Ro sum ka ngai

Ka riltam chuan ka chhun mu chu mi rawn ti harh a, eitur ka neih lohzia ka hriat chuan ka riltam a hnem chuang si lo. Chutia patling than kin zet riltama awm chu a tha lo e tiin neih theih dan kan zawng a. Puk tur ka zawng dawn a ni. Tu ta nge ka puk tak ang??

Thianpa Hruaia hi chu dil lo phawt i la, lo nei ta pawh ni se a mamawh thuin min chhang leh ngei ang tih lah chu tlang hriat a ni si. Zonuna ve hi, E!! ni lul love, ani zawng hmanni lawka a neih loh thu min hrilh paha puk mi dil nghaltu kha a ni a. Dil ngat ila chuan a thinrim thei hial ang tih vel a ni si.



A nei awm ber Zosanga lah chu nupui ngam loh avanga kan laka inlak hranna a rei tawh si. Belh tur ka va vai tak em!! Rilru hah vanga puar theih chu nise ek chhuak tungin ka luak tuar tuar ngei ang le. Chu lah chu thil theih loh mai ni lovin theih loh thil a ni si.

Ruah sur cherh cherh karah chuan ATM ka pan a, a awm loh turzia chu chiang hle mah ila va chian lehzual ka duh a, vanneih thilthuah tu emaw te`n an rawn dah mai thei asin!! Ka ding ve ta ran mai a, ka hun a thlen chuan ka han hmet ve zaih zaih a, hlimna tur ka hmu chuang lo.


Beidawng takin ka let leh a, ka khuma thu chung chuan eiru faten hman sen loh an neih laia, kei hetia ka awm bik chu ka lungawi thei lo. Hmana hna ka dil ve lai a kei aia thiam lo zawk, sawipuitu neih that vang a an lakte chu ka ngaihtuah let a, ka lug a damlo thar leh zel a. Eiru fapa ten duh tawk bakah hman sen loh an neih laia, kei, kei ve lai he laia ka awm hi a va tha lo tak em!!

Riltamin ka thih vaih chuan tunge ka nupui fanau chawm ang??? Tunge hmangaih taka kan ram hi mahni thuthmunah lo vei tawh ang?? Kei ka awm tawh si loh chuan!!Tiin ka inngaihtuah vel ta mai mai a…Tam erawh a hnem lo teh e..