Alpha And Omega

            Ka kianga mu kan nu chu ka en a, thosi sehna a inhiah neuh neuh paha a rizai sin a siam that mawlh mawlh pawh chu ka hmuh hmaih lo. A hmel mawi takte chu thlir nin tik a awm thei dawn si lo. Rilruin nunhlui a chhui kir a, taksa erawh a chau zo tawh si. Hmangaihna hi chu a lo va han mak tak em!!!

            Kan nu nen chuan kan inneih hma pawhin thil tam tak kan inhrilh thin a, thil engmah zep kan nei ngai lo. A bula ka hlim theihzia a hriat tlukin ani pawh a hlim thin tih ka hria a. Amah atang hian hmangaih hmasa ber hlutzia leh an pawimawhzia ka hriatchhuah phah si. Chung zawng zawng chu a mit meng mawi takte chuan a thup zo si lo, tawngkain sawi chhuak lo mahse hai rual a ni si lo. A hmangaih hmasa ber nena an intawn dan zawng zawng pawh hriatpuitu leh an harsatna pawh sut kianpui theitu ka ni hi ka lawm a, he ka lawmna hian van khi tawng lo mahse a chen hial ta ve ang.

          Chu pa nena an inhmuh hmasak ber ni pawh chu ka la hria asin. Class XI an zirlai a ni a, an aia pawl khata sang a ni tih pawh ka hria. Exam lai a ni a, midang zawng zawng an zawh sup sup a, an chhuah suau suau tawh hnu pawh chuan an pahnih chuan an la ziak ta char char a, zirtirtuin theh lut tura a tih hnua an theh luh dante, haw kawng a an haw rual zel dante leh chumi hnua an inkar a thil mak tak lo awm te, ni khat lek pawh inhmu lova awm harsa an tih dan pawh ka hria asin.

            A tal surh surh chu ka va en leh a, ‘I va meng rei ve, harsatna i nei em ni?’ a tih a, ka neih loh thu ka hrilh hnu chuan a mu ve leh ta mai a. Mut pawh tum chuang lo chuan a hmangaih hmasa ber chanchin chu ka ngaihtuah leh ta zawk a.

In intawn ni hmasa ber atang khan kha pa kha lawmin a khat a, nangmah ang bawkin a tan he khawvel hi a vul ve asin. Harsatna in tawh lai leh in intih lungnihloh changte pawh khan a tuar ve a, a rum ve asin. Mahse maw, i chanchin engkim i hrilh ang hian ani chuan a hrilh ve lo che a, a dawih vang chu i ti phal lo a nih pawhin a huaisen loh vang tih chu i pawm ve theih ngei ka beisei. I laka zep a neih zawng zawngte chu hria la chuan maw, i nun a thlak danglam dawrh ngei hian ka ring si. Chung chu i zawh loh avang chuan i tihsual a ni lova, amah chuan a hrilh loh che avang chuan a la inchhir ve ngei hian ka ring zawk asin. I thuruk zawng zawng i hrilh lai pawha ngawih a chuh chhante kha i hre si lo. Mahse i thiam loh a ni lo a nia, nang chu  indem thei i ni lo. I hre chiang lo asin, i hmangaih hmasa ber kha i hre chiang lo asin. I lakah zep tam tak a nei a, sawi chhuak turin huaisenna reng a nei si lo. Mahse, hei hi ka hria asin, chung zawng zawng chung chuan a hmangaih che a, i kianga awm hi a thlahlel ve thin asin. Hlimni leh lungngaihni a i kianga thlamuang taka awm hi a chak a, kumkhuaa “Tiam tlat e” tih pui che hi a duh a. Nang nena fanau maltluan chawi a, chhungkaw din hi a duh asin. Nia, ka duh alawm, nang nena hlim taka awm hi ka duh a, ka duhna zawng zawng min tihhlawhtlin sak avang pawh hian ka lawm asin. I hmangaih hmasa ber ka ni hi ka lawm a, a hnuhnung ber min la nih tir leh zel hi ka tan chuan van malsawmna tluk hiala lawmawm a ni asin.

         A biang no taka ka fawh vawng vawng hnu chuan mut zai ka rel ve ta a.