Khuai khawitupa ( A countryside man)

                       Zing ni chhuak eng mawi tak chuan ka tukverh chu a rawn chhun tle set set a, a mawina leh duhawmna hriatpui tura mi rawn sawmtu sawmna chu hai phal loin ka khum hlui tawh ang reng tak chu ka thawhsan a. Tukverh atang chuan pawn lam chu ka thlir ta veng veng a. Tsemj tlang sang pui mai, vurin a bawh var vu bulthut atanga Helomi lui lo ngiai ngai leh a chheh vela Daisy par chiah chiah te chuan zing chibai buk nan hlimna min lo pe thar leh a. Chung aia hlu chu he khawvelah beisei tur chuang ka nei ve si lo.
                      Ka in chu feet 12 bial lek mah nise ka dam khawchhuah nana ka mamawh chu a kim ve biai si a, kan la thawl ti ila kan sawi sual kher lovang. Ka in hi, a bang, kawngkhar leh eng ilo vel chu  thingphel vuah khawm mai a ni a. A chung lah thingphel, far hnaia charhkhawm mai a ni. Mahse heng ka in leh ka bungrua te, ka huan zau takte leh ka khuai khawi te, ka pangpar te leh Tsemj tlang mawi tak te leh Helomi luite chu ka thil neih hlu ber ber te an ni a. An tello chuan dam pawh ni ila hlimna hmu thei lo hial tura ka inngaih avang pawh a ni mahna, ka hmangaih a, ka ngainat vek ni.

                    Tukthuan ei pah chuan vurin a bawh tlang chu ka thlir reng a, ni zungin a chhun tlet sur vur tlang mawinate chu ka hmuh hmaih phal lo. Ka  hlimna min thlentu, thlen thintu leh thlen zeltu tur an ni tlat si. 'Nizan khawvawt kha lo tuar lo ta ila chuan vawiin ni duhawm tak hi a lo thleng awm kher si lova' ti a inngaihtuah rauh rauh chung chuan zan khawvawt tak rah, ni duhawm tak hmang tur chuan ka hnathawh thawmhnaw chu ka inbel ta sawk sawk a. A ni, vawiin ni chu a mawi danglam em a tin ni.
                    Thiamna lamah chhuan tur nei lo mahila, ka nuam tih ber khauai khawi leh ka ngainat ber pangpar chuan inzawmna thuk tak an nei tih ka hre reng a. Chu chuan hlimna min pe thei tih hriain kum 18 liam ta atang khan he hmunah hian ka inbengbel ve ta kha a ni a. Heng ka thil tawnte hian ka nunhlui avanga ka rilru natna min theihnghilh tir lo mahse min chhawk zangkhai a, chu thil chu ka thlakhlelh ngawih ngawih thil a ni si.
                   Faifuk hlarh hlah pah chuan ka khuaite chu ka en pah zel a, leng dang ngai lova an tualchai ka hmuhte chuan loh theih loh avanga ka chan tak, min hriat chhuah tir thin a, an hlimna chu ka hlimna a ka pawm thiam a tul tih ka hai si lo. Chhun nisa in a emtui vurtui lo luang tle siar siar thlir pah chuan thing hlimah chuan ka thu chawl a, tlang sang lam atanga thlifim lo tleh heuh heuh chuan ka thlan bawl tek tekte chu a chhem kiang a, a va nuam tak em!! Tsemj tlang var paw chiai te, Helomi lui tui luang ri her her leh sangha man tum naupang ri nawk nawk te,  thlifim tlehina a chhem fawn siau siau Daisy par te, hla taka ka in hring rik rek ka zuk hmuh te chuan ka lung a tileng ve hial mai. Nitina ka hna a hlimna ka hmu chu ka lawmin vannei ka inti a, khawpui mi hausa eiruk tum reng reng a phi buai ka  ngai bik reng reng lo.Hlimna hi a hlu ber si. Sava hram chiah chiah leh tui luang ri ker ker te, thli ina hnah a chhem ri seng seng te, ka khuai khawi thlawk ri cher cher te chu hre ngun hle tawh mahila ka ning thei si lo.
                  Ka hmabak tlem la awm ka zawh hnu chuan ka Helomi-ah ngei chuan ka inphih harh a, a tuifim leh thiang kuk mai a ka hlimthla ka hmuh chuan ka vanglai ka pel hle tawh tih hai rual a ni lo. A tui hik takte chuan ka hah min chhawkzangkhai a, ka thlan min hrukhulsak thin si. Naupangho pawh chuan an sangha man an insem den den hnu chuan khawpui lam panin an inzui ta hnak hnak hlawm a. Tsemj tlang mawina belhchhahtu kawla liam mai tur thlir chung chuan ngaihngam taka ka zalna leh ka neih chhun, ri zawng zawnga rimawi ber ka ngaihthlakna ni bawk, ka in te pan chuan ka inak ve ta hnak hnak a.