Hmangaihtu aw

Hmanah chuan maw…
Nu leh pa thlazar hnuaiah kan nui bawk bawk a, hlimna leh lawmnate chu kan ta ni bik hliah hliah hian kan hre thin. Rualpuite nen kan infiam a, kan inhnial a, kan insual bawk thin. Kan duhzawng leh chak zawngte kan sawi a, ‘Ka len hun chuan chumi khami chu ka ni ang a, chuti ang chuan ka awm ang,’ tiin duhthu kan sam thin. Khang hunte kha nunhlui mai an chang zo ta.
Thil inthlak chu…
Ka la hre reng, “Ka len hun chuan Lawng sipaiah ka tang ang a,” tia ka sawi ve lai kha. Ni a liam a, kum a vei zak zak hnu chuan ka nih tum chu ni thei mai dinhmunah ka ding ta reng mai!!! Interview hmachhawn tura kohna ka lehkha te chu ka keng a, beiseina nen ram thim lam chu ka pan ve ta.
IGI Airport-ah chuan ka thlawh chhuah ve hun chu ka chang ran a. Mihringte hian kan hmalam hun kan lo va hre lo tak em! Ka thlawh chhuah hma darkar khat vel la awmah chuan thu hriat nuam lo tak chu ka hre ta. Pilot nawrh vangin thlawhna zawng zawng an thlawk chhuak dawn lova. Engtia rei nge he nawrhna hian a daih dawn hriat a ni lo. Ka mitsulh a, ka beseina zawng zawng chu beidawnnaah a chang zo ta.
Mual an liam e…
Ka thlenna hotel lam chu ka pan phei leh bek bek a, Delhi khawpui pawh a reh tlawk tlawk hle mai. Ka rilru a rum a, A lakah vuina tur ringawt ka zawng tan a, nakina inchhirna min thlentu mai an ni ang tih reng ka dawn pha lo. Kar pawh a vei hma chuan sual rawng bawl ka tan a. Zu hmun sa hmunah talin, mahni intihhlim ka ching tan ta. Pathian ka hlat a, ka duhdan leh tha ka tih danin ka nung mai mai thin.Ka zirna leh ka hriselna pawhin a tuar a, mahse kir zai reng ka rel lo. Chu mai a ni lo? Ka tuarah vanpui a lo chim a, ka hmangaih ber nena kan hlim thin teh lul nen, “mangtha” tih mai loh chu a anka ka tawng ta lo. Tunah chuan ka engkim ka chan ta.
Mahse…
“Tawp chin nei lo hmangaihnaa min hmangaihtu chuan min thlahthlam ngai lo,” tih an sawi ka hre tawh thin. Ka rum a, puitu ka zawng a, chhantu ka hmu si lo. “Ka fa, lo kir rawh. Ka la hmagaih reng che asin!” A va ropui tak em! A laka ka sualna te, ka vuina zawng zawng te hre reng a min hmangaihtu chu thlah ka tum lova, theihtawpa A kut chaka min hruaina chu zui ka tum ta zawk a.

Buai manganna tawk ngai lo ila
Thinlung pawh hlim reng se
Chu rammawi chu kan zawng ang em?
Zan awm tawh lohna chu
Amah kan hnaiha kan hriat chinah
Harsatna, manganna, hlimna leh lawmna
Ringtu`n kan tawk thin, he leiah
Harsatna, manganna, hlimna leh lawmna
Ringtu nun kalsiam reng a ni