Pani ke sath Pani

Ka chuanna rel vu vung vung a reh hnu chuan ka zirna hmun tur, kum 4 leh a chanve chhung ka awmna tur Dehradun ka thleng ta tih hai rual a ni lo. Tlai ni tlak hma hret a ni a, chhaklama tlang lo toh luah ka hmuhte chuan lung a tileng nghal ringawt mai. Vawi khat kalna mah nise, Delhi meuh pawh mahni-a thleng thei ngat ka nih avangin hlauh tur vak neiin ka inhre lo. Hmanhmawh takin Auto ka kova, ka zirna hmun tur kan College chu kan pan ta a. College kan thlen hnua Auto Driver-in ka thiante hnena a sawi, ka hriatthiam loh min lehsak hnu chuan, Driver chuan ka vawi khat kalna a ni tih reng a hre lo a ni awm e.

Gate Keeper chu Hindi-a biak a ngaih avangin tih theih ka nei tlem hle mai. Ka Document ka entir hnuah, Reception lam chu 'Saw lamah sawn..' ti niawm tak hian a kawk a, ka pan phei ve ta nghal a. English ka lo thiam nal lutuk lo nen, kan insawi nek nek hnu chuan kan College 'Zirlaite Tan In' chu min panpui ta a.
Gate luh dawnah chuan 'PANI KE SATH PANI' tih a lo inziak kulh mai a. Pani awmzia ka hriat ve hlauh avangin 'Tui leh Tui' an ti a nih hi ti ru reuh reuh chung chuan Warden Room chu kan pan a. Kan Warden chu pa te lam, pumraw phu lova dul kiar a ni a, Pathianin mihringte hi Ama anpuia min siam a nih chuan Pathian a anna chu a hlauh nasa viau tawh a ni ang. Min hruaitu nena eng eng emaw an sawi hnu chuan kum khat chhung ka awmna tur Room No. 203 chabi chu min pe a, ka indah lut ve ta sawk sawk a. Ni 3 vel hnuah, Silchar pa a rawn lut ve leh a. Innel tak chuan kan inbe chho tan a.
Class kan han kal tan a, Hindi thiam loh chu a hrehawm hle mahse thiam chakna leh tumna ka nei lo hrim hrim. Ka thianpa chuan Hindi a thiam avang chuan harsatna em chu ka tawng hran lo. Gate bula thil inziak ka zawh chuan 'Water with Water' tih a nih thu leh a awmzia a hriat bik loh thu chuan min chhang a.
A mak ngawt mai, kan College-ah chuan Hindi thiam lo awm chhun ka ni a, mahse Pathianin ka mal reng a phal bik lo a ni ang. Kan Thermo-dynamo Practical Demonstrator pakhat chu Mizoram-a awm tawh thin a ni hlauh mai. Mahse, 'Ka pu, chibai' tih leh 'Ka pi, chibai' tih bak chu a thiam tlem hle mai.
Ni leh thla a liam a, kum a vei meuh chuan Hindi pawh a bo lo tawk chuan ka thiam ve ta. Mahse, Gate bula thil inziak kha hrethiam tur khawp chuan ka la thiam lo a ni ang. A awmzia reng reng ka la hre chuang lo. Kan zirtirtu thenkhat ka zawh chuan ka thianpa min hrilh ang chuan min chhang ve mai a, a awmzia leh Warden-in a hman chhan reng an hre bik lo. (Kan Warden hian kum eng emaw zah chu a lo hmang tawh a ni awm e). 
Tlai khat Paractical class kan nei zo chu kan Practical Demonstrator chu ka zawt chhin a, nui vur vur chung chuan ti hian min hrilh ta a.
" Tuna in Warden a awm hma hi chuan kum tam tak chhung chu CH-I building-ah sawn buaina a awm reng thin a, hnam ang zawngte-a a kal fo avangin a boruak a tang thei hle thin. Warden-a tang apiang chuan kum khat bak an enkawl ngam lova, a laklawha bang ta pawh an awm nual mai. Kum 12 vel liam ta atang khan tuna in Warden saw a rawn thawk tan ta a. Thil awmdan engkim hrilh vek hnua tang a nih avangin zirlai tharte an rawn kal ni chuan 'PANI KE SATH PANI' tih hi a tar a, a hmu apiang an nui a, kan Principal meuh pawh hian a hauh kha. A kum khatnaah chuan eng a ang chuang lo, mahse, beidawn a tum lo.

Kum 4 a liam hnu chuan a lo dang tan ta. Buaina a lo chhuahin a reh leh mai zel a, a hma anga nu leh pate koh hial ngai khawpin thil a thleng ngai ta lo." A sawi zawng pawh chuan a nui deuh vur vur reng a, ka hmel atang chuan ka hrethiam lo tih a hria a ni ang chu, sawi zawm leh a tum lai tak chuan zawhna min zawt ta a. 'Ka rawn kal tirh chuan Silchar ami nen kan awm' ka tih chuan a bu nghut nghut a. A sawi zawm leh ta a.
"Naupang an awmin an rawn kalna azirin a thliar hrang hmak hmak zel a, a kum hnihnaah chuan kum khatna-a awmdun kha chu an awmdun tawh ngai lo", a sawi leh hma chuan ka nui chhuak ta a. Ka thianpa nen khan kum khatna chiah kan awmdun tih ka hrilh hnu chuan kan nui deuh hak hak a.
Mi nuihzat avangte khan lo chawlhsan ta se, tun ang hian kan awm awm si lova tia inngaihtuah reuh reuh chung chuan ka room lam chu ka pan ta a.