Chhungkaw hlimawm : A Khuhhawnna...

Ka buai dan hi in hrethiam phak kher lovang. Tunah chuan tawngkam bungraw tha han phawrhchhuak tur leh thluaithlum turin ka hun neihin a daih tawh lo, chuvang chuan mawl mang tak takin ka rawn sawi phawng phawng mai dawn a ni. A tha lovang tih chu ka hre reng mai, min fin chhuah tur pawhin ka sawm khaw mawi lo mai ang che u; a chhan chu ka insiam tha thei tawh dawn tak tak chuang lo, min hrethiam dawn nia...

Eng nge ka hrilh hmasak ber ang che u? Ka nupui aw ni ang-- a tawi zawngin a hming chu Nupuii a ni tawp mai. Tunah chuan fa pathum, nung tha hlawm em em mai hi kan nei a, kan hlimna leh kan lawmna, kan nitin nun tikimtu te chu anmahni ngei hi an ni. Anmahni avanga hun hlimawm leh harsa tak tak ka tawh te hi buai chung chungin ka hrilh hram hram dawn che u a ni. Amaherawhchu ka sawi chian hmain nangmahni ang bawka nula-tlangval hlim tak, lo inchhai ve tawh thin kan ni tih erawh chu min hriatsak ang che u.

Hun rei tak a ni tawh emaw ka tih lai hian kan inneih kha kum sawm tha chauh a la ni tih hi awih harsa ka ti thin. A tirah chuan a nuam a, a hlimawm bawk a, harsatna leh manganna engmah awm ta lo chu vanram tlafual kan chen hi a ni ngawt mai; mahse, hun a rawn vei a, fanau te an lo awm ta zel a, thil a rawn inher dang lam tan ta. Mawhphurhna lo sang zelah chuan ka lo la puitlin loh zia ka hre chho ta nak nak mai. Hmachhawn loh theih a ni si lo, chutiang kara kan chhungkaw nun hlimawm, hmangaihnain a phuar khawm kara thil chi hrang hrang thleng thei chu hrilh che u ka tum a ni.

Tih leh hunah bung 1 na.. :)

P.S. Ka thu ziak tur hian tu te chhung emaw, mi nundan emaw leh a kaihhnawih awm thei ang zawng zawng -- chanchin a awm a nih chuan a awm ve mai mai a ni ang.

P.P.S. A chhungthu a hming hi tumah ngaihbel theih a ni lo ang. :)