Delhi-a Exam tura kal : Examlehlova chu

Delhi zin Report
"A nu, John-a te pawhi an lawm tho va, lawm ve ang u"
"Mapui, John-a nu leh pate chu an hausa alawm, bakah pawl sawnna pawh a la ni lova, pawl sawnna a nih hunah kan lawm dawn nia"
Lunghnur tak chunga kan lawm ruk thinzia kha aw!!!

Mahse thil hi duh ang hian a kal thei vek si lo a nih hi..
Kan College-ah PIC (Admit Card) la turin vawi tam tak ka kal a - mahse ka exam leh lo
Zan rei leh rei lo pawh sawi lovin ka theih ang tawkin ka inzir ve a - mahse ka exam leh lo
Chhungte hnenah Delhi-a Exam tura kal nan sum thahnem tak ka dil a- mahse ka exam leh lo
Zan khawvawt hnuaiah Bus-in Delhi ka pan vang vang a - mahse ka exam leh lo
Zing hma tawka thoin UPSC Examination Hall ka pan a - mahse ka exam leh lo

Nia, exam tura kal ka nih avangin thiante fin nghal tawp chuan buaina(?)  a chhuak thei ang tih ka hlauhthawn avangin Mizoram House ka pan a, Security chu a lo tha ve phian a (hun danga Mizoram House ang lo takin), pawn atangin duh duh hunah a luh mai mai theih loh. Check In ka duh avangin Duty mutna ka pan a, Dorm-a han chho phawta a tuk lama ti mai tura min ti chu  mak ak ti lo!! CHANGE a la awm lo tih ka hre tlat.
Kan luh chuan JNU-a an Junior Researcher, Mizo tlangval ngat hian lehkhabu a lo la chhiar a, midang zawng chu an mu tawh. Sawi duhzawng a lo inang a ni ang. Quantanisation of Space Time te, String Theory, Dark Energy leh Dark Matter, Dark Flow tih vel hlir a sawi atang chuan a tui hmel khawp  mai. PUC (Pachhunga)-a a thawh laia Office vela Pathian thu leh politics an sawi mak a tih kha chu ka la hre reng. Big Bang Theory lo dik famkim lohzia a sawi leh kan Universe pumpuia 5% chian he theory-ah hian an ngaihtuah a tih chu awi a har ka ti. Mahse a Subject chan a ni a, a sawi dik turah kan ngai ngawt a. F1 car hnuaia Diffuser atana thing an hmang a tih kha chu ka awi chiah lo nangin awi lo angin ka lang duh chuang lo. An hmang tak tak pawh a ni thei a.

F1 an en chanchin hi sawi nuam a ti khawp mai. Mizo Footballer pahnih Mapuia leh Jerry-a te nen an enho a ni awm e. Grandstand-a an luh theih chhan chu Ticket in pass chhawn awlsamna lai ber a nih vang a ni awm e. Footballer Vs Police a sawite chu sawichhawn leh pawh a nuam lo, haw tawk an lo awm leh takin.

Tuna ka thilzir hi ka 2nd Choice a ni ve khanglang a, ka tui em em lo tih chu ka nu leh pate pawhin an hria. Mahse, keimah hian bansan ka duh loh avangin ka ti la ti ve zel zawk a ni. A subject ka sawipui lai chuan ka rilru a let em em a, mahse, ka rilru tawngtaina nen 'Pathianin hei aia tha ka tan a duang a ni ang' ka ti thei hram hram a. Chumi beisei chung chuan zan ka mu a, zing hma taka thovin UPSC ka pan a, ka hma deuh avang chuan mi an tlem chu rinhlelhna awm reng ka hre lo. Thingpuite ka in hnu chuan vai palian pui mai, a hmel en mai a The Great Khali ni awm tak hi a lo kal a. Kei lah ka smart si a, ani kah Jeans leh T-shirt mai a ni si. Mi hausa fa ka ni a, ani hi ka bodyguard tihte chu ka suangtuah nauh nauh va. Ka exam tur mi zawh chuan kan lo inang a, exam center an sawn a tih chuan min barakhaih hle mai. Kan college atangin information engmah ka hmu lova, engmah ka thianten min hrilh hek lo. Ka phone ka keng lova, PCO hman tur lah a awm hek lo. Ka tana tha ber chu chupa chu zui nia ka hriat avangin ka zui ta a. UPSC chhunga Post Office-ah chuanphine hman a dil a, a pa a va bia a, a thianpa number a dil leh hnu chuan kan exam center chu Mt.Abu International School, West Rohini-ah a ni. Hla tak a ni hla tak. A hmaa lo awm kan zawh vel a, Safdarjung-ah va kal rawh u an tih kha lo zawm ngat ila chuan kei ngei pawh ka thinrim hial thei ang. Minute 30 vel Auto Rickshaw kan chan hnuah Patel Chowk Metro Station kan pan a, Rajiv Chowk (?)-ah tul miah lovin kan chhuk a, Kashmere Gate atangin Red Line kan man a, Station tawp ber West Rohini atang chuan Auto kan la a, kan center kan va thlen chuan 45mins. velin kan tlai tawh a. theih tawpa kan beih hnu pawha an phal tak si lovah chuan beidawng tak chung chuan ka haw leh ta a.

Pathianin kan tana tha turin engkim a ruat thin tih hi chu pawm a har thin a ni e.

Nghilhni reng i awm thei dawn si lo

"Khuarei hian min la hnem mah na" tia ka dawn changin, ka phal si lo kan nun khuarei an chang tur chu. Theih nise, i kianga, i thlazar hnuaia hlim tak leh thlamuang taka hun hman hi ka nuam asin. Mahse theih chang hian an mawi tawh si lo.
Ka kianga i awm chuan ka hlim a, tumah dang reng ka ngai ngai lo a nih kha. Eng hian nge maw kar min dan ta le, nang nen a intawn ni a her tawh dawn si lo. Kum sul tam vei mah se i hlui thei si lo, aw ka tawnah. Leng dang zawng chuan hlimten an duhlai tangah an bei a, kei zawng, i tel lo chuan hlimdan reng ka hre si lo.
Nunhlui ngaiin kur kur mahila, koh kir theih an chang tawh si lo.

Tawnmang - II

( Tawnmang - II kan tih ringawt chhan chu, Synod Higher Secondary School-a kan kal lai khan Tawnmang - I hmangin Udayee te, Ali te nen 'Needo' spaceship hmangin vanthengreng kan lo han fang tawh a. Tunah a pahnihna ka rawn dah a ni e. )

Nuai tam tak senga ka zir, ka zir chhuah tak lovah chuan mahni khaw lam pan turin ka puanthuah chu ka tel a, chak lovin thih hreh takin hreh mahila tihngaihna dang a awm si lo - tlanbo mai loh chu. Chu lah chu ka ngam der mai si lo, kei mi dawizep hian.

A hun chu a lo thleng ta. Sahuai ni do ni awm tak hian lei lam ka melh deuh reng a, rilruah inthiamna reng ka nei lo.A hmaa min lo hmuah dan nen chuan a dang ngei mai. Exam zawh chawlh ka haw thin lai kha chuan hlim tak khan min lo hmuak a ni thin a, tunah erawh nui hmel reng hmuh tur a awm ta lo. Ka pa hmelah beidawnna ka hmu a, ka nu hmelah erawh khwngaihna kara lungawilohna ka hmu thung. Ka u erawh chuan tawngkam na tak tak hmangin min chhaih a, chhan ngaihna reng ka hre lo. Ka khawvel chu thimin hrehawm hle mahse beiseina nei lo chu ka ni lo. Chu ka beiseina chu ka naute pahnih an ni.

Pathianin kan thatna turin engkim a thawk thin

Based on a True Story

Delhi khaw lum uap churh chu chhuahsan tum ni awm tak chuan hmanhmawh takin Auto chu ka la a, ka thiannu in luahna lam chu ka pan ta a. Ka thiannu chuan nghakhlel tih hriat tak chuan min lo hmuak a, kan hmelah hian kan sawi tur chu hmuh theih ni se zawng; harsatna kan tawk mek a ni tih kan hre thei tur.
Chaw kan ei khama thut khawmuan pah chuan bathlarah chuan kan thu a, kan hun tawnte leh kan thil tih thinte kan sawi zel a. Lamna hmuna a kal chak leh chak loh ka zawha min chhan dan chuan min va thawng tak em!!

"Kum li vel liam ta kha a ni a, chu chu Delhi-a ka awm tirh a ni. Kan tawhna Hotel-a kan Manager (Nula) chuan kei leh ka thian pali vel chu lamna hmuna kalpuiah min sawm a, chinchang engmah hre lo kei leh ka thiante chuan engtin nge lamna chu a awm tih hriat nan tiin kan kal ve tur thu chuan kan chhang ta a.

"Ka thian pahnih nen chuan bang nghengin kan ding a, kan pi leh a thiannu lam chu kan en reng a. Lamna an khar dawn thlenga kan awm hnu chuan haw dan tur kan ngaihtuah ta a. Tlangval pakhat hmelchhe lem lo tak chuan min thlah a hreh loh thu a sawi lai chuan kan pi chuan midang min sawm ve tho chu a tha zawk e, hepa hi inthlah tir ang a ti a, a motor-ah chuan kan lut ta a.

Chawhchawrawi rawih

Rawih 1-na:

Kan zing thote hi kan han bui chuk a, tha reng reng a tho eih si lo. Nilengin kan ni churh a, kan kalte hi kan kun ang ta tluk tluk a, tihngaihna dang hriat loh chuan a pumpelh theih mai bik si loh. Rilruin vai fim a hmu kur a, hlim lai nite mitthla changin mit a thip em em a. Hmangaihnain a back-kick tawh chu an nawi nuaih an tihte chu hre ru kur chuan kan han inthiam chawp ve leh mai a, thiam erawh kan chang chuang si lo. Ni lukin ni kan vuiliam a, zan lamah lah eng eng emaw kan ngaihtuah ve tum hrang a, theih nise..kan inti zantin mai a nih hi.
Mahse maw,

Ka lungmawl vangin ka lungleng lova
Ka khaw hlat vangin ka khawhar hek lo
Thiante thenin
D`in D dang D mahse
Chhungte ka chhun chhung chu
Kei hi kei ka ni reng ang
Keimaha keimah kha keimah ka ni tlat si

Rawih 2-na:
(More than words)

Nizan ka mu chu ti hian ka ngaihtuah mai mai a, ‘mu chung lo pawn ka ngaihtuah thei tho si a’ tiin.

Alpha And Omega

            Ka kianga mu kan nu chu ka en a, thosi sehna a inhiah neuh neuh paha a rizai sin a siam that mawlh mawlh pawh chu ka hmuh hmaih lo. A hmel mawi takte chu thlir nin tik a awm thei dawn si lo. Rilruin nunhlui a chhui kir a, taksa erawh a chau zo tawh si. Hmangaihna hi chu a lo va han mak tak em!!!

            Kan nu nen chuan kan inneih hma pawhin thil tam tak kan inhrilh thin a, thil engmah zep kan nei ngai lo. A bula ka hlim theihzia a hriat tlukin ani pawh a hlim thin tih ka hria a. Amah atang hian hmangaih hmasa ber hlutzia leh an pawimawhzia ka hriatchhuah phah si. Chung zawng zawng chu a mit meng mawi takte chuan a thup zo si lo, tawngkain sawi chhuak lo mahse hai rual a ni si lo. A hmangaih hmasa ber nena an intawn dan zawng zawng pawh hriatpuitu leh an harsatna pawh sut kianpui theitu ka ni hi ka lawm a, he ka lawmna hian van khi tawng lo mahse a chen hial ta ve ang.

          Chu pa nena an inhmuh hmasak ber ni pawh chu ka la hria asin. Class XI an zirlai a ni a, an aia pawl khata sang a ni tih pawh ka hria. Exam lai a ni a, midang zawng zawng an zawh sup sup a, an chhuah suau suau tawh hnu pawh chuan an pahnih chuan an la ziak ta char char a, zirtirtuin theh lut tura a tih hnua an theh luh dante, haw kawng a an haw rual zel dante leh chumi hnua an inkar a thil mak tak lo awm te, ni khat lek pawh inhmu lova awm harsa an tih dan pawh ka hria asin.

            A tal surh surh chu ka va en leh a, ‘I va meng rei ve, harsatna i nei em ni?’ a tih a, ka neih loh thu ka hrilh hnu chuan a mu ve leh ta mai a. Mut pawh tum chuang lo chuan a hmangaih hmasa ber chanchin chu ka ngaihtuah leh ta zawk a.

Pickle thak : Ka tan lawmna

                   Ka si hluam hluam hnu pawh chuan ka la pir chhunzawm ta zel a, a tawpah chuan ka pum lam chuan a tuar ta lo. Khum a tluk tawp pah chuan ka pickle min siamsamtu ka u chu ka han dem kual a, a na chu a ziaawm chuang miah lo. Mahse rilru khan a chak a, khatiang em em a hrehawm a min siamtu kha chu ka dimin ka khawngaih thei bik lo a ni. Mipa nih avang pawhin a thak kha chu ka tuar thei a, mahse pum lam khan a lo ti thei si lo. Hetiang hian vawi tam tak ka awm tawh a, ka u hming pawh ka lam ngun na rawh e, engmah awmzia a awm lo. A siam that dan tha ber chu kha pickle kha ei loh a ni a, chu lah ka thil theih loh tawp tur a ni si. A hmaa tih dan ngaite bawkin ‘ka insum ve deuh tawh ang’ chu ka han ti leh hla ngawt a, mahse thil awmdan tur chu sawi kher ngai lovin a chiang reng si.

                 He ka pickle hi a thak em em a, ka thianpa hmarcha inti ngam deuh pawh bathroom-ah a lo tah tir tawh a, kha mi ni kha ka nuih a la za reng, chhun chaw fak lai chuan ka eitir a, a ei hnem ngang mai. Vawi leh khatah a kham thut a, bathroom-a a lut chu kir tik a awm ta lo. Kan va en nak chuan bang dai ngheng leh tui hmuam pur chung chuan a lo si hluam hluam chu niin , a zia lo thei ngei mai.

A siamtu ka dem ngawt pawh chu ka inthiam chuang lo, mi dang tam tak eitur pawh a siam vet ho a, keimahni chauh a sawiseltu kan nih phei chuan a zahthlak dan turte ka ngaihtuah chuan a hriat loh pawha  sawi chi a nihzia ka hrechhuak uarh uarh a, keimaha ka lo inphun lungawi mai mai te pawh kha ka lawm zawk ta dah a.

Chaw ei a piangin mittui a luang a, insum aia har tih ka nei der mai si lo. Mahse zan khat chu ka ngaihdan ka thlak ta daih mai, pickle siamtu laka vui lo chuan lawmthu hrilh chu ka ba tih ka hrechhuak ta. Ka va lawm tak em !!! Kha pickle, bawngsa pickle ngei mai kha Mizorama pickle siam thiam ber lawmman dawngtu ka cousin siam ngat a ni a, kha ti khan thak ta lo se keini ang mivir leh hmui hmer ngaina tan chuan kar lova ral mai tur kha a lo ni a, mahse tunah thla thum lai ka ring ta. Vai chaw tui lo tak tak ai chuan a ei a lo nuamin dang a tinal a. Chumi atan chuan thak deuhin ka tan a lo siam a nih hi, ka va lawm tak em ka ti a. Thla thum mai ni lo, thla tam tak a daih theih nan tlem te te a ei chu ka zir ta bawk a.

Even the thinnest paper has its own backside