In tawng leh ngei ang aw.

Ka reh bawk a, lung pawh a  leng hle mai.

Tun tum chu  Chennai lam atangin ka`n update ve ang e.  

Lunglen hi nuam chin a awm a, a len ngawih ngawih tawh chinah chuan a nuam ngai lo a  ni e.         

Ka Blog hian visit tu a la nei ve maw!! A va ropui em!!!

Kei ngei pawh reh ka inti a, chuti chung chung chuan ka blog in lo visit ve ngar ngar thin a, lawmthu sawi mawlh mawlh chungin in hriatthiamna ka dil a che u. Reh lo thei ka ni si lo!! Exam hrang hrang ka hmachhawn nasa a, tunah AME Training chu ka zo ve ta a, Certificate of Compliance (CoC) la turin ka kal leh ang a, CoC ka lak dawn hian Heavy Aircraft leh Rotor Aircraft-ah duh ka thlang ve dawn a, HA hi ka thlan zawk ka inring.

Tun mai hian Paper exam ka la nei a, heng ho hi June thla hma ngeia ka pass theih nan ka hun tam zawk ka pek a tul leh dawn a, chuti anih avang pawh chuan ka reh leh viau mai thei a, min lo hrethiam leh mai ani ang chu. 

Kumhlui mual liam tur

'A va la hun love, ka chhiar chak lem lo ve' i ti a nih pawhin ka dem hauh lovang che. Mahse, a BER thla a thlen atangin rilruin Bethlehem a thlir a, kan pan vuah vuah a nih kha maw!

I thil tih zawng zawng saw thlir teh, hunin a liampui saw.....

Vai ramah, mizo dang awm ve lohna huma awm chuan hunbi chhiar thiam hi a har thin a ni e. Chuti chung chung pawhin, kum tawp kan thleng dawn a, a hun ve tawh thovah ngai mai ang.

Kumtluanin Pathianin dam takin min hruai a, a lawmawm ngawt mai. Mahse, kan thil tihah A lawm ve ang em le?? Nang ngei pawh i lawm ang em? Lo inngaihtuah ve rawh le..

Kei chu ka lawm lo asin!! Ka thil tih ka chhuikir chang apianga hnual ruihna ka nei asin!!

Kei leh kan khua 31st

Sailam tlanga tlai ni tla tur chu kan thlir leh thap ang a, khawtetlang a thim rup thleng chuan nula tlangval bakah nu-nau chenin kan intlar leh ang a. Kum danga ka hlim thin ang kha chuan ka hlim tawh kher lovang. Tlangval phawk zual deuhten fiamthu an thawh hunah pawh ka nui ve tawh lovang a, inchhirnain ka khat tawh ang. He khawvel-a hrehawm ka tihna aia nasa zawk chu, nakinah, vana Pa hmaa kan la dinpui tur chu a ni. Eng nge ka sawi ve tak ang le? Naupang infiam karah chuan tlai ni tla tur chu ka en tlawk tlawk tawh ang a, a tlak fel hnu vek pawhin mahniin ka tei rek rek tawh ang a, inchhir viau mahila..a sawt tawh dawn si lo. Ka thil tih vete chuan khuarei min chansan dawn si lo...

Chutiang hunah chuan, Ama lam kan pan a lo tul ang a. Tawngtaiin A khawngaihnaa dil leh ang a, mahni chauha tawngtai pawhin hrehawm tihnain  hlirin ka lo khat tawh ang a. Chu chuan mipa mit atangin mittui a ko chhuak dawn si.

Nang chu

I thil tihte khan inchhirna a pe che em? Nunhlui mai-a chang turin i phal ang em? Nakinah, Pa hmaa dinpuitu turte an ni asin. Nge, keimah angin harsatna i nei...lungphang mai tur kan ni lo asin.

Aw Lalpa, kan thiltih zawng zawngte
I hnenah kan rawn hlan e
Kan tih sualte min ngaidam la
Kan tih that malsawm rawh

Tlangrokhuma Lemziak : Naupang

Chakai khawrh

Kan naupan lai chuan inrinni leh sikul chawlh apiangin kawmthlang lui lamah kan liam thla a, chakai leh kaikuang te bakah ngha te  (sangha te chi hrim hrim ..lungdawl..etc ) te man turin kan kal ve thin. Kan man chhun chhunte chu insem mai lovin, tlai lamah a kal zinga tu emaw berte inah kan ei ho leh dial dial thin.

naupang inbual

Tlai sikul ban vel hian tuikhur lamah naupang tam tak chu kan liam thla ve dial dial a, nuam tin reng sual tel si lovin kan chen thin. Tuia in leih thut thutte kha a lo nuam ve ngawt mai. Sikul chawlh lai vel leh hunpuiah chuan nu leh pate nen lui lamah kan kal ho thin a. Kan hlim ve thei khawp mai..tunlai naupang hian khang kan hlimnate kha an hre ve tawh der mai si lova...

Tui chawi

Tleirawlho chuan tlai lamah tuium nen tuikhur ami tui an chawi thin a, an hlim ve tho ka ring..mahse ka hriatpui lo..:)

Lo sul hmuak

Tlai khua a lo ngui a, lo sul haw a lo hun ta. Naupangte chuan an nu leh pate chu lungdawhahte an lo hmuak a, an nute`n eng nge an rawn hawn tih chu mipa naupang chuan hriat a chak ber thin.

Bazar Bungkawn

BONUS:


Eng ni leh kum nge ka hre lo...mahse a rei ve tawh hle...

Ka dilnate min tihhlawhtlinsak avangin Pu Tlangrokhuma hnenah lawmthu ka sawi e.

Alpha And Omega

            Ka kianga mu kan nu chu ka en a, thosi sehna a inhiah neuh neuh paha a rizai sin a siam that mawlh mawlh pawh chu ka hmuh hmaih lo. A hmel mawi takte chu thlir nin tik a awm thei dawn si lo. Rilruin nunhlui a chhui kir a, taksa erawh a chau zo tawh si. Hmangaihna hi chu a lo va han mak tak em!!!

            Kan nu nen chuan kan inneih hma pawhin thil tam tak kan inhrilh thin a, thil engmah zep kan nei ngai lo. A bula ka hlim theihzia a hriat tlukin ani pawh a hlim thin tih ka hria a. Amah atang hian hmangaih hmasa ber hlutzia leh an pawimawhzia ka hriatchhuah phah si. Chung zawng zawng chu a mit meng mawi takte chuan a thup zo si lo, tawngkain sawi chhuak lo mahse hai rual a ni si lo. A hmangaih hmasa ber nena an intawn dan zawng zawng pawh hriatpuitu leh an harsatna pawh sut kianpui theitu ka ni hi ka lawm a, he ka lawmna hian van khi tawng lo mahse a chen hial ta ve ang.

          Chu pa nena an inhmuh hmasak ber ni pawh chu ka la hria asin. Class XI an zirlai a ni a, an aia pawl khata sang a ni tih pawh ka hria. Exam lai a ni a, midang zawng zawng an zawh sup sup a, an chhuah suau suau tawh hnu pawh chuan an pahnih chuan an la ziak ta char char a, zirtirtuin theh lut tura a tih hnua an theh luh dante, haw kawng a an haw rual zel dante leh chumi hnua an inkar a thil mak tak lo awm te, ni khat lek pawh inhmu lova awm harsa an tih dan pawh ka hria asin.

            A tal surh surh chu ka va en leh a, ‘I va meng rei ve, harsatna i nei em ni?’ a tih a, ka neih loh thu ka hrilh hnu chuan a mu ve leh ta mai a. Mut pawh tum chuang lo chuan a hmangaih hmasa ber chanchin chu ka ngaihtuah leh ta zawk a.

Tawnmang Lasi

Zan thla eng dul ruih maiah chuan lui tui chu fawn ri hlup hlup a, chingpirinu hram kurh kurh leh khuangbai chiri ri cher cher te, ral lehlama sihal lo u te bak chu ri hriat tur reng a awm tawh lo. Kal lehna tur chuang ka hriat loh avangin lung chunga thu chung chuan tuiah ka ke chu ka chhek ka chhek a, rilruin nupui fanau thlaphan turzia leh an mangan dan tur hre reng mahila tih theih ka nei si lo. Sakawlh leh misual laka inven nan tiin ka chemte chu ka hum reng a. Ka meipui chheh pawh chuan vam lam pan lovin mih lam min pansan a. Chu zan khawhar tak leh tihbaiawm takah chuan mut mai chu a har ngang mai. Chhun lama kan sa pelh laite chu ka mitthla a, ka thiante nena kan inhloh dan reng ka ngaihtuah chhuak thei lo. Boruak chu a vawt deuh vur a, ram chin hriatlohna a sapelh hlauhawmziate chu hre reng mahila, kha ti em em a nunau dimlotu keipui chu ka hua a, khua a tih danah chu tlawmah ka tlat a. Chumi ka ngaihtuah zawng ringawt pawh chuan tha a la na a. A chaldarah tak mai chuan ka silai ngei maia han kah chu ka la chak reng a. “Ka hmaa i rawn chhuah hun hun chu i hnuk chhah ni a ni ang” ti sup sup pah chuan ka silai dawt chu ka chhemfai hlarh hlarh a. A hnu ka chhui zelnaah helai velah hian a awm tih a hriat a. Inring renga awm chu him bera ka hriat avang chuan mut zai rel ta lo chuan zing khawvar nghah chu nghah ka tum ta zawk a.

Chhun lama kan hah tawng khawng vangte pawh a ni ang, khawfing chah dawn vel chuan ka lo muhil  deuh sek  a, ka mumangah chuan ram nuam tak hring cham duai maiah chuan ka awm a. Mi kal hmuh tur awm reng an awm lo. Tlang chhip lam pan chuan ka chho zel a, thinghmun ka luh dawn lai tak chuan ka hnung atang hian mi, a awm ka hriat ngai reng reng loh chuan mi lo ko a. Ka han leh hawi chuan ka hnung lawkah chuan nula hmeltha leh duhawm tak mai, a sam a dara uai thla hniang chu kan keipui hliam ngei chunga chuang hi ka hmu a. Rang taka ka silaia ka tin lai chuan chu nula chuan aw nem leh dam tak chuan mi lo khap a, ani hi chu awm lo selang chuan a chaldarah tak chuan  verh ang a. Phuba chu ka la ngei ang le. A chuanna atanga rawn chhuk chuan ka lam panin a rawn kal a. A sakhmel leh pianziaah chuan sel tur reng ka hre lo. A sam sei tak chuan a mawng bawr nalh tak chu a vaw hnap a, a puan bihin a khuh phak loh a mal var takte chuan mit a titlai ngei mai. Kan keipui pawh chuan chet a la dawn lo tih a hriat takah chuan ka silai chu ka dah hniam a, ka lam pana lo kal chu ka lo thlir ta reng a.

Di loh Di

February thla a in tan meuh chuan kan khua Champhai chu a vawt tawh hle a, kan veng Vengsang-a  naupangte chuan Krismas boruak an kham lohziate, sikul luh an chak lohziate chu hahipin an sawi laih laih a, Krismas an hman dan an sawikhawm lai chuan an nui leh hak hak zel  a. A then lah an hman dan zir loh avanga ke tuam bur chung chuan thiante titi karah chuan an lo nui ve vur vur a. Thu dang vawrh teh mahse mathei lovin sikul tan chungchangah an tawp leh nge nge thin. GMHSS-ah hian kum thum vel  chu ka thawk ve ta reng mai a, zirtirtu kan innelin kan inpawh em em a. Thawhpuite intithiamlo an awm ngai meuh lo. Kan sikul pawh chu February 10 a tan tur a ni a, kum dang ang bawkin zirlai chu kan thahnem leh hle ang tih chu a rin theih a. A nihna takah chuan kei ngei pawh chuan chawlh chu ka kham lo tak zet a ni.

Sikul tanni a lo thlen chuan sikul naupang hmel duhawm tak tak te chu phur hmel tak hian an lo kal sang sang a. Hmuh an nuamin mit an titlai hle mai. A ni khatna a nih avang chuan lehkha pawh zir mumal lovin sikul hmunhma hnawkte tifaitein leh pawl siam remtein hun kan hmang a. Hmingte kan lam hnu chuan kan bang ve ta a.

Chawlhkar khat a liam hnu chuan naupang tharte pawh chu an thian chhar tharte nen chuan an infiam ve nak nak tawh a. Class lak laia lo bengchheng tawkte pawh an awm leh ta. Sikul naupang tam zawk chuan nuam an tiin an hlim a. Mahse lut thar zingah chuan nuam tihmel pu lo leh thiante be vak lem lo hi a awm ve a, a hmel chu a tha reuh kher mai. A thiante ka zawh chuan mahni a awm hi nuam a ti zawk a an ti mai zel a. Amah chu ka zah deuh avang chuan ka be mai ngam lo.  Thuneitute lam atanga ka hriat dan chuan amah chu Bethel veng lam mi a lo ni a, pawl sawm thleng Aizawl lama a zir zawh hnu chuan chhungkaw harsatna avang chuan a lo haw a lo ni a. A hmel chuan khawngaihthla a la reuh ngei mai. Tlangnel taka a awm theih nan tiin ka class-ah chuan thilte ka zawt fo a, mak ang reng takin tah takin a chhang thei zel a, harsa tih hmel pawh a pu hran lo.

Thla hnih thum vel a liam hnu chuan kan innel ta khawp mai a, chhun chawlh laite chuan fiamthute thawhin kan nui dun thin a. Midang bulah pawh a tlangnel chho ve zel a, amaherawh chu midang kan kawm tam em em lo. Kei lah ka thawhpuite chu kum lama ka kawm phak lohte an ni hlawm a, ka nu ka pa tih rual bula awm ai chuan a bula awm chu ka thlang zawk si. Hunte  a lo kal zel a, kan innelna chuan zual lam a pan zel a, a tawpah phei chuan thil mak tak a thleng ta tlat mai. Class-ah te chuan ka melh tha ngam ta hlek lo mai a, amah chu ka zah ru deuh tlat thin. Zan lamah mahni awm ka nih avangin ka khua a har fo a, chutiang hunah pawh chuan ka rilru-ah a lo awm leh thin a. Mahse zirtirtuin mahni zirlaite han ngaihzawn chu thil mawi a ka hriat loh avangin thup ka tum hram hram a, midang bulah chuan thup thei viau thin mah ila, a kiangah chuan ka lo tilang leh thin.

Zan khat chu Sangtei chuan a rawn call a, a nambar ka neih loh avang chuan tu tih ka hre mai lo. A thusawi danah chuan a zam hle tih a hriat a, chutiang zan rei tawh lama a rawn bia chu mak ak tih em avang chuan ka zawt ta ringawt a. Sangtei min chhan dan chuan mi va thawng tak em!!

“Sir, zanin chu ka mu thei lo reng reng, ka rilru hi a hah nge pawh ka hre lo, sikula kan inkawm laite ka mitthlaah a lo lang a, kha tiang kha ni reng se ka chak ngawt mai. A mak lutuk, i bula awm hi ka chak reng mawle”

Leh mai rawh

“…ky pon k gai ce lom..el..hun harsa  takh po kn inpui jel donny o..i kiaga hlm tka om k va cak to tak…;) mizz u..gud nit n tc…”

              Ka biangah chuan mittui a lo luang tiam tiam a, ka chhiar zo thei lo. Ka phone chu ka dah a, tlem la bang ka in hnu chuan mut zai ka rel leh ta a.

              Thla eng chuan ka pindan chu a chhun eng ruih mai a, mutthilh a har ngei mai. Mitthlaah nunhlui liam hnu te a lo lang uar uar a, koh kir theih an chang tawh si lo. Hun chuan kan nundante chu liampui mahse sik leh sa inthlakin a thlak danglam ve tawh loh tur hmangaihna chu ka hlan tawh si. A tel lo chuan ka tlei lo va. A ni, D, I tel lo chuan ka tlei lova, ka ngai ngawih ngawih che asin. Mahse chung zawng zawng hai der chuan min liamsan ta si. Kan hlimlai nite kha dawn kir ve la chuan maw..aw..dawn kir ve hian i mawi tawh  si lo.

             Ka pindan kawngkhar chu dimtein ka hawng a, in chung zawl lamah chuan ka insawn chho ta a. A thianga kan lawm thin van dumpawl ruih te leh chhawrthlapui te, siar eng mawi tak te chuan a ngai tein an mawi an lo la chhuah si. A mak khawp mai, lung leng reng reng chuan sulhnu an chhui ngei ngei an tih hi a lo dik a ni ang.  Rilruin nunhlui a chhui kir a, mitthlaan a lo lang zut zut mai si.

NAE SALANG JENNY YELI

Tuahpui leh vau te an lo vul leh ang a

Kan hlim lai nite zawng koh kir theih an chang tawh dawn si lo

                Hun a liam a, chu chuan nunhlui a liampui si. Ka zawng ruai a, tawnni her  thei si lo.

Kum 8 kalta kha a ni a, a ni, kha nipui hun duhawm tak kha a ni, ka hmangaih Yeli ka tawn hmasak ber ni chu.  Zirna avangin vai ram khawlum takah chuan chhungte ngai tak chung chuan chhunni  ka hmang liam ve thin a. Zirna lamah theih tawp chhuahin kan lo awm thin. Hetiang em em a ka thinlung luahtu ka tawng ang tih reng ka ngaihtuah pha lo.

Ni 23, March, 2003 a ni a, kan Biakin pan chuan ka kal a. Mipui lo chhawntu (Usher) tur ka nih avang chuan ka thleng hma hle. Kan biakin hi sap ho kaihhruaina hnuaiah  Foreigner-te nena inkhawm thin kan ni a. Chumi ni pawh chuan mikhual tam tak awm chuan ka mit an la hran pa lo. Tan hun tep tawha  hmeichhe lo lut chuan ka mit a la tat lat mai. Aw!!  Theih nise khang hunte khan lo inhre lo i la a tha zawk tur. Khuanu ruat kan ni si lo. Inkhawm chhung zawng chuan ka melh ru fova, a bahsam sei leh a mit meng  mawi takte chuan keimahah thu nasa takin an sawi si.

Ka Wallet Sen Te

VALENTINE`S DAY SPECIAL

“A sen ngei ni se, a puan pawh savun tha chi ni ngei se”
“Enge a sen kher? A vang ngawt ang!!”
“Vang mahse, ka hmuh hma chu ka zawng char char mai ang!”

Phone ka dah hnu chuan ka ngaihtuah zui ta zel a, a mawi dan turzia te, thianten an hmuh hun pawha sawi tling tur. Itsik duhtu tan pawha itsik tham. Min duhsaktu te tan pawh a lawmpuiawm. A ni, chuti ang chu a ni ka duhzawng chu.

Zawn pawh ka zawng nasa na rawh e, ‘India is my Home` ti ve chin ngat khan ka zinna apiangah ka zawng zel a, chutah chuan a awm ang an tihna apiang chu khel lovin ka pan chat thin. Ka suangtuahna ram a luah hneh em em a, ka duh ang chu a awm a nih ngai chuan a man lam ka ngaihtuah lo. Ka nei ngei tur a ni. Thingtlangpa mai mah ni i la, chumi ka neih theihna a nih dawn phawt chuan chhungkaw budget buai phah vekna tur pawh ni mahse ka lei ngei dawn a ni, tiin ka inngaihtuah a. Tawn ni reng a her thei si lo.