Veikhawr

UPDATED

          Mizo tawng thumal zinga inhnialna chawk chhuak ve fo thin chu Veikhawr tih hi a ni awm e. Mi thenkhatin khawr chu zei lo leh ni deuh huih, lek/he deuh tlat a ni an ti a, amaherawhchu mi tam zawk pawm dan leh an tan chhan, mizo tawng a thumal pakhat a nih avanga a nih ang anga kan pawm mai tur a nih avangin keipawhin ka pawm mai a ni. Mahni vei lam hmang thiamte hi Veikhawr kan ti thin.

He thuziaktu ngei pawh hi hun rei tak chhung chu veikhawr lo ni ve thin a ni a, amaherawhchu thil inthlak danglam vel avangin tunah chuan dingkhawr a lo ni ve ta. Ka pate unau mipa zawng hi veikhawr vek an ni a, kan unauah pawh veikhawr an awm nual mai.
          Veikhawr han tih hian mi thenkhat chu an nuih a han za ringawt a, nuih mai chu an nih lohzia i han thlir dawn teh ang. An tan hian khawvel chuan ni bik International Left-Handers Day chu 13 August-a hman thin turin a lo siam daih tawh asin. Ram ropui tak leh khawvelin a che vel a thlir reng America ram hruaitu lu ber (President) ni tawh zawng zawng zing a mi pariat (8) ngawt chu veikhawr kan tih hi an ni asin.

James A. Garfield  (1831-1881) 20th
Herbert Hoover  (1874-1964) 31st
Harry S. Truman  (1884-1972) 33rd
Gerald Ford  (1913-    ) 38th
Ronald Reagan  (1911 -    ) 40th
George H.W. Bush  (1924-    ) 41st
Bill Clinton  (1946-    ) 42nd
Barack Obama  (1961-    ) 44th

          Chu mai a la ni lo, France ram chhanchhuaktu ropui Joan of Arc te, Roman roreltu Julius Caesar-a te, Greek mi ropui Alexander the Great leh amah hnehtu hnehtu Britain lawng sipai hotu Admiral Nelson Horatio te, France ram inrelbawlna a pawimawh tak Napoléon Bonaparte te, Charlemagne, Holy Roman emperor te, Cuba ram hruaitu ro thap, a ram mitena an tih em em Fidel Castro te, tuna Israel prime minister ni mek leh Operation Thunder Bolt (90 minutes at Entebbe) a an thluak bawm Benjamin Netanyahu te, a mit del avanga beidawng mai lo leh chumi baka mitdelte leh rualbanlote tana khawvel eng hmuh tirtu Helen Keller te, an awm ve nual asin. Hei mai hi a la ni lo. England lal chhungkua zingah pawh an awm nual mai. Chungte chu:

King Louis XVI of France
Queen Victoria of England
King George II of England
King George VI of England
Prince Charles of England
Prince William of England

           Rimawi lama mite ngaihsan Kurt Cobain te, Jimi Hendrix te, Paul McCartney te, Robert Plant (Led Zepplin) te pawh hi veikhawr tho an ni ve asin. Leonardo da Vinci kha veikhawr a ni a, ani hi chu a ding lam a zen (paralyzed) vanga veikhawr ni a hriat a ni. Indian chhul chhuak zinga ropui ber hial a an sawi Amitabh Bachchan te, fiamthu thiam hmingthang, a chetzia avanga mite nuih tir theitu Charlie Chaplin te, Tom Cruise te, pianzei hmeltha, lengtin khum a val lunglentu Angelina Jolie leh Nicole Kidman te,a hmelthat a thihpui  a ni ti hiala an sawi Marilyn Monroe te bakah Julia Roberts,Bruce Willis leh Oprah Winfrey te pawh hi veikhawr vek an ni asin! An lo va duai lo tak em!! Hei mai hi a la ni lo, football a thiam em avanga  King of Football nihna an pek Pelé leh amah tluk hiala an sawi Maradona pawh kha veikhawr ve ve an ni a, Sir Bobby Charlton pawh kha veikhawr tho!! America mipuite hnathawk thei lo leka siamtu cartoon serial The Simpson a an pa ber Bart Simpson pawh kha veikhawr ngat mawle!!
Updated on 2nd June 2011
Khing a chunga kan sawi bakah khian Microsoft neitupa Bill Gates te, mihring zinga thla leilung rap hmasa ber nia kan ngaih Neil Amstrong leh a zinpui Buzz Aldrin te, Mark Twain leh Leo Tolstoy te, lem ziak thiam Michelangelo leh Pablo Picasso te, Wolfgang Amedeus Mozart leh computer thar apianga a hla an dah thin Ludwig Van Beethoven te, kan scientistte zingah pawh Albert Einstein te, Radium leh Polanium hmuchhuaktu Marie Curie te, kan awmna lei hian ni khi a hel a ni tih hmuchhuaktu Sir Isaac Newton te, Bob Dylan pawh hi veikhawr a la ni‼ Boxer ropui Myke Tyson leh Oscar De La Hoya bakah Faith Hill, Justin Bieber, 50 Cent leh Eminemte pawh hi veikhawr vek‼
            Khing zawng zawng bakah khian ka tana pawimawh leh hlu em em "veikhawr nula" a awm asin!! Ani nena kan hmangaihna lamtluang erawh phek dangah kan la chhuah leh dawn nia.

Veikhawr i ni em le?