Apr 21, 2011

Vul lai nei lo Hmangaihna chu

             Hun leh ni liam zelte chuan liampui ve zai reng an rel si lo. Zing dar thum a ri tawh a, nunhlui  ngaih chuan kian zai a rel chuang lo. Ka khumah chuan ka let let a, hlim taka kan nuih dun laite chu mitthlaah a lo lang  chuai chuai a.
            Kan khuaah chuan High School pakhat chauh a awm avang chuan naupang chu kan inhre bel em em a, tumah innel bik pawh awm hran lo chuan kan inkawm dial dial thin. Pawl sarih leh pawl riat kan nih chuan kan sikul aiawh chuan Sport-ah kan chhuak ve a, nuam kan tiin khaw danga kal chu kan phur hle thin. Zirna lamah mite kan phak lohna chuan infiamna lamah kan theih vang pawh ni lo chuan min tilar a, kan khawpum chuan min hre ve vek thin. Tun khat kan Sikul Football-a kan Champion tum  kha chu a va han nuam tak em aw!!
             Pawl kua kan nih kum chuan chhungte thu awih loh intihhmuh lai a ni a, a tua pawh kha kan inla pa em em ringawt a nih kha. Chumi kum chuan kan khaw thenawm atang hian thiandun pahnih hi kan sikulah an rawn lut a, ka la hre reng. Ka duh aiin ka hre rei mah mah ta a nih hi.
An thiandun chuan midang pawh ngai lem lo tak hian an inkawm thin a, chawlhlawk laite chuan sikul hnunga thutnaah chuan an thu thin a nih kha. Tum khat chu ka zahtheihloh bik vang pawh ni lovin, ka insum theih ngang loh avang chuan ka va be ve tawp a, khatih laia Rintei nui hmel kha ka mitthlaan a la cham reng. Kha mi zana ka muttilh theih loh chhan kha amah vang a ni a, zanin thleng pawhin min la thlah si lo. Aw!! Rinte, ka va ngai tak che em.
               Kha mi nia ka biak che avanga thianten min thikziate, nangmah avang vek a sin. Kan lo innel chho zel a, sikul sport inkhuaa kan neih a in ina thleng tura min sawm laite kha aw, koh kir theih nise chuan thiante hmai eng  pawh zah lovin ka rawn thleng ngei ang. Kha tih lai khan thil ka la hrethiam lova min ngaidam ang che aw. Khami tuma i pate sikul kan hneh loh chhante kha eng dang vang a ni lo asin. Ka ke nat chhuanlama ka chawlh daihnate kha thil dang vang a ni lo. Ka rilru tak tak chu sawi ngamin sawi thiam i la chuan maw, hlim takin hun kan hmang dun tur. Kum tawp exam dawn thleng pawh khan ka la sawi ngam lova, i chetziaa i lantirte kha chu ka hmuh hmaih lo, mahse hrethiam turin ka mit a var ve si lo. Exam zawh in khuaa i haw turte kha kan sikul thlang atang khan ka lo thlir reng che a sin. Khami ni kha i hmel ka hmuh hnuhnung ber tur tih chu hria i la chuan khatiang khan ka liam tir lo tur.
                  Result puan dawn zana i thihthu ka hriat khan ka ring lova, ka phal hek lo. Mahse inkhua pana pawndum nena kan rawn kal khan a tichiang a, i thiannu bula i awm ve lo kha hmuh har ka ti a sin.  I kuang mawi tak maia an zalh a, thlan khur thuk taka an thlak lai che khan mipa ka tap a, ka mittui a luang asin. Tlai kan haw tur kan zirtirtupain min kohva, i nuin min hmuh a duh thu a sawi khan mak ka ti a, i kutziak mawi tak min hmuh chuan mak ka tih a zual asin. Vawi tam tak ka chhiar a, ka chhiar nawn bawk a, mak ka ti a, pawi ka ti vawng vawng thin asin. Mahse, a tlai zo tawh si.

Rinte, vangkhaw mawi a lam ang ka rawn let leh hun chuan maw,
Chham ang i zalna piallei thim chu rawn belin
Nau ang tah zai ka rel dawn e ngaih luat vang chein
A nu lehkha min pek chu ka chhiar nawn leh a, ka mittui chu ka dang zo lo. Vai ho rak bengchheng tak ka hriat chuan min tiharh a, keipawh chu mu ta lo chuan College kal tur chuan ka inbuatsaih ve ta a.
“Aw, thihna hi maw nang nen min suihzawmtu chu, hriatthiam a va har tak em!!!”  

No comments:

Post a Comment