Hmeichhiate hi

Flying Kiss pe tura thlawh kher a ngai lo tih ka hriat tluk zetin hmeichhe chungchang sawi tur hian nupui neih kher a ngai lo tih ka chiang a. Hmeichhe lawmna chu ho te nimahsela chu aia thil ho zawk vang pawh a an lo lungawi loh leh mai thin avangin eng ang chiah hi nge an lo nih i lo thlir teh ang.

Hmeichhiate hi mahni zia thup thiam tak an ni a. An duh lam kawngah chuan mipa aiin zah an tuar thei zawk a, an duh loh lamah chuan an mi zakzum tak an nih thu an sawi leh mai thin.Hmeichhia chuan amah chauhva a awm laia a duhzawng chu a thiante zingah chuan a haw em em thei a. A huat thu i sawi palh a nih pawhin a hmelah a lang lovang a, chhungrila tap chunga i bula a nuih chang a tam ang a, chumi i hriatthiampui loh chuan pasal a` nih i hlawh leh mai ang. Duat taka i enkawl i nupui chuan i duatzia hre reng chungin i bulah i chhungte a rel fovang a, 'Hmeichhia a nih hi maw' ti a i hriatthiamna erawh a hrethiam duh ngai lovang. A hmeichhe awm nem zawkna tan chhanin tharum ngah zawk a tlawm fovang chia, chu chuan i khawvel tawp thlengin a thlah tawh ngai lovang che. Hmeichhiate hian 'Mittui' hi hmanruaah hmangin mipate an bei let thin a, he mittui hi an hmanraw hman thiam ber a ni ta reng a nih hi. Mipa tap riin pindan khat pawh a fan zo lova, hmeichhe tap ri erawhin kawtthler a fan chhuak thin.

He tih rual hian hmeichhiate hi in chhung khawsak ilo thilah an daihzai em em a. Hmeichhia chuan nau paw chungin eirawng a bawl ang a, a inleng kawm a thlah chuang lovang, a bai chhuan a liam ngai chuang lovang. 'In awm em?' an tih apianga lo chhawntu pawh midang an ni chuang lovang. Chuti ang khawpa hmeichhe daihzai chuan a pasal hnathawk bang chu a lo lawm ang a, a buaina zawng zawng thupin hlim takin a lo chhawnchhaih ang che. Chu chu Mipa a hneh theihna a ni tih a hre si a. Harsatna leh lungngaihna i tawh changin hmeichhe tangnem i thlahlel ang a, a ni'n beisei nei let ranin a lo hnem ang che. I tih sual avanga lungngai i nih pawhin i thiamlohna a hmuh hmaih der thei a. I lawmna a nih dan phawt chuan a tawngkam tha a ui ngai lovang.

Thil te ber atanga hmangaihna khurpui thlenga i mamawh chu hmeichhiate an ni a, hlimna vawr tawp thlentu che pawh hmeichhia tho an ni. Hmeichhiate hi famkimlohna khawvel tifamkimtute an ni a, anni tello chuan khawvel hian ke a pen thei lova. Hmeichhe awmlohna chhungkua chu a ruak a, a ngui nghuai thin.