Alpha And Omega

            Ka kianga mu kan nu chu ka en a, thosi sehna a inhiah neuh neuh paha a rizai sin a siam that mawlh mawlh pawh chu ka hmuh hmaih lo. A hmel mawi takte chu thlir nin tik a awm thei dawn si lo. Rilruin nunhlui a chhui kir a, taksa erawh a chau zo tawh si. Hmangaihna hi chu a lo va han mak tak em!!!

            Kan nu nen chuan kan inneih hma pawhin thil tam tak kan inhrilh thin a, thil engmah zep kan nei ngai lo. A bula ka hlim theihzia a hriat tlukin ani pawh a hlim thin tih ka hria a. Amah atang hian hmangaih hmasa ber hlutzia leh an pawimawhzia ka hriatchhuah phah si. Chung zawng zawng chu a mit meng mawi takte chuan a thup zo si lo, tawngkain sawi chhuak lo mahse hai rual a ni si lo. A hmangaih hmasa ber nena an intawn dan zawng zawng pawh hriatpuitu leh an harsatna pawh sut kianpui theitu ka ni hi ka lawm a, he ka lawmna hian van khi tawng lo mahse a chen hial ta ve ang.

          Chu pa nena an inhmuh hmasak ber ni pawh chu ka la hria asin. Class XI an zirlai a ni a, an aia pawl khata sang a ni tih pawh ka hria. Exam lai a ni a, midang zawng zawng an zawh sup sup a, an chhuah suau suau tawh hnu pawh chuan an pahnih chuan an la ziak ta char char a, zirtirtuin theh lut tura a tih hnua an theh luh dante, haw kawng a an haw rual zel dante leh chumi hnua an inkar a thil mak tak lo awm te, ni khat lek pawh inhmu lova awm harsa an tih dan pawh ka hria asin.

            A tal surh surh chu ka va en leh a, ‘I va meng rei ve, harsatna i nei em ni?’ a tih a, ka neih loh thu ka hrilh hnu chuan a mu ve leh ta mai a. Mut pawh tum chuang lo chuan a hmangaih hmasa ber chanchin chu ka ngaihtuah leh ta zawk a.

Thlalak mai mai

Easter Sunday kan hmanna bul vel a nih hi

A ni vel vek,,a kual mawi reuh a sin aw..

Biakin kawta mi a nih hi,,a hming ka hre lo nangin mawi ka ti

Nghihni awm lo tur nunhluite III : Fan ngai loh ram Zawlkhawpui chu

              Ka pi leh pute`n Aizawl an kalnaah min hruai ve an tum thu ka hriata ka lawmna aia nasa a ka lawm leh pawh hi ka la hre lo. Kum 5 chauh ka la ni a, chaw ei dawhkanah chuan kan thu bial laih a, ka puin, ‘Mapuia hi kan hruai ve dawn nia’ a tih lai a ka lawmzia kha aw. Puar lo chung chuan ka kham a, kawtzawla thiante pawnto hnena ka Chanchin Tha ka va hrilh laite kha ka la hre reng. An pawnto lai chu bansanin kei chu min mi ropui chei ta kha a ni a, ka ding leh veia thaw tha thei lo hiala min pawhte pawh kha ka dem hauh lo. Nia, dem chi an ni lova, dem chi kan ni lo. Kan nute`n Aizawl atanga Masi thawmhnaw min rawn hawn kan hakte kha kan Aizawl hnaih ber ber kha ni a, chak sa teh mahila keini ang naupang kha chu kan kal ngai lo. Thianten Aizawl ka thlen huna an hming theuh lam tura min chah hnu chuan kan tin ta a.

            Zanah chuan ka mu lo tih chu enge thil dang ka tih reng ka hre lo. Ka suangtuahna chuan Aizawl chu a fang nasa ngang mai a, in chhawng lian pui pui te, motor tam tawk te leh mihring tam tak hmu tura ka inngaihtuah chuan ka hlim veng veng a, ka helhhawlh nasa ngang mai. Mut pawh mu ta lo chuan ka pi leh pu te nen chuan zing dar nga velah chuan kan khua atanga Aizawl pan tur bus chu kan chang ta ran a, bus lo thlen lai leh chhungte nena kan inthlah lai chu ka hre reng tawh lo chungin ka hlim viau tho ka ring tlat.

Vul lai nei lo Hmangaihna chu

             Hun leh ni liam zelte chuan liampui ve zai reng an rel si lo. Zing dar thum a ri tawh a, nunhlui  ngaih chuan kian zai a rel chuang lo. Ka khumah chuan ka let let a, hlim taka kan nuih dun laite chu mitthlaah a lo lang  chuai chuai a.

            Kan khuaah chuan High School pakhat chauh a awm avang chuan naupang chu kan inhre bel em em a, tumah innel bik pawh awm hran lo chuan kan inkawm dial dial thin. Pawl sarih leh pawl riat kan nih chuan kan sikul aiawh chuan Sport-ah kan chhuak ve a, nuam kan tiin khaw danga kal chu kan phur hle thin. Zirna lamah mite kan phak lohna chuan infiamna lamah kan theih vang pawh ni lo chuan min tilar a, kan khawpum chuan min hre ve vek thin. Tun khat kan Sikul Football-a kan Champion tum  kha chu a va han nuam tak em aw!!

             Pawl kua kan nih kum chuan chhungte thu awih loh intihhmuh lai a ni a, a tua pawh kha kan inla pa em em ringawt a nih kha. Chumi kum chuan kan khaw thenawm atang hian thiandun pahnih hi kan sikulah an rawn lut a, ka la hre reng. Ka duh aiin ka hre rei mah mah ta a nih hi.

Review of 18 April

             Nghakhlel taka ka lo thlir chu a liam ve leh ta.Ka thil chhinchhiah tlem ka lo hrilh ve ang che u. Heng ho hi kan bazarna a ka hmuh ve anih hi..Mipa ahnih bazar chuan leitur a vang duh khawp mai.

Nuam ve mai mai, ka hmuh vawi khatna,...:)

A letter to Juliet

               He lehkhathawn hi Shillong ka kal hmasak ber July ni 26, 2010 a ka chhar a ni a, ruahsur cherh cherh laia ka riltam lutuk eitur zawngin Fire Brigade Office bula ka chhar a ni. Khasi tawng a inziak a nih avangin ka hrethiam lova, tuma hnena hrilh lovin thla ruk chhung Khasi tawng chu ka zir a, kum khat a liam hnu leh ka thiam duh chin thiam tawh nia ka inhriat hnuah ka rawn dahchhuak ta a ni. A chhunga Contact Address zawng zawng chu thup a that zawnk ka rin avangin ka tarlang ta lo a, a nihna ang ka let chhuak zo lo a nih pawhin lehkhathawn neitu hian min hriatthiam ngei ka beisei.

Thian Duhtak,

Tunge i nih ka hre lova, amaherawh chu he lehkhathawn hi i lo hmu a nih chuan ka harsatna chu i hrethiam mai ang a, min puih theih ngei ka beisei.

Ka hmangaih tak nen chuan hlim takin kan awm thin niin ka hria a, a hlimna thlentu nia ka inhriat avang hian ka lawm em em thin. Kan pahnih hian kan induh tawn em em thin a, mahse sulhnu kan ngah dun em avang chuan harsatna kan tawk leh zeuh zeuh thin. Hun rei tak chhung chu kan inzui tawh a, a bulah chuan ka hlim em em thin a, a tello a awm chu ka zuam lo a ni. Amah chu kan khua a awm a ni a, kei chu thingtlang hmuna awm ka ni. Chakkhai lama ka tlawh chang hian kan inhmu thin a, kan hlim dun thei hle thin. Mahse hmanni lawka ka zin leh chuan thil a lo danglam ta hle mai, a mak ka ti lutuk. A hmelah a lang reng si, a chetzia zawng zawngte chuan chu chu an tilang a, theih tawpa thup a tumnate pawh chu ka hmuh hmaih lo. A bialnu hmasa chuan thil tam tak a hriatchhuahtir thin a, chung zawng zawng chu ka hmuh hmaih thei bik si lo. Ka bulah chuan hlimna chanve in a hlim a, hlimna tak pe theitu erawh amah chu a ni si. Amah hi ka hmangaih a, a tan chuan ka rinawm reng thin. Ka sulhnute chuan min tibuai lo mahse ani chuan buaina a tawk a, amah chu a hmangaih vang a nih ka ring. Kei pawh amah hian min tihbuai ka ring a, chuvang chuan ngaihdan pawh ka siam thiam lo, engtia tih chi nge ka hre lova, amah ka kalsan dawn nge hetiang zawng zawng hre chung hian ka la vuan reng ang. Min pui hram teh, awmdan tur pawh ka hre tawh lo.Vawiin tlai hian kan khuaah ka haw dawn a, a rang lama min puih theih chuan ka lawm ngawt ang.

I chhanna ka lo nghak reng e

I thian,

XXX

xxxxxxxxx@gmail.com

           Tunah a thu awmzia ka hriat hnu pawhin a chhan dan tur ka la pe thiam lova, a chhar tur lovin ka chhar avangin pawi ka ti, a pawn a Letter To Juliet tih inziak ka hmuh avang chuan ka hre chak lutuk a, tunah a tlai nge hma sawi lovin ka chhan let ka tum a. Chhan dan tura min puih theih chuan ka lawm ngawt ang.

Pickle thak : Ka tan lawmna

                   Ka si hluam hluam hnu pawh chuan ka la pir chhunzawm ta zel a, a tawpah chuan ka pum lam chuan a tuar ta lo. Khum a tluk tawp pah chuan ka pickle min siamsamtu ka u chu ka han dem kual a, a na chu a ziaawm chuang miah lo. Mahse rilru khan a chak a, khatiang em em a hrehawm a min siamtu kha chu ka dimin ka khawngaih thei bik lo a ni. Mipa nih avang pawhin a thak kha chu ka tuar thei a, mahse pum lam khan a lo ti thei si lo. Hetiang hian vawi tam tak ka awm tawh a, ka u hming pawh ka lam ngun na rawh e, engmah awmzia a awm lo. A siam that dan tha ber chu kha pickle kha ei loh a ni a, chu lah ka thil theih loh tawp tur a ni si. A hmaa tih dan ngaite bawkin ‘ka insum ve deuh tawh ang’ chu ka han ti leh hla ngawt a, mahse thil awmdan tur chu sawi kher ngai lovin a chiang reng si.

                 He ka pickle hi a thak em em a, ka thianpa hmarcha inti ngam deuh pawh bathroom-ah a lo tah tir tawh a, kha mi ni kha ka nuih a la za reng, chhun chaw fak lai chuan ka eitir a, a ei hnem ngang mai. Vawi leh khatah a kham thut a, bathroom-a a lut chu kir tik a awm ta lo. Kan va en nak chuan bang dai ngheng leh tui hmuam pur chung chuan a lo si hluam hluam chu niin , a zia lo thei ngei mai.

A siamtu ka dem ngawt pawh chu ka inthiam chuang lo, mi dang tam tak eitur pawh a siam vet ho a, keimahni chauh a sawiseltu kan nih phei chuan a zahthlak dan turte ka ngaihtuah chuan a hriat loh pawha  sawi chi a nihzia ka hrechhuak uarh uarh a, keimaha ka lo inphun lungawi mai mai te pawh kha ka lawm zawk ta dah a.

Chaw ei a piangin mittui a luang a, insum aia har tih ka nei der mai si lo. Mahse zan khat chu ka ngaihdan ka thlak ta daih mai, pickle siamtu laka vui lo chuan lawmthu hrilh chu ka ba tih ka hrechhuak ta. Ka va lawm tak em !!! Kha pickle, bawngsa pickle ngei mai kha Mizorama pickle siam thiam ber lawmman dawngtu ka cousin siam ngat a ni a, kha ti khan thak ta lo se keini ang mivir leh hmui hmer ngaina tan chuan kar lova ral mai tur kha a lo ni a, mahse tunah thla thum lai ka ring ta. Vai chaw tui lo tak tak ai chuan a ei a lo nuamin dang a tinal a. Chumi atan chuan thak deuhin ka tan a lo siam a nih hi, ka va lawm tak em ka ti a. Thla thum mai ni lo, thla tam tak a daih theih nan tlem te te a ei chu ka zir ta bawk a.

Even the thinnest paper has its own backside

AW LUNGTE........

Aw lung te,
I va mawiin i va han mawiin i va han duhawm tak em
Zaidam leh nunnemna a khat;
Lei hringfa ten i hlutna hre lek lo a
An rah bawrh bawrh lai che pawh a:
Phunnawi miah lo a i awm thei pawh hi,
I va han ngaihsanawm tak em.
I hmel en hian midangte chuan
I hmelah fakna tur neilo mahse,
I nalh reuh e.


 Aw lung te takte,
I hmanlai hun ngaihawm tak leh i vanglai hun te,
Lungpui lian leh nalh tak, i nih lai khan,
Miten a nalh an ti em em thin che a, tunah
I tar tawh em avanga,
Te tak te a i awm tawh  pawh hian
I tel lo chuan lei hringfa te tan hian
Tual han chai na chi ani lo ve

Zo Blogosphere

             Vawiin chu ka hman ngei mai, Ambedkar Jayanti  a nih avangin kan Institution chu kan chawl leh pek a, a nuam ve mai mai thin hetiang chawlh awm hi. Kum 1891, April ni 14 khan Bhim Rao Ambedkar chuan a khawvel a lo hmang ve tan a, a hringnuna harsatna a tawh hrang hrangte chu kan sawi vek seng lo ang. Amah hi kan hriat theuh angin Chairman of The Constitution Drafting Committee a ni a. Tin, Law Minister a ni hmasa ber bawk a ni. Zirna lamah University of Mumbai atang te, Columbia University atang te, University of London atang te leh London School of Economics atang tein M.A., Ph.D., D.Sc., LL.D., D.LITT. leh BARRISTER-AT-LAW –te  a pawchhuak a. Bharat Ratna hialte pawh lo dawng tawh a ni. Nupui pahnih a neih hnu ah December ni 6, 1956 khan kum 65 mi niin mual min liamsan ta a. India chuan a chan ropui hle a ni.
             Thupui  lamah kan lut leh tawh ang a, chutianga chawlh kan neih takah chuan tiin ka Antivirus chu update tir turin kan venga Cyber Café-ah chuan ka kal a, rei pawh ka nghak lo, ka nin deuh avang chuan System chu la vein ka thu ve ta ran a. Facebook leh Twitter ninawm tak chu thlawh bosan chuan kan Mizo kutchhuak ngei mai blog (bawk??) hrang hrang chu ka en kual vel a. Thuziak thiam tak tak maiin duhtawka an ziak han chhiar chu a nuam duh ngei mai. Mi chi hrang hrang, kei ka ni inti chin (ka rin thu mai mai) chuan an duh dan leh an ngainat dan chuan an thu chu an han thluaithlum vel hmuh chuan mahni blog(bawk) chu a insih theih ngei mai. A thenin thlangsappui tawng ngei mai hmanga thu an han ziakte chu chhiar a man hla em em a, keini ve the lul chuan engtik khawtikah mah kan ziak ve thei awm si lo tiin ka inngaihtuah rauh rauh a.  Kan thiam ve hun chuan Spanish emaw, Français emaw a ziak an intihhmuh leh tawh ang a, ti tein ka nui tut tut a.

TUN A KA RILRU A AWM HLA TE

Lal Isua kan thian tha ber in
Kan mangan laiin min lawmLal Isua kan thian tha ber in
Kan mangan laiin min lawm
Amah hnen ah kan tawngtaiin
Kan thlen apiang hi a pawm
Muanna tamtak kan chan fo a
Lungngaih mangan kan tuar thlawn
Engkimah Lal Isua ring a
Kan tawngtai loh avangin

Thil hrehawm leh thlemna tawkin
 Buaina lo awm bawk sela
Tuilairap a lungngaih ai in
Isua lam tawngtai ila
Amah tluk thian hlu leh rinawm
Min pui tur kan hmu lovang
Kan sual kan chaklohna zawng zawng
A hre vek tawngtai ilang

Rilru lamah chaklo ila
Mangan ritphurh nei pawh in
Isua hlu hi kan humhimna
Lamah tawngtai ilangin
Chhungten min tuithlar mahsela
Thianten min hmusit sela
Isua hnenah thu thlen ila
Kan phaw hian min thlamuan ang

He hla hi Irish mi  Joseph Serriven a phuah ani a, a bialnu nen hlim em em in an lengdun thin a, an hlim thei hle ani. Chutia an inhmangaih em em avang chuan inneih hial an lo duh ta a, an inneih dawn zanah chuan a bialnu chu tui ah a tlahlum ta daih mai a. Heti a hmangaih em em in an boralsan ta mai hi a tuar em em a, hrehawm a ti hle ani. He hla hi a lungngaihna inhnem nana a phuah ani a. Mite hla duh zing ah a tel ve char char ani. MIzotawng a min lehlin sak tu chu Rev. Zosapthara ani.

Kawmthlang lui

                  Tlang sang tak leh thawveng tak hmunah chuan ka khawvel chu ka hmang tan a, chumi hmuna thingkung lian tak tak thlazar hnuaiah chuan a thei ber ni awm takin ka lo sei lian a, ka hma lam harsatna lo thleng tur reng ka dawn ngai lo. Kan thlahtute lo tih thin dante chu hre reng chuan hma lam panin ka kal ve bek bek a, thiante thlazar hnuaiah chuan nghei bik lo chuan ka awm ve thin a, khang ka thiante kha engtikah tak tawng leh ang i maw?
                  Thing delh loh lung delh loh na fam chu hma lam pan chuan ka kal ve zel a, ka tum Rammawi chu ka thlen ngei theih nan chuan a beih a beih a lo tul ve tan ta, lung khawk rawk hmunte leh tui khawh thlate, thal khawro lai ber pawh a nun khaw chhuah tum chu ka tih makmawh a ni tih chu ka hai bik lo. Lengkir sang tak tak ka hma chhawn lai te chuan ka hringnun chu ka ning a, hrehawm tiin ka kun ve tlawk tlawk thin. Mahse, he khawvela ka hna pui ber chu ka tih hlawhtlin loh chuan tumahin min tihsak dawn lo tih ka chiang em em a, chu avang chauh chuan tiam chin lam pan chuan ka kal tauh tauh thin a ni.

A phek bo chu

                    Kar khat meuh ka cham chuan ka haw a lo hun ve ta reng mai a. Rilruah thil tam tak awm mahse lungte pawh a leng ve lek lek a ni. ‘I haw hmain ka Note Book-ah thil ziak ve la, i thang chhung zawnga ka lo chhiar a, nang ka ngaih zual chang apianga ka chhiar tur’ ti a min sawmna chu hreh tak chung chuan ka chhang ta a. Thil awmdan dik tak ka ziak vek ang a, a nih nih ka ni mai ang tiin a lehkhabu chu ka laksak ta a.

A nuamin a danglam hle  mai, hetiang hun hlimawm hi ka hman leh kher pawh ka ring lo. I kianga ka awm chuan ka hlim asin. Theih nise kumtluang a tu dang ngai lova lendun ka va chak tak em!!! Nia, tumah dang ngai lova len chu ka chak a ni, chu chu thil awmdan a ni si lo. I nui hmel mawi tak phen a i thinlung ngui kha ka hmu thei a sin. Mahse ka dem lo che, amah ka ni tlat si lo, amah i Lungdumtua chu. I kianga rei lo te ka awm chhung pawh hian thil tam tak ka hmu a, ka rilru chu a na ve thin a sin. Mahse ka hmangaih em che avangin pai dam hram hram ka tum thin a, mahse thil awmdanin a zir si lo. Nimin a i thiante ina kan kal a ka lehkhabu hawn ka pek che a, a phek hmasa ber i en a, I thil zuk bih kha ka hria asin. December a nih kha i en ni

Never Alone

              ATM kawtah chuan kan thian thum chuan kan ding thap mai a, ruah a sur nasat em avang chuan che chhuah chu peih awm lo tak a ni. Rajpur kan kal dawn em ni tia ka zawh chuan enge tih tur awm min zawt a. Ka hrilh kim vek hnu chuan kan pakhat zawk chuan min hawsan a, kan thiandun chuan kan kal ta a. Hemi ni hi September 5, 2010 a ni a, ka la hre reng.Kan tih tur kan tih hnu chuan rui mang kheng chuan Mizo in luahte kan tlawh a, hetah hian ka thianpa chuan min peih loh san a, keimahin ka haw ta a.
              Ni thum liam hnu September ni 8 chuan kan kohhran buatsaih Youth Retreat chu kan kal ve a, ni thum awh tur a duan a nih avangin kan riak chhuak a. North East atanga Kristian zirlai tam tak chu kan kal a, a zan hmasa ber hian a ni he thil hi a lo thlen ni. Mizo chu mipa deuh vek kan ni a, kan Missionary pathum zinga pakhat chauh chu hmeichhia a ni a, a dang zawng mi panga, Missionary tiamin chu Mizo awm chhun chu kan ni mai. Ka thianpa nen chuan inchung awih, glaze tile a siam ah chuan kan thu a, he hla nalh tak mai hi ka hmangaih ka then tak chuan ngaithla turin min rawn ti a.

Zantin mangtha

A sakhming sawi leh lunglen a zual a
Awm ngheng chial a kan indi lai ka dawn changin Hmangaihtui a  luang leh thin
Biahthu di hlan a kan inlawm lai ten zamual liam mahse
Chul thei reng hian a mawi si lo, aw ka tawnah


Dawn kir ve hian i mawi si lo kan hlimlai nite
Eng dang ngai lova tual kan chaina Shillong tlang khi
Fan leh ka nuam e, aw a thiang ten
Goldie Goodie ngai lo reng a kan inlawm lai te

Tawnmang Lasi

Zan thla eng dul ruih maiah chuan lui tui chu fawn ri hlup hlup a, chingpirinu hram kurh kurh leh khuangbai chiri ri cher cher te, ral lehlama sihal lo u te bak chu ri hriat tur reng a awm tawh lo. Kal lehna tur chuang ka hriat loh avangin lung chunga thu chung chuan tuiah ka ke chu ka chhek ka chhek a, rilruin nupui fanau thlaphan turzia leh an mangan dan tur hre reng mahila tih theih ka nei si lo. Sakawlh leh misual laka inven nan tiin ka chemte chu ka hum reng a. Ka meipui chheh pawh chuan vam lam pan lovin mih lam min pansan a. Chu zan khawhar tak leh tihbaiawm takah chuan mut mai chu a har ngang mai. Chhun lama kan sa pelh laite chu ka mitthla a, ka thiante nena kan inhloh dan reng ka ngaihtuah chhuak thei lo. Boruak chu a vawt deuh vur a, ram chin hriatlohna a sapelh hlauhawmziate chu hre reng mahila, kha ti em em a nunau dimlotu keipui chu ka hua a, khua a tih danah chu tlawmah ka tlat a. Chumi ka ngaihtuah zawng ringawt pawh chuan tha a la na a. A chaldarah tak mai chuan ka silai ngei maia han kah chu ka la chak reng a. “Ka hmaa i rawn chhuah hun hun chu i hnuk chhah ni a ni ang” ti sup sup pah chuan ka silai dawt chu ka chhemfai hlarh hlarh a. A hnu ka chhui zelnaah helai velah hian a awm tih a hriat a. Inring renga awm chu him bera ka hriat avang chuan mut zai rel ta lo chuan zing khawvar nghah chu nghah ka tum ta zawk a.

Chhun lama kan hah tawng khawng vangte pawh a ni ang, khawfing chah dawn vel chuan ka lo muhil  deuh sek  a, ka mumangah chuan ram nuam tak hring cham duai maiah chuan ka awm a. Mi kal hmuh tur awm reng an awm lo. Tlang chhip lam pan chuan ka chho zel a, thinghmun ka luh dawn lai tak chuan ka hnung atang hian mi, a awm ka hriat ngai reng reng loh chuan mi lo ko a. Ka han leh hawi chuan ka hnung lawkah chuan nula hmeltha leh duhawm tak mai, a sam a dara uai thla hniang chu kan keipui hliam ngei chunga chuang hi ka hmu a. Rang taka ka silaia ka tin lai chuan chu nula chuan aw nem leh dam tak chuan mi lo khap a, ani hi chu awm lo selang chuan a chaldarah tak chuan  verh ang a. Phuba chu ka la ngei ang le. A chuanna atanga rawn chhuk chuan ka lam panin a rawn kal a. A sakhmel leh pianziaah chuan sel tur reng ka hre lo. A sam sei tak chuan a mawng bawr nalh tak chu a vaw hnap a, a puan bihin a khuh phak loh a mal var takte chuan mit a titlai ngei mai. Kan keipui pawh chuan chet a la dawn lo tih a hriat takah chuan ka silai chu ka dah hniam a, ka lam pana lo kal chu ka lo thlir ta reng a.

MIZO A,AW,B KAN NEIH DAN

2010-08-15 16:28

Lalhruaitluanga Ralte

.Kan a aw b hi Pu Buanga leh Sap-upa te min duan chhuahsak a ni a, chumi atana an hman hawrawp mal leh inkawp chi hrang hrang Sap leh Vai mi thiamin an lo ziak te kan chhui dâwn a ni.
.
Kan a aw b neih dan leh Pu Buangate thiandunin Mizo tawng an lo zir chhoh dan hi theihpatawpin ka chhui ve a, kum 4 emaw lai ka chhui hnua ka hmuh chhuah ang ang ka han ziak a ni. 

 .

1.Mizovin thuziak kan lo nei tawh thin
Mizo lehkha zawng savun a ni a, hman laiin uiin min lo ei sak zo ta a ni e, tih a ni thin a. Thawnthu sawi dan dangah chuan Mizoten thuziak an lo nei tawh a, savuna zial a ni a, hunrei tak an vahvaihnaah an hloh ta a ni, tih a ni bawk a. Savuna ziak chu sum khuh nan an hmang a, uiin a lo ei ta a ni, an ti bawk. Hetiang thawnthu hi Mizo chauh ni lo, sakhaw hrang hrang vuantute hian kan lo nei hlawm a. Mihringte chunga leng pathiante leh an thuihruaiten min rawn tlawhpawh lai thawnthute hi an lo sawi th$n a. Chung hun lai thawnthu tam tak z$ngah thuziak tihbo thu, hnam hrang hrangin kan lo nei hi a mak hle a ni. 

. 

2. Thuziak tih bo thu
Hetiang thawnthu hi Khasi-ho chuan chi hnih an nei a. Pathianin thuziak a pek chu an lo dah f$mkhur loh avânga meia kâng ral nia sawi a ni a. Thawnthu dangah chuan pathianin Bengali leh Khasi hi lehkhabu a pe ve ve a. An haw kawngah tui a lo lian ta pung mai a, Bengali pa chuan a lu chungah lehkhabu chu dahin a hleuh kaipui ta a. Khasi pa erawh chuan a sehkawh a, li lai a thlenin a chau ta a, lehkhabu chu a dawlh ta a ni. Naga rama Rengma-ho thawnthuah chuan Pathianin savun phekah thuziak a pe a, chu savun chu an zial a. A kawltu f$mkhur loh avângin savun zial chu uiin a lo ei a, a boral ta a ni. 

Lal Tibba- Feet 9000 a sang chu

railing

Lawn tan tirhna atangin

A var saw vur

Di loh Di

February thla a in tan meuh chuan kan khua Champhai chu a vawt tawh hle a, kan veng Vengsang-a  naupangte chuan Krismas boruak an kham lohziate, sikul luh an chak lohziate chu hahipin an sawi laih laih a, Krismas an hman dan an sawikhawm lai chuan an nui leh hak hak zel  a. A then lah an hman dan zir loh avanga ke tuam bur chung chuan thiante titi karah chuan an lo nui ve vur vur a. Thu dang vawrh teh mahse mathei lovin sikul tan chungchangah an tawp leh nge nge thin. GMHSS-ah hian kum thum vel  chu ka thawk ve ta reng mai a, zirtirtu kan innelin kan inpawh em em a. Thawhpuite intithiamlo an awm ngai meuh lo. Kan sikul pawh chu February 10 a tan tur a ni a, kum dang ang bawkin zirlai chu kan thahnem leh hle ang tih chu a rin theih a. A nihna takah chuan kei ngei pawh chuan chawlh chu ka kham lo tak zet a ni.

Sikul tanni a lo thlen chuan sikul naupang hmel duhawm tak tak te chu phur hmel tak hian an lo kal sang sang a. Hmuh an nuamin mit an titlai hle mai. A ni khatna a nih avang chuan lehkha pawh zir mumal lovin sikul hmunhma hnawkte tifaitein leh pawl siam remtein hun kan hmang a. Hmingte kan lam hnu chuan kan bang ve ta a.

Chawlhkar khat a liam hnu chuan naupang tharte pawh chu an thian chhar tharte nen chuan an infiam ve nak nak tawh a. Class lak laia lo bengchheng tawkte pawh an awm leh ta. Sikul naupang tam zawk chuan nuam an tiin an hlim a. Mahse lut thar zingah chuan nuam tihmel pu lo leh thiante be vak lem lo hi a awm ve a, a hmel chu a tha reuh kher mai. A thiante ka zawh chuan mahni a awm hi nuam a ti zawk a an ti mai zel a. Amah chu ka zah deuh avang chuan ka be mai ngam lo.  Thuneitute lam atanga ka hriat dan chuan amah chu Bethel veng lam mi a lo ni a, pawl sawm thleng Aizawl lama a zir zawh hnu chuan chhungkaw harsatna avang chuan a lo haw a lo ni a. A hmel chuan khawngaihthla a la reuh ngei mai. Tlangnel taka a awm theih nan tiin ka class-ah chuan thilte ka zawt fo a, mak ang reng takin tah takin a chhang thei zel a, harsa tih hmel pawh a pu hran lo.

Thla hnih thum vel a liam hnu chuan kan innel ta khawp mai a, chhun chawlh laite chuan fiamthute thawhin kan nui dun thin a. Midang bulah pawh a tlangnel chho ve zel a, amaherawh chu midang kan kawm tam em em lo. Kei lah ka thawhpuite chu kum lama ka kawm phak lohte an ni hlawm a, ka nu ka pa tih rual bula awm ai chuan a bula awm chu ka thlang zawk si. Hunte  a lo kal zel a, kan innelna chuan zual lam a pan zel a, a tawpah phei chuan thil mak tak a thleng ta tlat mai. Class-ah te chuan ka melh tha ngam ta hlek lo mai a, amah chu ka zah ru deuh tlat thin. Zan lamah mahni awm ka nih avangin ka khua a har fo a, chutiang hunah pawh chuan ka rilru-ah a lo awm leh thin a. Mahse zirtirtuin mahni zirlaite han ngaihzawn chu thil mawi a ka hriat loh avangin thup ka tum hram hram a, midang bulah chuan thup thei viau thin mah ila, a kiangah chuan ka lo tilang leh thin.

Zan khat chu Sangtei chuan a rawn call a, a nambar ka neih loh avang chuan tu tih ka hre mai lo. A thusawi danah chuan a zam hle tih a hriat a, chutiang zan rei tawh lama a rawn bia chu mak ak tih em avang chuan ka zawt ta ringawt a. Sangtei min chhan dan chuan mi va thawng tak em!!

“Sir, zanin chu ka mu thei lo reng reng, ka rilru hi a hah nge pawh ka hre lo, sikula kan inkawm laite ka mitthlaah a lo lang a, kha tiang kha ni reng se ka chak ngawt mai. A mak lutuk, i bula awm hi ka chak reng mawle”

Musoorie

He ni hi a ngaihawm ve reuh ngawt ang. Musoorie ka kal hmasak ber ni a ni a.

Archer at the top of the hill

Khawlai a mi

A mawi khawp mai

Tlangchhip a chawlhna