Arkaiden leh Lunglen

Zan boruak thiang tak karah chuan mal bik nia inngai em emin a eng bial kung mai a. A bula awmte chuan biak lum lam reng reng an tum lo. A tana he khawvel hrehawm bikzia tur lah chu tuman an dawnpui hmel si lo. Chu Chhawrthlapui eng no nghulh chuan rilru a tinova, thinlung a titui ral leh si.
Nia, pi leh pute atanga "Khuangchawi Thla" kan lo tih chu kan hmang mek a,  tunge lawm lo awm ang a, hlim lo awm thei teh lul ang ni. Bathlar leh-lam leh leh-lam chu ka kar tawn zak  zak a, a mawina hmuh chian tuma ka en chhoh chuan ka kun lai ai khan a mawina a pun phah chuang si lo.  Favang Awllen a nih bawk avang pawh a ni ang, lungkham hliah hliah sawi tur vak ka nei lo bawk a, ka thut-pindan atang chuan thutthleng chu ka la chhuak a. Nunhlui liam tate chu ka chhukir tan ta a.


Sikul kan kal ve lai a, chawhnu chawlh apianga kan liamna thin, Zalreng luite lah chuan pantu leh mamawhtu a nei lo ni mai hian ka hre thin. Khang hun kha chuan maw... thleng hmasak loh hlaua kawr phe duai duaiin kan tlan thin kha a ni si a. Nu leh pate koh ngai hial khawpa kan awm thinte kha a hunlaiin mawlthlak hle mah se, Once in a lifetime a ni ve tlats...

Kan rawlthar chhuahlai kha chuan nula tlangval kawm pha chiah lo mahila, ram hna thawka an kianga kan awm a tul thin avang khan kan tlangnel ve em em thin a. An titi ngaithla mai maia kan lo hlim ve thinziate kha aw!! Zuksih mual kan neih kuma kan ramriah nawmziate leh ka pate-a sa kah kan chan dante, khaw pumin ka pate-a an ngaihsan dante kha ka la hre reng mai. Zan rei tak tak thlenga ka pate-a zuia nula ka rim thinte kha, tunlaia nula tlangval inrim dan ai hian a nawm loh bik ka ring chuang lo. Pa valai deuh leh titi thiam deuhin thu an han vawrh laia, a sira ngam leh ngam lova kan lo nuih ve sen sen laite chuan mual min liamsan tawh si.

Nulate`n nui ver ver paha thingpui sen min han sem ang a, ngam leh ngam lovin kan la ve ngei ang a. Chu ngawt pawh chu zankhua-a muttheih lohna tham a tling leh ngei ang a. Mut hmuna ngaihtuah  neuh neuh han nawm theihziate kha aw.

A hnuah nula kan lo rim ve ngam hnu phei kha chuan khawvel thar kan va chuangkai chiang tak em aw.. Duh berte inah ngei mai kan han lut ang a, D-i ngei mai chuan hlim takin min lo chhawn leh ngei ang a, a chhungte an awm loh hlauh chuan bathlarah, thla engin a chhun phak ngeiah chuan duh thawh takin kan han inpawm ang a, tumah dang reng kan ngai dawn der si lo. Sum hmun lama pa ber aw then ri hriat hma chu hlauh tur dang engmah a awm ngai si lo.

Thla eng no nghulh pawh chu a lo chuai a, thla pawh kawlkil thimah a liam dawn ta. Thla eng mawina zawng zawng baka ka nunhluite ngaihtuah tha leh tur chuan inchhung lamah ka insawn lut ta a.