Tawnmang Lasi

Zan thla eng dul ruih maiah chuan lui tui chu fawn ri hlup hlup a, chingpirinu hram kurh kurh leh khuangbai chiri ri cher cher te, ral lehlama sihal lo u te bak chu ri hriat tur reng a awm tawh lo. Kal lehna tur chuang ka hriat loh avangin lung chunga thu chung chuan tuiah ka ke chu ka chhek ka chhek a, rilruin nupui fanau thlaphan turzia leh an mangan dan tur hre reng mahila tih theih ka nei si lo. Sakawlh leh misual laka inven nan tiin ka chemte chu ka hum reng a. Ka meipui chheh pawh chuan vam lam pan lovin mih lam min pansan a. Chu zan khawhar tak leh tihbaiawm takah chuan mut mai chu a har ngang mai. Chhun lama kan sa pelh laite chu ka mitthla a, ka thiante nena kan inhloh dan reng ka ngaihtuah chhuak thei lo. Boruak chu a vawt deuh vur a, ram chin hriatlohna a sapelh hlauhawmziate chu hre reng mahila, kha ti em em a nunau dimlotu keipui chu ka hua a, khua a tih danah chu tlawmah ka tlat a. Chumi ka ngaihtuah zawng ringawt pawh chuan tha a la na a. A chaldarah tak mai chuan ka silai ngei maia han kah chu ka la chak reng a. “Ka hmaa i rawn chhuah hun hun chu i hnuk chhah ni a ni ang” ti sup sup pah chuan ka silai dawt chu ka chhemfai hlarh hlarh a. A hnu ka chhui zelnaah helai velah hian a awm tih a hriat a. Inring renga awm chu him bera ka hriat avang chuan mut zai rel ta lo chuan zing khawvar nghah chu nghah ka tum ta zawk a.

Chhun lama kan hah tawng khawng vangte pawh a ni ang, khawfing chah dawn vel chuan ka lo muhil  deuh sek  a, ka mumangah chuan ram nuam tak hring cham duai maiah chuan ka awm a. Mi kal hmuh tur awm reng an awm lo. Tlang chhip lam pan chuan ka chho zel a, thinghmun ka luh dawn lai tak chuan ka hnung atang hian mi, a awm ka hriat ngai reng reng loh chuan mi lo ko a. Ka han leh hawi chuan ka hnung lawkah chuan nula hmeltha leh duhawm tak mai, a sam a dara uai thla hniang chu kan keipui hliam ngei chunga chuang hi ka hmu a. Rang taka ka silaia ka tin lai chuan chu nula chuan aw nem leh dam tak chuan mi lo khap a, ani hi chu awm lo selang chuan a chaldarah tak chuan  verh ang a. Phuba chu ka la ngei ang le. A chuanna atanga rawn chhuk chuan ka lam panin a rawn kal a. A sakhmel leh pianziaah chuan sel tur reng ka hre lo. A sam sei tak chuan a mawng bawr nalh tak chu a vaw hnap a, a puan bihin a khuh phak loh a mal var takte chuan mit a titlai ngei mai. Kan keipui pawh chuan chet a la dawn lo tih a hriat takah chuan ka silai chu ka dah hniam a, ka lam pana lo kal chu ka lo thlir ta reng a.

A tuithawl pai atanga tui a thlit pah chuan, “Kha hei hi in rawh, chawlh hahdam i mamawh a nih kha” tiin min tawng thlamuan a. Ka thla erawh a muan phah der lo. “Kha lai lungah khan i thu ang hmiang”  tih leh kal a rual a, keipawh chuan ka pan ve mai a. Nangpawh chawl hahdam rawh tia a hrilh hnu chuan sakei pawh chu phaitual hnim bawh chuan a chawl hahdam ve ta a. Chu lai hmuna ka awm chhan min zawh chuan pasaltha ramchhuak ka nih thu leh kan khaw chhung a sa rawn lut ka umzui thute, chu sa chu ama rawn chuanna ngei a ni tih ka sawi laite chuan a hmel  hmuh a nuam lo hle mai a, mahse chu chu chuti lai hmuna ka awm chhan chu a ni tlat si. Chung ka sawi lai chuan sakei chuan hlauh hlel tak chuan a lo thlir dauh dauh a, a ngek ngher ngher bawk a. A kut nem leh vawt raih mai chuan ka kut chu a rawn vuan a, chunglai ram vela lalnu a nih thu te, hmel hriat ngai loha hmuh avanga mak a tih thu leh mi rawn pawh dante chu a sawi siam siam a. Kar loah chuan ka nel hman hle tih chu ka hre thei. Phaizawl hring dup mai kawh pah chuan an pasalthate nunchan zirna a nih thu a sawi lai chuan a kut chu ka hmer na zual sauh a, na ti hmel reng a pu chuang lo. Mi rawn melh zeuh tih mai loh chu engtin mah danglamna a awm lo. A hmel chu ka en a, ka en nawn leh a, ka en ning thei lo. Keimah ka inveng thei lo a ni ber mai, a biangah chuan ka va dawm a. A duhawmzia te, a ngaihnobeiziate  ka sawi lai te chuan a nui sen sen a, a mit meng mawi taka min melh chuan ka zam lek lek hialin ka hria. “I chau awm si a, mu hahdam ta che” a ti a. A mal kham chung chuan ka mu ta a.

Tlangchhip a ngaw thim khup mai a kawh pah chuan chung lai vel chu an khaw awmna a nih thu min hrilh a, an khua chu tlawh ve tur chuan min sawm ngei tih chu ka la hre thei. Eng eng emaw sawi chuan kan titi dun zel a, ka haw hun tur min zawh chuan ka hriat mai loh thu bakin ka chhang lo. A ni reng a, a bula awm chu ka thlahlel ngawih ngawih a ni der si. Pasaltha ramchhuak ka nih thu te ka sawi lai chuan “I hlawhtling dawn lo a ni maw” tiin mi lo fiam a, hlawhchhama haw ka tum loh thu ka sawi hnu chuan a hmel chu hmuh theihin a lo inthlak danglam ka hmu a. Rei fe a ngawih hnu chuan nia i hlawhtling dawn nia a ti a. Mahse hei hi hre reng ang che, amah hi ka thiante zinga ka ngainat ber leh ka hmangaih ber a ni a. A tel lo chuan hrehawm ka ti ngawt ang. Mahse a phu tawh a ni, kar khat vel chhung min tlanbosan a, rim taka ka zawn pawhin ka hmu reng reng lo. In khaw lama pawi a khawih avang chuan a phu a ni a ti a, mahse a hmel chuan a khawngaihthu chu a sawi  si. A hmel ka hmuh chuan ka khawngaih ta em em a, a mittui rawn luang thla chuan ka biang a rawn far a,a kuta rrawn hruk pah chuan “I hawn dawn  a nia, a phu a lawm” a ti a. “Mahse, nangmah nilovin midang kut atangin a ni ang. Nang chu ka ngaina em em che a, nangin ka ngainat ber i thah chuan kan khawnbawlte ngaihdan a ni lo ang” a ti a. Ka khawngaih hle mai a, mahse ka nihna leh kan khaw mite hmelma chu ka hmelma a ni si. Sakei chu a lal ram chhuahsan tura a hrilh lai chuan a mittui chu a parawl kuang a, sakei pawh chuan muang chang chuan min kiansan ve ta a.

Min hmuh phat atanga min nel nghal thu te, min ngainat nghal thu a sawi pah chuan ka sam chu a chul heuh heuh a, a baksam leng chuan ka hmai a rawn hawl laite chuan ka muhil diar diar a, an khua fang tura min sawm chuan ka chak thu leh ka tum ngei tur thu a ka chhan chu ka la hre thei. Silai ri dur ka hriat chuan min tiharh zawk a, ka silai ka chuh hman reng reng lo. Ka thlangah chuan sakei lian tak chu a lo tlu ruah mai a. Ka awmna an rawn thlen chuan ka thianpa chuan, “Nizan zankhuain kan zawng che alawm, nang lah chu he tah i lo rui mai mai a, kha tunah pawh i inven hman miah loh kha. A zia lo lutuk” a tih chuan chhan ngaihna reng ka hre lo. Sa lakah chuan kut thlak chu ka duh ta miah lova, haw kawngahte chuan zawn ve reng ka tum ta lo. Kawtchhuah thlen dawn hnaihah chuan kan chawl a,a hliam hmasa bertu ka nih avang chuan tlang tlir tur chuan min ti a. Ka hreh ngang mai a, mahse chu chu ka hnar theih a ni tawh si lo. Rawngma mual kan thlen chuan kan khua chu a lang ta ut mai le. Kan indah fel hnu chuan chang tum tur chuan ka ding ta a. Lehlam tlang chhipa ramngaw thim chhah mup chu ka thir a, tih mai har ka va ti take m. Inthiam lo tak chuan ka hna chu ka tlin thei ta hram a, ka va hawi leh chuan tlang chungah chuan romei a lo zam paw chiai mai a, pipute sawi thin, romei a zam chuan Khuanu a lawm tihna an tih hre reng chung chuan khaw lam pan chuan kan inkawt chho leh ta a.

                                                                                                                                Chhunzawm tur….