Sep 3, 2011

Zu in hi sual a ni em?

Zu hi eng nge? Zu kan in hian kan taksa-ah engtin nge a thawh?
Zu chu thlai, thei leh til dang dang atanga siam, ethyl pai tel a ni a. He ethyl hi rawng nei lo, awlsam taka kang mai thei leh mihring nunna atana hlauhawm tak a ni. Zu kan in hian 20% chu kan pumpui-ah a cham bang a, a bak zawng 80% lai mai chuan ka rilphir a thleng thla thin. Kan timur hlawm(tissue)-a Zu a lo luh chiah khan kan taksa leh kan ngaihtuahna a khawihbuai a, zu kan lo rui ta thin a ni. Kan zu inte hi kawng thumin kan paih chhuak a,kan kal(kidney), kan lung leh chuap atangin.


Zu leh Mizoram:
Kan Zoramah hian 'ZU' tihhian hmun a va khuar nasa tak em. Vengthlang hmeithai in atanga kan Pulpit thlengin  hmun a khuar a. Mizoram UT a nih hnu kum 1972 khan Legislative Assembly hmasa chuan Mizoram Excise Act, 1973 siam a ni a. He dan hi Mizoram Excise Rules, 1983 nen kum 1984 October ni 10-ah hman tan a ni. He dan hnuaiah hian Aizawl-ah sorkar remtihnain zu dawr 10 leh Bar 4 a awm a; Lunglei-ah zu dawr 4 leh Aizawl-ah Liqour Wholesaler 2 an awm.
Kum 1987, February ni 20-ah Mizoram chu State-ah hlankai a ni a, hemi hnu hian Legislative Assembly chuan dan khauh zawk ‘The Mizoram Excise Act, 1992 a pass. He dan hi hmang lovin The Mizoram Liqour Total Prohibition Act, 1995 leh The Mizoram Liqour Total Prohibition Rules, 1996 chu February ni 20, 1997-ah hman tan a ni. Grape chingtute avangin MLTP Act, 1995 Section 2 siamtha-in, The Mizoram Excise & Narcotics (Wine) Rules, 2008’ siam a ni a; He dan hmang hian Champhai Grape Growers Society leh Hnahlan Grape Growers Society te hnenah license pek an ni.
 (source: the zozam times)

Zu leh Mizo:

Kan pi leh pute kan thlir chuan an nunah Zu hian hmun a luah thuk em em a, hlimni leh lawmni-ah pawh Zu tel lo chuan 'Khuang lova chai ang' an ti hial thin. Kristianna kan rama a lo luh hnu chuan kan ngaih dan a inlet tan ta. 'Kristian chuan Zu in hi a tha lo ve' tih chuan ram pum a deng chhuak a, kan nun a danglam ta.

Zu leh Kristiante:
Zu in hi suala ngai tam tak kan awm a, a hming sawi ringawt pawhin mi thenkhat chu an lo rui leh mai thin. Mi thenkhat Zu in miah si lovin zu a haw kher lo thei a, in reng chung si a hua an awm bawk.

Zu leh Bible:
Thudik 1: Kan Lal Isua kha mihring famkim, Pathian famkim a ni a. Vawi khatmah thilsual ti lo a ni. Hei hi Hebrai 4:15-ah kan hmu : "Puithiam Lalber, kan chak lohnate min hriatpui thei lonei kan ni si lo; keimahni anga kawng tinrenga thlemna tawk tawh, sual erawh chu sual lo, nei kan ni zawk e.
Thudik 2: Isua thilmak tih hmasak ber chu 'Tui Uain a chantir' a ni. Johana 2:10-11-ah chuan,  'A hnenah, "Mi tinin uain tha an dah chhuak thin; nang zawng tun thlengin uain tha i la vawn hi," a ti a. Isuan he a chhinchhiahna tih tantirhna hi Galili ram Kana khuaah chuan A ti a, a ropuizia a lantir ta a; tin, a zirtirte chuan ani chu an ring a.' tih kan hmu.
Thudik 3: Isua`n Zu a in. Kalhlen Kut-ah mai ni lovin hmun dangah pawh a in tih Pathian Thu-ah kan hmu. 'Tin, no a la a, lawmthu a sawi a, an hnenah a pe a. In zain in rawh u. Hei hi ka thisen, sualte ngaihdam na`na mi tam tak tana chhuak tur, thu thlunna chu a ni. Nimahsela ka hrilh a che u, ka Pa ramah nangmahni nen a thar ka in ni a thlen hma loh zawng tun a chinah grep hrui raha mi hi ka inleh tawh lovang" a ti a." -Matthaia 26:27-29
"Mihring Fapa a lo kal a, a eiin a in a, nangni`n 'En teh u, chaw heh mi, uain heh mi, chhiahkhawntute leh misualte thian saw!' in ti si a. -Luka 7:34

ZAWHNA: Isua khan thilsual vawi khat mah a ti lova, mahse a khat tawkin Zu a in thin. A nih chuan engtin nge Zu in hi sual a nih theih ang???

Mi thenkhat chuan 'Kan taksa tan a tha lo va, kan Bible-in in ngai lo turin min duh a ni' an ti thin.

Mi thenkhat leh chuan leh chuan "Chin lem nei lova zu in hi a hrisel lova, mahni in enkawl thei lo mai tan ni lo, chhungkua leh khawtlang tana thil tha lo a ni" tih kan Bible-in min hrilh tiin an in lo bawk thin.
Mi thenkhawt dang leh chaun tlem tak takin an in a, chu chu kan Pathian Thu-in sual a ni lo tih min hrilh.
Baptistu Johan-a khan zu a in ngai lova, mahse ramhuai a zawl a ni an ti a. (Luka 7:33) Kan Lalpa erawh zu a in a, (Matthaia 26:29) mahse Pathian famkim a ni thung si. (Bible)






Ruk hmang te emaw, mi duham te emaw, zu ruih hmangte emaw, mi hau hmang te emaw, hlepru te emawin Pathian ram an luah lovang.- 1Korinth 6:10

Tin, tupawh mihring Fapa sawisel apiangte chu, an sawiselna chu ngaihdamsak a ni ang; tupawh Thlarau Thianghlim meuh sawisel apiang erawh chu, an sawiselna chu tun dam chhungah pawh, hun lo la thleng turhah pawh ngaihdamsak a ni lovang. - Mathaia 12:32

3 comments:

  1. Va post tha deuh ve! Tawi të-a ngaihdan sawi vak ngaihna ka hre lo. 'Zu hi a sual leh sual loh vang pawh ni lovin, taksa tana a that loh vang leh moral a tihchhiat theih em avangin i in lovang u' ka ti ve e!

    ReplyDelete
  2. i lo lut leh a,,,ti tha thin e..zu in hi a tha lo ngawt mai...

    ReplyDelete
  3. Zu hi a tha chu ka tih hauh lo a, amaherawh chu engvanginnge kan ram hian thlah zalen emaw legalise amaw kan mamawh em em kan tih chuan, kan unau tamtak zuchhe in te an lo dam theih nan. Leh enkawlna tha an lo dawn theih nan...

    ReplyDelete