Zan hnuhnung ber

Hunte an inher liam zel a

Lei  pangpar mawinate an chuai a

Chutin kan hlimlainite pawh 

Hma takin an ral leh thin

Kum te an vei mawlh mawlh hnu chuan hma taka kan thawh a, peih lo chung pawha tihluihna avanga kan tih luih thinna hmun Hostel chu chhuahsan a lo hun ve ta. Pathian hruainaah lawmthu ka sawi mawlh mawlh e. Khang hun harsa tak kara hlimna kan hmuhte kha a va han ropuiin a va han hlimawm tak em!! Heti ang hun a lo thlen hian rilruin kil tin kil tang a fang a, kan chet chhiatna leh ka Hero laite mittthlaah a lo lang chuai chuai a. Chung hunte chu thawnthu mai an chang tawh dawn si a, ngai mahila koh kir theih an chang tawh dawn si lo.
Nunhlui leh Lunglen hi engtikah mah kan then hrang thei dawn lo va, chuvangin lunglenna chu kan hma a awm, kan kut zala tla a lo ni ta a ni.


Chung hun hlimawm tak karah chuan ngaih bik leh theihnghilh ngai loh tur tam tak pawh in nei ve thin ang. Hla in, "Par ang an chuai kan hlimlainite, Kohkir theih an chang tawh si lo" a tih ang khan, hrilin sawi thiam mahila, kir zai an tel tawh dawn lo. Ka tan Nunhlui tih apianga lo lang thin chu, aw..ka hmangaih, ka Juliet, ka Dorothy, oh.....ka Daisy...nang ngei hi i ni asin!!!
Hmangaihna hi a lo awm tawh a nih ngai chuan nang ka hmangaihna che hi chung zinga pakhat chu a ni ve ang a, a lo la awm ngai lo a nih pawhin he ka hmangaihna che hi a hmasa ber a ni ngei ang. A ni, ka hmangaih tlat si che a. He hringnunah hian hmangaihna pakhat, hmangaih pakhat an ti a nih chuan nang hi ka hmangaih chu i ni ang a, nang ka hmangaihna che pawh hi hmangaihna awmchhun chu a ni ang. I tang nem ka belh lai chuan ka hlim tih i hriat a, ka kiang ata i kal bo avanga ka chauhna hi eng anga na nge? Hei hi hmangaihna an tih chu em ni? Hei hi em ni i hmangaihna min hlan chu?

Ka hmangaih i nih hma pawhin ka thian i nih thin kha, khang hun laite kha i theihnghilh ta em ni? Kei chuan engtikah mah ka theihnghilh dawn lo asin. Ka dawn vawng vawng thin che asin, mahse nang zawng min dawn ve hian i mawi tawh si lo. Theih nise, i tang nem belh leh a, i awka nem taka i biahthu di min hlan thin te kha....a...ni lo, koh kir theih an chang tawh si lo. Aw!! Eng`an nang nen dar ang kan lo intawn le!! Par ang chul maian chuan ka phal lo asin kan hlim lainite kha . Mahse, Khuanu ruat a ni si lo.

Zan khua a lo tlai mahten ka dawn thin che

Nghilh thei reng hian ka mawi si lo kan hlimlai nite

Theih chang se kan hlimlai nite

Koh kir ka nuam e, par ang vul zelan

Nghilh ni awm lo mahse, koh kir theih an chang tawh si lo. Khang kan hlim laite kha, vawng reng ang aw.  Hmangahna hrui khat vuan a, par ang kan inlawm laite kha engtikah nghilh zai rel ve ang i maw??

He thuziak hi, hostel-a ka zan hnuhnung ber ka hman zan hriatreng nan he hostel ka luh atanga ka tawn ka hmangaihi..a ni, ka hmangaihi hnenah chuan kei hmangaihna nei lo (nei ni ila chuan hmanah khan a keh chhe vek tawh ngei ang!!) hian ka hlan e.