lo tur nunhluite - II : A trip to an old town

                        A rei ta hle mai. Pawl sarih ka zawh kum a ni a, hemi tum hian ka pain an khaw hluia kalpuiah min sawm a. Kei leh ka ni fapa (cousin) chu kan kal ve a.

                       Kan khua atang chuan zing ni chhuah rualin kan chhuak a, kan kalna tur chu Bazarpui lam atanga kal a ngaih avang chuan Bazar lam kan pan phei a. Thingpuite kan in zawh hnu chuan kan kal tumna lam chu kan pan tan ta a. Thui pawh kan kal hma atang chuan in chu a khat nghal pharh mai a, dai kan thlen chuan kan khua chu kan thlir let a, chuti ang em em a kan khua a mawi chu ka la hre ngai lo. Zawi muang chuan kan kal thla ta bauh bauh a, naupang mai kan la nih avang pawh a ni ang ka pa chuan muang chang hian min kalpui a. Hemi tum hian kei, ka pa, ka unaupa leh ka thianpa kan kal a, boruak a nawm em avang leh la kal ngailohna a nih avang chuan chau pawh hre chang lo chuan kan ti ti thla mawlh mawlh a. Kawng sira thing dingte chu tu emaw kut hleiin a kut thak hnawih nan a hmang  a ni tih hriat tak hian an lo ther neng nung a, kawr ruam thuk tak tak te kan kal pel a, lung lian tak kan hmuh pakhat pawh lung thang thei an ti a ni awm e, mahse tun thlengin ka la awih lo. Lung than thu a awm dawn em ni?

                     Ruam leh kawr, di hmun leh mau hmun kan pelh zut zut hnu chuan lui kan thleng ta hlawl a. Hemi lui hi kawng chanve a an ngaih a ni a. Chhun lai taka thleng kan nih avang chuan thim hlimah kan thlen a rin thu ka pa`n a sawi chuan kan phur ta mah a. Lui tuia kan inphih harh lai chuan ka pa chuan lui sangha man dan a lo ngaihtuah a, thlang lam hla takah chuan thawm dim tak hian sangha a lo zawng chu niin. Keini hre lo chuan kan zu zawng a, aw rawl tawp tawp a kan auh hnu chuan a rawn kuk raih a, kan hrethiam ve ta chauh a. Hemi atang hian kan pipute nundan mawi tak pakhat, mikhualnaa hmeh hawn ngei an duhna thinlung chu ka hrethiam ve ta. Tui cheng tur chuan kan chho leh ta  a, lungpher zau pui maiah chuan mihring lenna vel tur a lo khuar kuk mai a, chuta luh nuam kan tihzia te kha aw…

                       Rei vak lo hnu chuan ka pa chu a rawn chho a, ipte pui, ang hawk khawpa a rawn ahah chuan enge awm tih chu inzawh a ngai hran lo. A intleuh ve hnu chuan kan tum lam chu kan pan leh ta a. Tlang pangperah chuan kan chho ta zel a, chung lai hmun velah chuan hmanah ka pate chuan lo an lo nei tawh a ni awm a. Lung a leng ve duh ngawt ang. Thlifim chu a rawn thaw reng a, kan thian thum chuan kan inbe chho nak nak a, sawi tur kan ngah hlawm ngang  mai. Kan nui chho bawk bawk reng a, a tlang leh lam, kham pang ti teuh toh a kan kal lo chu kan lawmziate chu kan sawi kai vel ta mai mai a. Midang lo kal ve te chuan a kawngbun (shortcut) lam atang chuan an kal zel a, keini naupang mai tana kal a har avang chuan ka pa chuan a phal ve si lo. Chhun nisa a kal kan nih avang chuan dang a lo ro a, tui in tur nei kan lo awm si lo. Ka pa chuan tui thuhruk kan thleng tep tawh a ti mai zel a, chutiang awm theihna reng kan hmu thiam lo. A ni lah tak a, kan hma pen ruk vel awm a a awm hnu pawh chuan kan la hmu chuang lo.

Ri nawk nawk chung chuan kan kal chho zel a, khua kan hnaih ta hle tih chu kawtchhuah kan thlen chuan a hriat theih mai a, kan chhoh zel chuan thing hmun nuam tak kan thleng chho a, chumi ah chuan khaw hungna an lo siam a, thing hian an lo ping ruah mai a, Film-a kan hmuh thinte kan han hrechhuak ve leh hnuhnawh a. Chumi kan pelh hnu chuan thlanmual kan thleng a, khua kan lut chho tan ta. A khaw thleng han mawi dan kha aw..

                        Kan chhungte inah kan thleng rawih a, hemi te hi an khuaah chuan a hausa pawl an ni ve ngei ang. An in chung pawh rangva ngat asin!! Khua hian tui an harsat em avangin kan insil thuak thuak hnu chuan tlai ni tla tur chu kan thlir ta veng veng ringaw a, lung a leng ve tep mawle.. Zanah chuan chhungte dang kan tlawh kual thuak thuak a, Hmeh en (torch light) ka pa`n a keng a, kan in en vek thei si lo. Vawk ek rah lo pawhin bawng ek a lo awm zel si. Khami zan kha chu kan lo va hit awm lo tak te ka ti mai mai thin. Dar kua velah chuan mu turin kan haw ta a. A boruak a nawm em avang leh chhun lama kan hah deuh avang te pawh a ni ang, zanah chuan tui takin kan muhil ta a.

Zing lamah chuan tih tur a awm lo hle mai, ka pa chuan vawk note en a duh thu a sawi a, kan kal ve a rem tih avang chuan kan zui a, hemi tum hian thil danglam deuh ka hmu ve tlat, kha vawk note khan a nei kawp!!  Chawhnu lamah chuan khaw pum chuan Biakin tuala Volley Ball khel chu an thlir thup a, keini pathum leh kan thian chhar thar chuan Football Ground, khaw pawn a awmah chuan kan va inkhel dawn emaw ni kan ti a, mahse kha tih hunlai khan naupang kha chuan an khuaah kha chuan hnang a tah bak an pet pha lo. Rei pawh kan pet hma chuan tin zai kan rel leh ta a. A bula bung lian tak, a khua tilartu ah chuan intih hlimna kan zawng ta zawk a. Ram hrui kan chhat a, a zar lian tawkah chuan kan bat a, chumi hmang chuan kan kuai kur a, kan inthen chho kha a ni a. A then sanzia leh mahni chauh a chuan hlauhawmziate  kha.. Feh hawng an lo haw hnu chuan tin zai kan rel ve ta a.

                        Hemi zan hian kan thianpa chuan an khuaa T.V. nei pahnih zinga pakhat inah chuan min enpui a chak ta tlat mai. Ka la hre reng, hemi zan hian Jet Lee channa kan en a, a film hming erawh ka hre thei ta lo. Kan en zawh hnu chuan kan thlenna in chu kan pan leh ta a. Zing khawvar nghakhlel tak chung chuan mut zai kan rel leh ta a.

                      A tuk khua chu a nawm dan a dang ta, kan haw hun a nih tawh avang chuan thil nuam danglam kan beisei avang pawh a ni ang. Mahse, hemi ni pawh hian nuam chu kan tawng nual tho. Kawtchhuah leh lam zawkah bak puk kan en a, chu bak puk chu a thui hmel khawp mai, khaw thenawmte bak puk nen a inzawm an ti. Kawi duh vangin thing sang tak takte kan lawn a, hemi tum pawh hian kan inperhchhuah (in gaya) nghe nghe.  Thla la tur ringawtin bung kung kan pan leh a, ka unaupa nena kan din dun hnu chuan Roll Film a awm lo tih ka pa khan a hre chiah!! Hemi ka zin tum hi nuam ka tih the lul nen, thil tih hman loh ka nei nual mai, sakawr insual ka en hman lova, Pu Lalthanhawla`n Helicopter a a tlawh tum a a tumna ka hmu hman lo bawk… Tlai lamah chuan ngai tak chung leh thlahlel lo chung chuan kan khua pan chuan kan liam san ve leh ta a. Engtikah tak kal leh angi i maw???