Nghihni awm lo tur nunhluite III : Fan ngai loh ram Zawlkhawpui chu

              Ka pi leh pute`n Aizawl an kalnaah min hruai ve an tum thu ka hriata ka lawmna aia nasa a ka lawm leh pawh hi ka la hre lo. Kum 5 chauh ka la ni a, chaw ei dawhkanah chuan kan thu bial laih a, ka puin, ‘Mapuia hi kan hruai ve dawn nia’ a tih lai a ka lawmzia kha aw. Puar lo chung chuan ka kham a, kawtzawla thiante pawnto hnena ka Chanchin Tha ka va hrilh laite kha ka la hre reng. An pawnto lai chu bansanin kei chu min mi ropui chei ta kha a ni a, ka ding leh veia thaw tha thei lo hiala min pawhte pawh kha ka dem hauh lo. Nia, dem chi an ni lova, dem chi kan ni lo. Kan nute`n Aizawl atanga Masi thawmhnaw min rawn hawn kan hakte kha kan Aizawl hnaih ber ber kha ni a, chak sa teh mahila keini ang naupang kha chu kan kal ngai lo. Thianten Aizawl ka thlen huna an hming theuh lam tura min chah hnu chuan kan tin ta a.

            Zanah chuan ka mu lo tih chu enge thil dang ka tih reng ka hre lo. Ka suangtuahna chuan Aizawl chu a fang nasa ngang mai a, in chhawng lian pui pui te, motor tam tawk te leh mihring tam tak hmu tura ka inngaihtuah chuan ka hlim veng veng a, ka helhhawlh nasa ngang mai. Mut pawh mu ta lo chuan ka pi leh pu te nen chuan zing dar nga velah chuan kan khua atanga Aizawl pan tur bus chu kan chang ta ran a, bus lo thlen lai leh chhungte nena kan inthlah lai chu ka hre reng tawh lo chungin ka hlim viau tho ka ring tlat.

          Tuirial lei kan zawh laia kan venga khawnvartui rawn sem thin ka ni Hruaii`n min pawm a `Hei hi tuirial lei a nih hi` a tih lai erawh ka la hre chiang em em a, mahse Aizawl kan thlen tep tawh leh tawh loh erawh ka hre chuang lo. Bawngkawn pelh hnu, Zemabawk rawn luh phei tan, sipai hmun vel a ram hnimpar lo par eng chiaite kha ka la hre reng, ka rilrua ka lo suangtuah dan nen a va inang lo ka tih ruk laite pawh ka la hria.

Vawi khat ka pu nen kan bazaar kan haw, ka puin tuboh a khai a, Zodin fly-over kan kal laite chiang takin ka mitthlaah a la cham reng a, khang hun ka thilr kir chang khan fam chang tawh ka pi leh pu ngaih a zual leh thin. Vanapa Hall min kawhhmuh laia ka beisei ang a nih loh thute, kan veng Community Hall nen a intiat chiaha ka hriat thu ka ngaihtuah nauh nauh laite khan engatinge ka sawichhuah kher loh le ka ti hnuhnawh. Mizia hi a lo inthlak tak tak thei lo pawh a ni mahna. Sikulpuikawn atanga Mission Veng  panna shortcut pawh ka la hre reng a, khami tuma ka pu nena kan kal dun kha nuam ka la ti reng thin.

               Kawng pathum a awm a, a laiah chuan kan chho ang a, ding lamah kan kual ang a, a piah lawk thlang lam chu  ka pute in awmna a ni tih chu kha mi tuma kan kal khan ka hria a, ka hre rei ve ngawt mai. Ka pute in lian ka tihzia leh an mut pindan changkang ka tih thute kha ka sawichhuak kher lova, mahse tun hnua ka kal leh hian a lo len  bik lohzia ka hre leh chauh. Zanah TV kan en a, remote-a ka duh duh ka hmeh laia ka pu`n `Mapui, hmet hmet mah t ache` a tih laia engtin mah a danglam loh thu ka chhan hnu a, amah a TV a lo thih ringawt hnu pawh khan Timer/Sleep ka hmet tih ka hre lo reng reng. Bathlar thlang lam atanga Tlangnuam veng lo lang ut kha khaw dang a nih leh nih loh ka zawt pawh kha ka inthiam lo bik lo, naupang kum 5 mi, tuala chawngzawng sawt mai mai pawh thlir reng peih, a vawi khat nana Aizawl  kal kha ka ni miau a. Zana kan mu tur pindan min kawhhmuh a, khum lian tawk maia ka pi leh ka  pu inkara ka in thawlh thawk laite kha ka la hre reng, tunah an awm ve tawh si lo.

              Ka pute in kawtah chuan kan chhungte tho an awm a,  chaw ei tura min sawm khan sangha  chum kan hmeh tih pawh ka la hria, tawngtai laia kei aia naupang gas cylinder chunga thu tla ri bur pawh kha ka la hre reng. Ka patea nena lollipop kuang ang deuh chunga milem, tuai vir zawnga lam siau siau thei kan inchuh laite kha nghilhni reng an awm lovang. Mahse, Aizawl Hospital awmna erawh ka hriat thelh ta a ni. Mission veng leh Vengthlang inrina Kulikawn lam phei a awm ni khan ka hria a, mahse ka demawm loh, naupang kum nga mi chauh ka la ni tlat a tin ni. Haw kawng a ka luak ka la hria a , telephone lem min lei tih pawh ka la hria, mahse Thul mawnga ka dah nia ka hriat laia ka hmu zo ta miah lo kha chu mak ka la ti reng thin. Haw hnua thiante min lo lawm dan zawng zawng chu bung dangah kan ti leh dawn nia.